- ફિટનેસ સેન્ટર્સથી પારદર્શિતાના દાવા એકદમ પોકળ પુરવાર થયા
- ભ્રષ્ટાચાર અટકાવવાના ઈરાદે મંજૂરી આપેલી હવે નોટિસ પાઠવી ખુલાસો માગ્યો
- ખાનગી સેન્ટરો માટે ડેટા સાચવણીનો સમય નક્કી નથી!
રાજ્યની વિવિધ આરટીઓ કચેરીઓમાં વાહનના ફિટનેસની કામગીરીમાં થતાં ભ્રષ્ટાચારને અટકાવવા ખાનગી ફિટનેસ સેન્ટરોને પણ કામગીરી સોંપાઇ છે. દેશના આઠ રાજ્યોમાં ખાનગી 36 ફિટનેસ સેન્ટરો મંજૂર કરાયા છે. જેમાં ગુજરાતમાં 25 સેન્ટરો છે. રાજ્યના 25 ફિટનેસ સેન્ટરોમાં કામગીરી યોગ્ય રીતે થતી નહીં હોવાનું બહાર આવતા ખાનગી વાહનવ્યવહાર વિભાગ દ્વારા અલગ અલગ ટીમો બનાવી તપાસ કરાઇ હતી. તપાસમાં 16 વાહન ફિટનેસ સેન્ટરોમાં ગેરરિતી બહાર આવતા નોટીસ અપાઈ છે. નોટસીના ખુલાસા સાથે આગામી 28મી ડિસે.ના રોજ ગાંધીનગર ખાતે રુબરુ બોલાવાયા છે. વાહનના ખાનગી ફિટનેસ સેન્ટરોથી પારદર્શીતાનો દાવો કનાર ઉચ્ચઅધિકારીઓ હાલ જવાબ આપ આપી શક્તા નથી.
દેશમાં મંજૂર કરાયેલા કુલ સેન્ટરોમાંથી 70 ટકા વાહન ફિટનેસના સેન્ટરો ગુજરાતમાં છે. હાલ ખાનગી સેન્ટરો અને આરટીઓમાં વાહન ફિટનેસના વિકલ્પ ખુલ્લા છે. પરંતુ ભવિષ્યમાં ખાનગી ફિટનેસ સેન્ટરોને સંપૂર્ણ જવાબદારી સોંપાઇ શકે છે. કોમર્શીયલ વાહનોમાં એક અથવા બે વર્ષે અને ખાનગી વાહનોમાં 15 વર્ષે ફિટનેસ સર્ટિફિકેટ મેળવવું પડે છે. આરટીઓમાં વાહન ફિટનેસની કામગીરીમાં વાહનના હેડલાઇટ, બ્રેક લાઇટ, બ્રેક, કલચ, કાચ સહિત ટેક્સ, પરમીટ અને આરસીબૂક સહિતના પુરાવાની ચકાસણી થાય છે. ફિટનેસ બાદ વાહનના 6 ફોટા એમ વાહન સોફટેવરમાં અપલોડ કરાય છે. જે રેકર્ડમાં જોઇ શકાય છે. આમ છતાં સમયાંતરે ગેરરિતીના આક્ષેપ થતાં હતાં. બીજીતરફ કેન્દ્રના આદેશ બાદ ખાનગી કંપનીઓને વાહન ફિટનેસની જવાબદારી સોંપાઇ છે. પરંતુ ભ્રષ્ટાચારમાં કોઇ ફરક પડયો નહીં હોવાનું મનાય છે.
વાહનવ્યવહાર વિભાગના સોફટવેરમાં ખાનગી ફિટનેસ સેન્ટરોના ડેટાની પૂરતી માહિતી જોવા મળતી નહતી. જેના પગલે વિભાગ દ્વારા મંજૂર કરાયેલા 25 ફિટનેસ સેન્ટરોમાં રુબરુ તપાસ માટે અલગ અલગ ટીમ મોકલાઇ હતી. તપાસ ટીમ સમક્ષ કેટલીક ચોંકવનારી બાબત બહાર આવી હતી. જેમાં ખાનગી ફિટનેસ સેન્ટરોમાં મશીનથી ચકાસણી વગર કેટલાક વાહનોમાં મેન્યુઅલ ચકાસણી કરાઇ છે. વાહન સેન્ટર પર આવ્યા વગર ફિટનેસ સર્ટિફિકેટ અપાયા છે, કેટલાક વાહનના ફોટા ક્રોપ્ટ કરીને મુકાયા છે, મેન્યુઅલી વેલીડીટી ફીટ કરાઇ છે, ફીની વિગતો પણ દેખાતી નથી, નેશનલ પરમીટની ચકાસણી કરાઇ નથી, વાહનની સિટીંગ કેપેસિટી, સર્વિસ ટાઇપ, વાહનના ટેક્સ, પરમીટ અને આરસીબૂક સહિતના પુરાવાની ચકાસણી કરાઇ નહીં હોવાનું ધ્યાનમાં આવ્યું છે. આ સિવાય ઘણી ગેરરિતી બહાર આવતા 16 ફિટનેસ સેન્ટરોને નોટીસ અપાઇ છે.
ખાનગી સેન્ટરો માટે ડેટા સાચવણીનો સમય નક્કી નથી!
સરકારની ગાઇડલાઇન મુજબ વાહનવ્યવહાર વિભાગે ખાનગી ફિટનેસ સેન્ટરોને મંજુરી આપી દીધી છે. પરંતુ ફિટનેસ સેન્ટરોને ડેટા સાચવણી કઇ રીતે અને કેટલા સમય માટે કરવા, વાહનના સોફટેવરમાંથી ડેટા મેળવવા કે કઇ રીતે ડેટા પુશ કરવા સહિત અન્ય ટેકનિકલ બાબતે સૂચનાઓ આપેલી નથી. રિપોર્ટની ચોક્કસ પદ્ધતિ નથી. સંચાલકોના લાભાર્થે આવી નીતિ બનાવાયાની આરટીઓના ઘણાં ઇન્સ્પેકટરોમાં ચર્ચા છે.
