– કોર્પોરેટ ટેક્સ ઓગસ્ટમાં ૪૬૭% વધીને રૂ. ૬૨,૮૧૭ કરોડ અને પર્સનલ ઈન્કમ ટેક્સ વસૂલાત ૩૩૩% વધીને રૂ. ૧ લાખ કરોડ
– બજેટમાં એક્સાઇઝ હેઠળ રૂ. ૩.૪ લાખ કરોડની વસૂલાતનો અંદાજ
Updated: Oct 4th, 2023
અમદાવાદ : ઓગસ્ટ મહિનામાં ગયા વર્ષના સમાન સમયગાળાની સરખામણીએ કેન્દ્રીય આબકારી જકાત એટલેકે એક્સાઈઝ ડયૂટીની વસૂલાતમાં ૧૮ ટકાનો ઘટાડો નોંધાયો છે. એક તરફ રાજ્યોમાં ટેક્સ ડિવિઝન પહેલા ટેક્સ કલેક્શનમાં ૯૪ ટકાનો વધારો થયો છે અને સામે એક્સાઇઝ ડયૂટીમાં આ ઘટાડો નોંધાયો છે.
સેન્ટ્રલ એક્સાઇઝ ડયુટી કલેક્શન આ વર્ષે ઓગસ્ટમાં ઘટીને રૂ. ૨૩,૫૭૬ કરોડ થયું છે, જે ગયા વર્ષે ઓગસ્ટમાં રૂ. ૨૮,૮૧૬ કરોડ હતું. રસપ્રદ વાત એ છે કે માત્ર વાર્ષિક જ નહિ એક્સાઇઝની આવકમાં માત્ર ઘટાડો જ નથી થયો પણ તે ગયા મહિના કરતાં પણ ઓછો છે. જુલાઈમાં રૂ. ૨૪,૩૮૭ કરોડની સરખામણીએ ઓગસ્ટમાં કલેક્શન ૩.૩ ટકા ઘટયું છે. વાસ્તવમાં ઓગસ્ટ મહિનામાં આ સેક્શન હેઠળ કરની વસૂલાત ચાલુ નાણાકીય વર્ષમાં એપ્રિલ બાદ સૌથી નીચી રહી છે.
બીજી તરફ કંટ્રોલર જનરલ ઓફ એકાઉન્ટ્સના ડેટા અનુસાર આ મહિનામાં કુલ ટેક્સ કલેક્શન વધીને રૂ. ૨.૯ લાખ કરોડ થયું છે, જે ઓગસ્ટ ૨૦૨૨-૨૩માં રૂ. ૧.૫ લાખ કરોડ હતું.
આ સાથે ઓગસ્ટમાં કુલ ટેક્સ કલેક્શન બમણાથી વધુ વધીને રૂ. ૨.૭ લાખ કરોડ થયું હતું, જે એક વર્ષ અગાઉ રૂ. ૧.૨૨ લાખ કરોડ હતું. કોર્પોરેટ અને પર્સનલ આવકવેરામાં જંગી વધારાને કારણે આ વધારો નોંધાયો છે. કોર્પોરેટ ટેક્સ ઓગસ્ટમાં ૪૬૭ ટકા વધીને રૂ. ૬૨,૮૧૭ કરોડ થયો છે, જે ગયા વર્ષના સમાન મહિનામાં રૂ. ૧૧,૧૫૯ કરોડ હતો. ચાલુ નાણાકીય વર્ષના પ્રથમ ત્રણ મહિનામાં કોર્પોરેટ ટેક્સમાં ઘટાડો થયો હતો, પરંતુ ચોથા અને પાંચમા મહિનામાં તેમાં વધારો થયો છે.
ઓગસ્ટમાં પર્સનલ ઈન્કમ ટેક્સમાં ૩૩૩ ટકાનો વધારો થઈને રૂ. ૧ લાખ કરોડથી વધુ થયો છે, જે એક વર્ષ અગાઉના સમાન સમયગાળામાં રૂ. ૨૩,૮૧૩ કરોડ હતો. ચાલુ નાણાકીય વર્ષના પ્રથમ પાંચ મહિનામાં એક્સાઇઝ ડયૂટીને બાદ કરતાં કુલ કર વસૂલાત ૨૦.૧૬ ટકા વધીને રૂ. ૧૦.૯ લાખ કરોડ થઈ છે, જે ગયા વર્ષના સમાન સમયગાળામાં રૂ. ૯.૧ લાખ કરોડ હતી.
