સાત વર્ષથી વધુ સજા હોય તેવા કેસને સેશન્સમાં કમિટ થાય છે : વધુ સુનાવણી ત્રીજી સપ્ટેમ્બરે
રાજકોટના ટીઆરપી ગેમઝોન અગ્નિકાંડમાં સંડોવાયેલા પૂર્વ ટીપીઓ સાગઠીયા સહિતના 15 આરોપીઓને આજરોજ અદાલતમાં રજૂ કરવામાં આવ્યા હતા અને તેઓનો કેસ સેશન્સમાં કમિટ થતા આગામી સુનાવણી તારીખ 3 સપ્ટેમ્બરે રાખવામાં આવી છે.
ટીઆરપી ગેમઝોન અગ્નિકાંડમાં 27 માનવ જિંદગી મોતના મુખમાં ધકેલાઈ ગયા બાદ ગુજરાતભરનું સરકારી તંત્ર હચમચી ઉઠ્યું છે. હાઇકોર્ટે પણ સરકારની ઝાટકણી કાઢતા ગેમ ઝોનની ઘટના પરથી બોધ પાઠ લઈ તમામ નિયમોનું કડક રીતે પાલન કરાવવા આદેશ આપતા તમામ સરકારી વિભાગો સફાળા જાગ્યા છે. અલગ અલગ તપાસ એજન્સીઓની તપાસના અંતે ટીઆરપી ગેમ ઝોન અગ્નિ કાર્ડના મુખ્ય આરોપી તરીકે રાજકોટ મહાનગરપાલિકાના પૂર્વ ટીપીઓ મનસુખ સાગઠીયાને દોષિત ઠેરવવામાં આવ્યો છે. આ ઉપરાંત અન્ય 14 આરોપીઓની પણ ભૂમિકા સામે આવતા તમામ સામે ગુનો દાખલ કરી ક્રાઈમ બ્રાન્ચ દ્વારા ધરપકડ કરી જેલના સળિયા પાછળ ધકેલી દેવામાં આવ્યા હતા.
તાજેતરમાં ક્રાઈમ બ્રાન્ચ દ્વારા તમામ આરોપીઓ સામેનું ચાર્જસીટ કોર્ટમાં રજૂ કરવામાં આવ્યું હતું. ત્યારબાદ આ ગંભીર પ્રકારના ગુનામાં સાત વર્ષથી વધુ સજાની જોગવાઈ હોવાથી નીચલી કોર્ટ દ્વારા ટીઆરપી ગેમ ઝોન અગ્નિકાંડનો કેસ સેશન્સમાં કમીટ કરવાનો થતો હોવાથી મનસુખ સાગઠીયા સહિતના તમામ આરોપીઓ ને જેલ માથી કોર્ટમાં હાજર રખાયા હતા અને કાગળોની કોપી આરોપીઓને પૂરી પાડ્યા બાદ અદાલતે કેસ સેશન્સ કોર્ટમાં કમીટ કરવાનો હુકમ ફરમાવેલ છે. નીચલી અદાલતે ટીઆરપી ગેમ ઝોન અગ્નિકાંડનો કેસ સેશન્સમાં કમિટ કરતા અદાલતે આગામી સુનાવણી તા. 3.9.2024 પર રાખી છે
સાગઠીયાના પત્ની, પુત્ર અને ભાઈની આગોતરા તથા ચીફ ફાયર ઓફિસર ઠેબાની જામીન અરજી પરની વધુ સુનાવણી 29 ના રખાઇ
રાજકોટ ટીઆરપી ગેમ ઝોન અગ્નિકાંડમાં સંડોવાયેલા અને હાલ જેલના સળિયા પાછળ રહેલા પૂર્વ ટીપીઓ સાગઠીયાની એસીબી દ્વારા અપ્રમાણસર મિલકતના ગુના મામલે ધરપકડ કરી ચકાસણી કરવામાં આવી હતી. ત્યારે 10.55 કરોડની વધુ મિલકત મળી આવી હતી. અને આ મિલકત તેમના પત્ની ભાઈ અને પુત્રના નામે પણ વસાવેલ હોવાનું સામે આવતા ભ્રષ્ટાચારમાં સંડોવણી હોવાની શંકાએ એસીબીએ તેઓ વિરુદ્ધ પણ કાર્યવાહી શરૂ કરતા સાગઠીયાના પુત્ર કેયુર, પત્ની ભાવનાબેન અને ભાઈ દિલીપભાઈએ પોતાના વકીલ મારફત રાજકોટની કોર્ટમાં આગોતરા જામીન અરજી કરી હતી. આ ઉપરાંત ટીઆરપી ગેમ ઝોન અગ્નિકાંડમાં સંડોવાયેલા ફાયર ઓફિસર ઠેબાએ પણ જામીનમુક્ત થવા માટે અદાલતમાં અરજી કરી હતી. જે તમામ આગોતરા અરજી અને થવાની જામીન અરજી સંદર્ભે આજરોજ સુનાવણી હોય જેમાં વધુ સુનાવણી આગામી તારીખ 29 ઓક્ટોબરના રાખવામાં આવી છે. આથી ફાયર ઓફિસર ઠેબા સાતમ આઠમનો તહેવાર જેલમાં વિતાવશે.
