- રિયાધમાં પાંચ દિવસીય World Defense Show’નું આયોજન
- ડિફેન્સ સેક્ટરમાં ઉપયોગમાં લેવાતી લેટેસ્ટ ટેક્નોલોજીનું પ્રદર્શન
- વર્લ્ડ ડિફેન્સ શોમાં રક્ષા ક્ષેત્રમાં ભારતીય મહિલાઓની વધતી ભૂમિકાનું પ્રમાણ
સાઉદી અરેબિયાના રિયાધમાં પાંચ દિવસીય World Defence Show’નું આયોજન કરવામાં આવ્યું છે. જેમાં ભારતની દીકરીઓ પોતાનો કૌશલ બતાવી રહી છે. સ્ક્વોડ્રન લીડર ભાવના કાંત, કર્નલ પોનુંગ ડોમિંગ અને લેફ્ટનન્ટ કમાન્ડર અન્નુ પ્રકાશ તેવા સૈન્ય અધિકારીઓમાં સામેલ છે જેઓ આ ભવ્ય કાર્યક્રમમાં દેશનું પ્રતિનિધિત્વ કરી રહી છે.
‘World Defence Show’નું ઉદ્ઘાટન 4 જાન્યુઆરીએ થયું હતું. જેમાં ડિફેન્સ સેક્ટરમાં ઉપયોગમાં લેવાતી લેટેસ્ટ ટેક્નોલોજીનું પ્રદર્શન કરવામાં આવી રહ્યું છે. ડિફેન્સ શોમાં ઘણી ડિફેન્સ કંપનીઓ ભાગ લઈ રહી છે. તેથી, આ ઇવેન્ટ આંતરરાષ્ટ્રીય સહકાર માટે એક મહત્વપૂર્ણ પ્લેટફોર્મ તરીકે સેવા આપી રહી છે.તો, રક્ષા મંત્રાલયના એક નિવેદનમાં કહેવામાં આવ્યું છે કે વર્લ્ડ ડિફેન્સ શોમાં આ ત્રણ અસાધારણ અધિકારીઓની ભાગીદારી રક્ષા ક્ષેત્રમાં ભારતીય મહિલાઓની વધતી ભૂમિકાનું પ્રમાણ છે.
એક દિવસ અગાઉ, ફાઇટર પાઇલટ ભાવના કાંતે પેનલિસ્ટ તરીકે એક સેમિનારમાં ભાગ લીધો હતો. આ સેમિનારની થીમ ‘રક્ષામાં ઇન્ટરનેશનલ વુમન- ઇન્ક્લુઝિવ ફ્યુચરમાં રોકાણ’ હતી. સેમિનારનું આયોજન અમેરિકામાં સાઉદી અરેબિયાના રાજદૂત પ્રિન્સેસ રીમા બિંત બંદર અલ-સાઉદે કર્યું હતું. સ્ક્વોડ્રન લીડર ભાવના કાંત 2021 પ્રજાસત્તાક દિવસની પરેડમાં ભાગ લેનાર દેશની પ્રથમ મહિલા ફાઇટર પાઇલટ છે.
એ જ રીતે, કર્નલ ડોમિંગ પોનુંગ ઉત્તરીય ક્ષેત્રમાં પંદર હજાર ફૂટથી વધુની ઊંચાઈએ બોર્ડર ટાસ્ક ફોર્સને કમાન્ડ કરનાર પ્રથમ મહિલા અધિકારી છે. તેમણે વીસ વર્ષથી વધુ સેવામાં ઘણી વખત પ્રથમ સ્થાન પ્રાપ્ત કર્યું છે. એન્જિનિયરિંગ ઓફિસર હોવાના કારણે તે ઘણા પડકારજનક કાર્યોમાં મોખરે રહી છે.
આ ઉપરાંત નેવીના લેફ્ટનન્ટ કમાન્ડર અન્નુ પ્રકાશ પણ આ ડિફેન્સ શોમાં ભારતનું પ્રતિનિધિત્વ કરી રહ્યા છે. તેમણે દરિયાઈ સુરક્ષા અને કામગીરીમાં તેમની કુશળતા દર્શાવી હતી. સંરક્ષણ મંત્રાલયે એક નિવેદનમાં જણાવ્યું હતું કે તેઓએ ભારતના વિશાળ દરિયાકાંઠાની સુરક્ષા અને પ્રાદેશિક સ્થિરતા સુનિશ્ચિત કરવામાં મહિલાઓની ભૂમિકા પર પ્રકાશ પાડ્યો.
