મેક્સિકોના બોગસ સિક્કા લગાવીને U.Sમાં ઘૂષણખોરી કરતા 150 ગુજરાતીઓ ઝડપાયા

• પેસેન્જરોને ડિપોર્ટ કરાશે ત્યારે નિવેદન લઈ એજન્ટો વિરૂદ્ધ ગુનો નોંધાશે
• અમેરિકામાં ગેરકાયદે ઘૂસણખોરી કરાવતા કબૂતરબાજોનો પર્દાફાશ
  
• સાત દિવસ અગાઉ ડિટેઈન થયેલા પેસેન્જરોના પાસપોર્ટ પર મેક્સિકોના ખોટા સ્ટેમ્પ માર્યાનો ઘટસ્ફોટ થયો છે
  

અમેરિકામાં ગેરકાયદે ઘૂસણખોરી કરતા ભૂતકાળમાં અનેક ગુજરાતીઓ ઝડપાઈ ચુકયા છે ત્યારે ફરી એક વાર 150 ગુજરાતી પેસેન્જરો પાસપોર્ટ પર મેકસિકોના નકસી સ્ટેમ્પ મારીને યુ.એસમાં ઘુસણખોરી કરતા ઝડપાઈ ગયા છે.

સાત દિવસ અગાઉ ડિટેઈન થયેલા પેસેન્જરોના પાસપોર્ટ પર મેક્સિકોના ખોટા સ્ટેમ્પ માર્યાનો ઘટસ્ફોટ થયો છે. આ સમગ્ર ઘટનાને પગલે ગુજરાત સીઆઈડી ક્રાઈમ પણ સક્રીય થઈ છે. દિલ્હી એમ્બેસી પાસેથી વિગત લઈ પેસેન્જરો ડિપોર્ટ થશે ત્યારે તેઓના નિવેદન લઈ એજન્ટો સામે ગુનો નોંધાશે તેમ સીઆઈડી ક્રાઈમના અધિકારીઓ જણાવી રહ્યા છે. ઉત્તર ગુજરાતના 150 જેટલા યુવાનો એક મહિના પહેલા અમેરિકા જવા માટે નિકળ્યા હતા. યુરોપથી તેઓ ચાર્ટડ પ્લેનમા લેટિન અમેરિકાના કોઈ દેશમાં એજન્ટો મારફતે ઉતર્યા હોવાનું સૂત્રોએ જણાવ્યું હતું. આ યુવકો ત્યાંથી ચાલતા-ચાલતા મેક્સિકોમાં પ્રવેશ્યા બાદ એજન્ટોએ તેઓના પાસપોર્ટ પર મેક્સિકોના નકલી સ્ટેમ્પ મારી દીધા હતા. મેક્સીકો બોર્ડર ક્રોસ કરી આ તમામ પેસન્જરો અમેરિકામાં પહોંચ્યા ત્યાં પોલીસે તમામ ડિટેઈન કરી લીધા હતા. જો કે, અમેરિકા બોર્ડર પોલીસ દ્વારા હવે અમેરિકામાં રાજ્યાશ્રાય વિઝા મેળવવા ગયેલા પેસેન્જરો સામે શું કાર્યવાહી કરવામાં આવે છે તે આવનાર દિવસોમાં સ્પષ્ટ થશે. આ પેસેન્જરોને ડિપોર્ટ કરાશે કે નહી તે અંગે હજુ અસ્પષ્ટતા છે. ઉલ્લેખનીય છે કે, અગાઉ ફ્રાંસના વિટ્રી એરપોર્ટ પર શંકાસ્પદ પેસેન્જરો હોવાની માહિતી આધારે ફ્રાંસની સુરક્ષા એજન્સીઓએ ફલાઈટ રોકી તપાસ શરૂ કરી હતી. આ ફલાઈટમાં ગેરકાયદે અમેરિકા જવાનો પ્રયાસ કરતા ભારતીય પેસેન્જરો ઝડપાયા હતા. આ પેસેન્જરોને ડિપોર્ટ કરવામાં આવ્યા બાદ સીઆઈડી ક્રાઈમે ગુજરાતી પેસેન્જરોના નિવેદનો લઈને કિરણ પટેલ સહિતના એજન્ટો સામે ગુનો દાખલ કરી તપાસ હાથ ધરી હતી.આ કેસમાં હજુ પણ અનેક એજન્ટો ફરાર હોવાની વિગતો મળી છે.

મેકિસકોના નકલી સ્ટેમ્પ મારી બોર્ડર ક્રોસ કરાવવાનો જોખમી ખેલ

પેસેન્જરોએ અસાયલમ (રાજયાશ્રાય) મેળવવા આવ્યાનું જણાવ્યું હતું. અમેરિકાના કાયદા મુજબ આવા લોકોને રાજયાશ્રાય મળે પણ પાસપોર્ટ પર લાગેલા મેક્સિકોના નકલી સ્ટેમ્પે તેઓની મુશ્કેલી વધારી છે. મેક્સિકો પહોંચેલા તમામ યુવકોને દિલ્હીના એજન્ટએ તેઓના પાસપોર્ટ પર મેક્સિકોનો નકલી સ્ટેમ્પ મારી બોર્ડર ક્રોસ કરાવતા પહેલા રૂપિયા લઈ લીધા હતા. બોર્ડર ક્રોસ કરાવ્યા બાદ એજન્ટની જવાબદારી પુરી થઈ જતી હોય છે.