150 ફૂટ રીંગરોડ આર કે પ્રાઈમમાં ચાલતા આઈપીએલ સટ્ટાબાજીનો ક્રાઈમ બ્રાન્ચે કર્યો પર્દાફાશ
ઓફિસ ભાડે લઈ ચલાવાતો હતો ઓનલાઈન ક્રિકેટ જુગાર, બે ઝડપાયા ; વોર્ડ નં.7 AAP ના નેતા પુત્રનું કનેક્શન ખુલ્યું, માસ્ટર આઈડી આપનાર સહિત ચાર શખ્સો ફરાર
અગ્ર ગુજરાત, રાજકોટ
રાજકોટ શહેરમાં ક્રિકેટ સટ્ટાબાજીનો એક મોટો કૌભાંડ બહાર આવ્યું છે, જેમાં શહેરના 150 ફૂટ રીંગ રોડ પર આવેલી આર.કે. પ્રાઈમ બિલ્ડિંગમાં ઓફિસ ભાડે રાખી આઈપીએલ મેચો દરમિયાન ઓનલાઈન જુગાર રમાડવામાં આવતો હતો. ક્રાઈમ બ્રાન્ચની ટીમે ચોક્કસ બાતમીના આધારે દરોડો પાડી બે શખ્સોને ઝડપ્યા છે, જ્યારે આ રેકેટ સાથે જોડાયેલા અન્ય આરોપીઓને વોન્ટેડ જાહેર કરી તેમની શોધખોળ શરૂ કરવામાં આવી છે.
આ કેસમાં સૌથી ચોંકાવનારી બાબત એ છે કે, સમગ્ર સટ્ટાબાજીનું નેટવર્ક રાજકીય કનેક્શન સાથે જોડાયેલું હોવાનું સામે આવ્યું છે. માસ્ટર આઈડી પૂરી પાડનાર વત્સલ શીંગાળા એક રાજકીય ઉમેદવારનો પુત્ર હોવાનું ખુલતા આ મામલે શહેરમાં ચર્ચા જોર પકડી રહી છે.
ક્રાઈમ બ્રાન્ચના પીએસઆઈ એસ.વી. ચુડાસમા તેમની ટીમ સાથે પેટ્રોલિંગમાં હતા, ત્યારે મળેલી ગુપ્ત બાતમીના આધારે આર.કે. પ્રાઈમ બિલ્ડિંગના બીજા માળે આવેલી ઓફિસ નં.216માં દરોડો પાડવામાં આવ્યો હતો. દરોડા દરમિયાન બે વ્યક્તિઓ સ્થળ પર હાજર મળી આવ્યા હતા. પકડાયેલા આરોપીઓમાં જયદીપ દિનેશ જાદવ (ઉંમર 30), જે રોડવેઝ સંબંધિત વ્યવસાય સાથે જોડાયેલો છે અને દર્પણ હરેશ બારસીયા (ઉંમર 28), જે લાઈટ ડેકોરેશનનો વ્યવસાય કરે છે,નો સમાવેશ થાય છે. બંનેએ ઓફિસ ભાડે લઈ અહીંથી સટ્ટાબાજીનું સંચાલન કરતા હોવાની કબૂલાત આપી છે.
પોલીસે જયદીપ જાદવના મોબાઈલની તપાસ કરતા તેમાં “ALL PANEL 777” નામનું ઓનલાઈન સટ્ટાબાજી પ્લેટફોર્મ ખુલ્લું જોવા મળ્યું હતું. તેમાં ‘user id-10200’ નામની માસ્ટર આઈડી સક્રિય હતી. પૂછપરછ દરમિયાન આરોપીએ જણાવ્યું હતું કે, આ માસ્ટર આઈડી દ્વારા તે વિવિધ યુઝર આઈડી બનાવી પોતાના ગ્રાહકોને આપતો અને આઈપીએલ મેચોમાં સટ્ટો રમાડતો હતો. આ સાથે કસીનો ગેમ્સ પણ ચલાવવામાં આવતા હોવાનું બહાર આવ્યું છે. તપાસમાં ખુલ્યું કે, આ માસ્ટર આઈડી વત્સલ પરેશ શીંગાળા પાસેથી મેળવવામાં આવી હતી, જે હાલ અમદાવાદમાં રહે છે. આ આઈડીમાંથી અલગ-અલગ પોઈન્ટના આધારે યુઝર આઈડીઓ બનાવવામાં આવતી અને તે પંટરોને ફોરવર્ડ કરવામાં આવતી હતી.
