- કલેક્ટરની સૂચનાથી ભૂસ્તરની ટીમનું આકસ્મિક ચેકીંગ
- આશરે ત્રણ કરોડનો મુદ્દામાલ જપ્તઃ સમગ્ર જિલ્લામાં ઓચિંતી રેડ કરાશે
- રેતી માફિયાઓએ ગેરકાયદે ખનન કરીને નદી પટની ઘોર ખોદી નાંખી
ગાંધીનગર જિલ્લામાં રેતી માફિયાઓએ ગેરકાયદે ખનન કરીને નદી પટની ઘોર ખોદી નાંખી છે. બિનઅધિકૃત રેતીની હેરાફેરીની પણ બદી છેલ્લા ઘણા સમયથી ફુલીફાલી છે. ગઈ રાત્રિના પીપળજ ચેકપોસ્ટ ઉપર મદદનીશ ભૂસ્તરશાસ્ત્રીની ટીમે આકસ્મિક ચેકીંગમાં રેતી ખનીજના ગેરકાયદે વહન કરતાં 13 જેટલા ડમ્પર સહિત આશરે ત્રણેક કરોડનો મુદ્દામાલ જપ્ત કર્યો હતો. જિલ્લા કલેક્ટરની સૂચનાથી આ પ્રકારના આકસ્મિક દરોડા આગામી સમયમાં પણ ચાલુ રહેશે.
ગાંધીનગર જિલ્લામાં સાદી રેતી ખનીજની લીઝો આવેલી છે. જોકે રેતી માફિયાઓ લીઝ બહાર મોટા પ્રમાણમાં ગેરકાયદે ખનન કરતા હોવાની વિગતો છે. પરંતુ તેમનું એટલું મોટું નેટવર્ક ગોઠવાયેલું છે કે, ભૂસ્તરની ટીમ નીકળે તે પહેલા સ્થળ પર સંદેશો પહોંચી જાય છે, જેથી દરોડામાં કશું હાથ લાગતું નથી. હવે તો રેત ખનનમાં નદી પટમાં નાવડીનો ઉપયોગ કરતાં થયા છે. નદી પટની અંદરથી રેતીને સબમર્સિબલ પંપ દ્વારા નાવડીમાં ઉલેચવામાં આવે છે. અને તેમાંથી ડમ્પરો અને ટ્રેક્ટરો ભરવામાં આવી રહ્યા છે. અનોડિયા અને લેકાવાડા ખાતેના દરોડામાં આ મોડેસઓપરેન્ડી પકડાઈ હતી. આ પધ્ધતિથી નદીના પેટાળને ગંભીર નુકશાન થઈ રહ્યું છે. જિલ્લાના ચેકપોસ્ટો પર પણ રેતી માફિયાઓનું જબરજસ્ત નેટવર્ક ગોઠવાયેલું છે. જેમાં અન્ય જિલ્લાના રોયલ્ટી પાસ ઉપર ગાંધીનગર જિલ્લાની રેતીની ગેરકાયદે હેરાફેરી કરવામાં આવે છે. જિલ્લાના ચેકપોસ્ટ પરની ગતિવિધીઓની કલેક્ટર એમ.કે.દવેને બાતમી મળતાં તેઓ પણ ચોંકી ઉઠયા હતા. સાદી રેતી ખનીજની ગેરકાયદે હેરાફેરીને ડામવા મદદનીશ ભૂસ્તરશાસ્ત્રીને સૂચના આપવા સાથે આવા તત્વો સામે કડક કાર્યવાહી કરવાની તાકીદ કરતાં આખરે ભૂસ્તર તંત્ર જાગ્યું છે.
જિલ્લા કલેકટર એમ.કે.દવેની સૂચના અન્વયે ગાંધીનગરના મદદનીશ ભૂસ્તરશાસ્ત્રીએ પોતાની ટીમ સાથે જુદીજુદી ચેકપોસ્ટ ઉપર ગત રાત્રીના સમયે આકસ્મિક ચેકીંગ હાથ ધર્યું હતું. આ ચેકીંગ દરમિયાન પીપળજ ચેકપોસ્ટ ખાતેથી સાદી રેતી ખનીજના બિનઅધિકૃત વહન કરતાં કુલ 13 ડમ્પર મળી આવ્યા હતા. તેમની પાસેથી જરૂરી કાગળો માંગવામાં આવ્યા હતા. જે રજુ નહી કરાતા સાદી રેતી ખનીજના બિનઅધિકૃત વહન કરતાં તમામ રેતી ભર્યા ડમ્પરો મળીને કુલ ત્રણ કરોડ રૂપિયાનો મુદ્દામાલ જપ્ત કવરામાં આવ્યો હતો.
