- ક્રેઈનની મદદથી ટ્રેલર સાઈડમાં મુકાવી પોલીસે હાઈવે પરનો વાહનવ્યવહાર રાબેતા મુજબ કરાવ્યો
- લાલિયાવાડી સામે નારાજગી : એક માસ પૂર્વે પણ ટ્રક પલટવાનો બનાવ બનતાં બે વ્યક્તિ મોતને ભેટયા હતા
- હાઈવે ચોકડી પરના વિચિત્ર સર્કલના કારણે અવારનવાર અકસ્માતની ઘટના સર્જાતી હોવા છતાંય તંત્ર બેધ્યાન
ધોળકા તાલુકાના વટામણ ચોકડી ખાતે ગુરૂવારે સવારે આશરે પાંચ વાગ્યાના સુમારે એક ટ્રેલર પલટી મારી જતા ટ્રાફ્કિ જામ થઈ ગયો હતો. સદનસીબે આ અકસ્માતના સમયે કોઈ જાનહાનિ થઇ ન હતી. જોકે આ અકસ્માતમાં ટ્રેલરમાં બેસેલ એક વ્યક્તિને સામાન્ય ઇજા પહોંચી હતી. આ બનાવની જાણ થતાં જ સ્થાનિક લોકો એકઠા થઇ ગયા હતા અને કોઠ પોલીસ અને 108ને જાણ કરતા કોઠ પોલીસ સ્ટેશનનો સ્ટાફ્ અને વટામણ સ્થિત 108 ઇમરજન્સી એમ્બ્યુલન્સ ઘટના સ્થળે પહોંચી ગયા હતા. 108ની ટીમે ઘટના સ્થળે જ ઇજાગ્રસ્તની સારવાર કરી હતી. જ્યારે કોઠ પોલીસે ક્રેન બોલાવીને પલટી મારી ગયેલ ટ્રેલરને સાઈડમાં મુકાવી ટ્રાફ્કિ ક્લીઅર કરાવ્યો હતો. અત્રે ઉલ્લેખનીય છે કે થોડા દિવસો અગાઉ પણ વટામણ ચોકડી ખાતે આવેલા મોટા સર્કલના કારણે એક ટ્રક પલટી મારી જતા બે વ્યક્તિઓના મોત નિપજયા હતા. અને ત્રણ લોકોને ગંભીર ઈજાઓ પહોંચી હતી. ત્યારે ધારાસભ્ય કિરીટસિંહ ડાભી સમક્ષ સ્થાનિક લોકોએ આ સર્કલને નાનું કરવા માટે રજૂઆત કરી હતી. પરંતુ જવાબદાર તંત્ર દ્વારા આ કામ હાથ પર લેવામાં ના આવતા ગુરૂવારે સવારે પણ વટામણ ચોકડી સર્કલ પર વધુ એક અકસ્માત સર્જાયો હતો. ત્યારે સ્થાનિક લોકોની માંગણી છે કે વટામણ ચોકડી ખાતે આવેલ સર્કલને તાત્કાલિક ધોરણે નાનું કરવામાં આવે. જેથી ભવિષ્યમાં મોટી દુર્ઘટનાને ટાળી શકાય. સીસીટીવી કેમેરામાં કેદ થઈ ગયેલ આ અકસ્માતના બનાવનો વીડિયો પણ વાયરલ થયો હતો.