જયદીપે સ્વીકાર્યું કે, તે પોતે બે આઈડીનો ઉપયોગ કરતો હતો, જ્યારે એક આઈડી રાજકોટના વિજય ઉર્ફે વી.એમ.ને આપવામાં આવી હતી. આ રીતે એક જ માસ્ટર આઈડી દ્વારા અનેક સ્તરે સટ્ટાબાજીનું નેટવર્ક ચલાવવામાં આવતું હતું. ક્રાઈમ બ્રાન્ચે દરોડા દરમિયાન ઓફિસમાંથી એક ચોપડો, મોબાઈલ ફોન અને અન્ય સામાન કબ્જે કર્યો હતો. આ ચોપડામાં આઈપીએલ મેચ દરમિયાન લેવામાં આવેલા સેસન અને ભાવના સોદાઓનો હિસાબ નોંધાયેલો હોવાનું જાણવા મળ્યું છે.
આ ઉપરાંત, ગ્રાહકો તરીકે રાજકોટના દેવાંગ ડાભી અને ‘જે.ડી.’ નામના વ્યક્તિઓનો ઉલ્લેખ મળ્યો છે. આ તમામ લોકો ઓનલાઈન આઈડી દ્વારા જુગાર રમતા હોવાનું સામે આવ્યું છે.
દર્પણ બારસીયાએ પોલીસને જણાવ્યું કે, ઓફિસ તેણે ભાડે લીધી હતી અને બંને મળીને સટ્ટાબાજી ચલાવતા હતા. નફામાં પણ બંને સરખા ભાગીદાર હતા. આથી સ્પષ્ટ થાય છે કે, આ ગેરકાયદેસર ધંધો સુવ્યવસ્થિત રીતે સંચાલિત કરવામાં આવતો હતો. ક્રાઈમ બ્રાન્ચે હાલ જયદીપ જાદવ અને દર્પણ બારસીયાની ધરપકડ કરી અંદાજે રૂ.65 હજારનો મુદામાલ કબ્જે કર્યો છે. જ્યારે આ કેસમાં સંડોવાયેલા વત્સલ શીંગાળા, દેવાંગ ડાભી, જે.ડી. અને વિજય ઉર્ફે વી.એમ.ને વોન્ટેડ જાહેર કરી તેમની શોધખોળ શરૂ કરવામાં આવી છે.
આ સમગ્ર મામલામાં સૌથી વધુ ચર્ચાનો વિષય એ બન્યો છે કે, માસ્ટર આઈડી પૂરી પાડનાર વત્સલ શીંગાળાના પિતા પરેશ શીંગાળા રાજકોટ મહાનગરપાલિકાની ચૂંટણીમાં આમ આદમી પાર્ટી તરફથી વોર્ડ નં.7ના ઉમેદવાર છે.
આ ખુલાસા બાદ રાજકીય વર્તુળોમાં હલચલ મચી ગઈ છે અને વિરોધ પક્ષો દ્વારા આ મુદ્દે સવાલો ઉઠાવવામાં આવી રહ્યા છે. આ ઘટનાએ સટ્ટાબાજી અને રાજકીય સંબંધોને લઈને અનેક પ્રશ્નો ઉભા કર્યા છે. ક્રાઈમ બ્રાન્ચ દ્વારા હાલ આ સમગ્ર નેટવર્કની ઊંડાણપૂર્વક તપાસ કરવામાં આવી રહી છે. ઓનલાઈન સટ્ટાબાજીના આ રેકેટમાં અન્ય કેટલા લોકો સંડોવાયેલા છે અને તેની વ્યાપકતા કેટલી છે તે જાણવા માટે ટેક્નિકલ એનાલિસિસ પણ હાથ ધરવામાં આવી રહી છે. પોલીસ સૂત્રોના જણાવ્યા મુજબ, આ કેસમાં વધુ ધરપકડ થવાની સંભાવના છે અને આગામી દિવસોમાં આ કૌભાંડના વધુ ચોંકાવનારા ખુલાસા થઈ શકે છે.
