- ઇઝરાયલ હમાસ વચ્ચે 3 મહિનાથી ચાલી રહ્યું છે યુદ્ધ
- એક સાથે ત્રણ મોરચે લડી રહયું છે ઇઝરાયલ
- માત્ર ગાઝા પટ્ટીમાં હુમલામાં 20 હજારથી વધુ લોકોના મોત
ઈઝરાયલ અને હમાસ વચ્ચે ચાલી રહેલ યુદ્ધને ત્રણ મહિના થવા આવ્યા છે. જો કે આ યુદ્ધ અટકવાનું નામ નથી લઈ રહ્યું. આ યુદ્ધના કારણે માત્ર ગાઝામાં અત્યાર સુધીમાં 22 હજારથી વધુ લોકોના મોત થયા છે. ગાઝાના સ્વાસ્થ્ય મંત્રાલયના જણાવ્યા અનુસાર, ગાઝામાં છેલ્લા 24 કલાકમાં ઈઝરાયેલના સૈન્ય હુમલામાં 122 પેલેસ્ટિનિયન માર્યા ગયા છે અને 256 અન્ય ઘાયલ થયા છે.
હમાસ સંચાલિત ગાઝામાં આરોગ્ય મંત્રાલયે શનિવારે જણાવ્યું હતું કે 7 ઓક્ટોબરથી ઇઝરાયેલ સાથે યુદ્ધ શરૂ થયું ત્યારથી ઘેરાયેલા પેલેસ્ટિનિયન વિસ્તારમાં ઓછામાં ઓછા 22,722 લોકોના મોત થયા છે. જ્યારે, ગાઝા પટ્ટીમાં લગભગ 3 મહિનાથી ચાલી રહેલા યુદ્ધમાં કુલ 58,166 લોકો ઘાયલ થયા છે. આ સાથે 7,000થી વધુ પેલેસ્ટાઈન હજુ પણ લાપતા છે.
ઇઝરાયલે ગાઝામાં અભિયાન તેજ કર્યું
મીડિયા રિપોર્ટ મુજબ, શનિવારે 6 જાન્યુઆરીના રોજ ઇઝરાયેલી સેનાએ દાવો કર્યો હતો કે તેને ગાઝા શહેરમાં કાસમ બ્રિગેડના હથિયારો અને લશ્કરી જેકેટ્સ મળ્યા છે. ટ્વિટર પર એક પોસ્ટમાં, IDFએ કહ્યું કે જેકેટ્સ યુએન શરણાર્થી એજન્સીની બેગમાં છુપાયેલા મળી આવ્યા હતા. અહેવાલો અનુસાર, ઇઝરાયલી દળો મધ્ય ગાઝામાં જાવીદામાં ટેન્ક, સશસ્ત્ર વાહનો અને હુમલાના ડ્રોન વડે ઓપરેશનને વધુ તીવ્ર બનાવી રહ્યા છે. ખાન યુનિસમાં એક ઘરને નિશાન બનાવીને ઇઝરાયેલના હવાઈ હુમલામાં ઓછામાં ઓછા 18 પેલેસ્ટિનિયન માર્યા ગયા છે.
હિઝબુલ્લાહ પણ સતત કરી રહ્યું છે ઇઝરાયલ પર હુમલા
જણાવી દઈએ કે, ઈઝરાયેલ હાલમાં ઘણા મોરચે યુદ્ધ લડી રહ્યું છે. હમાસની સાથે લેબનીઝ સંગઠન હિઝબુલ્લાહ પણ ઈઝરાયેલ પર સતત હુમલાઓ કરી રહ્યું છે. અહેવાલો અનુસાર, બેરૂતમાં સાલેહ અલ-અરૌરીની હત્યાનો બદલો લેવા માટે, હિઝબુલ્લાએ ઇઝરાયેલના એરપોર્ટ પર 62 રોકેટ છોડ્યા હતા. જો કે, ઇઝરાયેલના સંરક્ષણ દળો દ્વારા આની પુષ્ટિ કરવામાં આવી નથી. આ દરમિયાન અમેરિકાના વિદેશ મંત્રી એન્ટની બ્લિંકન તુર્કી પહોંચી ગયા છે. અહેવાલો અનુસાર, આવતા અઠવાડિયે તેઓ ઇઝરાયેલ અને કબજા હેઠળના પશ્ચિમ કાંઠે જતા પહેલા મધ્ય પૂર્વના ઘણા અન્ય દેશોની પણ મુલાકાત લેશે.
