ઓસ્ટ્રેલિયા-ઇંગ્લેન્ડ વચ્ચે આજે 'મિની એશિઝ' મુકાબલો

• ઓસ્ટ્રેલિયા ઇંગ્લેન્ડને વર્લ્ડ કપમાંથી નોકઆઉટ કરવાના ઇરાદા સાથે રમશે
• ઓસ્ટ્રેલિયાએ માર્શ અને મેક્સવેલના વિકલ્પ શોધવા પડશે
  
• ઇંગ્લેન્ડના બોલર્સે વધારે શિસ્તબદ્ધ બોલિંગ કરવી પડશે
  

ઓસ્ટ્રેલિયા અને ઇંગ્લેન્ડ માટે વર્તમાન વર્લ્ડ કપમાં સ્થિતિ એકદમ અલગ છે. એક ટીમ સેમિફાઇનલમાં પહોંચવા માટે મક્કમતાથી આગળ વધી રહી છે ત્યારે 2019ની ચેમ્પિયન ઇંગ્લેન્ડની ટીમ છેલ્લેથી બીજા ક્રમે છે. બંને ટીમ વચ્ચે વિશ્વના સૌથી મોટા નરેન્દ્ર મોદી સ્ટેડિયમ ખાતે ‘મિની એશિઝ’ સમાન મુકાબલો રમાશે. ઓસ્ટ્રેલિયન ટીમ આઉટ ઓફ ફોર્મ રહેલી ડિફેન્ડિંગ ચેમ્પિયન ઇંગ્લેન્ડને વર્લ્ડ કપમાંથી ‘નોકઆઉટ’ કરવાના ટાર્ગેટ સાથે મેદાનમાં ઊતરશે. પાંચ વખતની ચેમ્પિયન ઓસ્ટ્રેલિયા પોતાની બેટિંગ વડે સતત ચાર વિજય મેળવીને ખરાબ અભિયાનને ફરીથી પાટા ઉપર લાવવામાં સફળ રહી છે. તે આઠ પોઇન્ટ સાથે ત્રીજા ક્રમે છે. આ મુકાબલો બપોરે 2:00 વાગ્યાથી રમાશે.

બેટિંગની નિષ્ફળતાના કારણે ઇંગ્લેન્ડને ચાર મેચમાં પરાજયનો સામનો કરવો પડયો છે. ઇંગ્લિશ ટીમ છેલ્લી ત્રણ મેચમાં 170 કે તેથી ઓછા સ્કોરે ઓલઆઉટ થઈ ગઈ હતી. અમદાવાદમાં રમાનારી મેચ પહેલાં બંને ટીમો અલગ અલગ પ્રકારની સમસ્યાનો સામનો કરી રહી છે. ઓસ્ટ્રેલિયાએ પોતાના બે મહત્ત્વપૂર્ણ ખેલાડી મિચેલ માર્શ તથા ગ્લેન મેક્સવેલના વિકલ્પ શોધવા પડશે. માર્શ વ્યક્તિગત કારણોસર વતન પરત ફર્યો છે અને તેનું પરત ફરવું અનિશ્ચિત છે. મેક્સવેલને ગોલ્ફ કાર્ટમાંથી પડી જવાના કારણે માથામાં ઈજા થઈ છે. બંનેની ગેરહાજરીમાં કેમરુન ગ્રીન અને સ્ટોનિસને રમાડવામાં આવે તેવી સંભાવના છે.

વિજય મેળવવા ઇંગ્લેન્ડ તમામ વિકલ્પ વિચારશે

ડિફેન્ડિંગ ચેમ્પિયન ઇંગ્લેન્ડની ટીમ ન્યૂઝીલેન્ડ સામે વર્લ્ડ કપનો ઓપનિંગ મુકાબલો અમદાવાદમાં જ હારી ગઈ હતી. વિજયપથ ઉપર પરત ફરવા માટે ઇંગ્લેન્ડ પોતાના ઉપલબ્ધ તમામ વિકલ્પને અજમાવવાનો પ્રયાસ કરશે. ઓસ્ટ્રેલિયા સામેની મેચમાં તેની પ્લેઇંગ ઇલેવનમાં ફેરફાર થાય તેવી પૂરી સંભાવના છે. હેરી બ્રૂક ટીમમાં પાછો ફરે તેવા સંકેત મળ્યા છે. ઈજાગ્રસ્ત રિસ ટોપ્લેના સ્થાને બ્રાઇડન કાર્સને પણ રમાડવામાં આવી શકે છે. 2025ની ચેમ્પિયન્સ ટ્રોફી માટે સીધું ક્વોલિફાય કરવા માટે પોતાની આશાઓને જીવંત રાખવા માટે ઇંગ્લેન્ડે પોતાનું સર્વશ્રોષ્ઠ પ્રદર્શન કરવું પડશે. વિશ્વ કપની ટોચની સાત ટીમો જ પાકિસ્તાનમાં રમાનારી 50 ઓવર્સની ટૂર્નામેન્ટ માટે ક્વોલિફાય કરી શકે તેમ છે.

ઓસ્ટ્રેલિયા સામે વર્લ્ડ કપમાં ઇંગ્લેન્ડનો રેકોર્ડ 6-3નો છે

બંને ટીમો વચ્ચેની મેચોનો ઇતિહાસ જોઈએ તો ઇંગ્લેન્ડે વન-ડેમાં ઓસ્ટ્રેલિયા સામેની કુલ 155 મેચમાં 87 મેચ ગુમાવી છે. વર્લ્ડ કપમાં તે 3-6ના સ્કોરથી પાછળ છે પરંતુ ઇંગ્લેન્ડ વળતો પ્રહાર કરવા માટે પણ જાણીતી છે. ચાલુ વર્ષની એશિઝ શ્રેણી 2-2થી સરભર રહી હતી. ઓસ્ટ્રેલિયા સતત ત્રણ વખત 350 પ્લસનો સ્કોર નોંધાવી ચૂક્યું છે અને કાંગારુ ટીમ વચ્ચે ટૂર્નામેન્ટમાં અત્યાર સુધી પાંચ સદી નોંધાયેલી છે જેમાં બે વોર્નરના નામે છે. ઇંગ્લેન્ડ તરફથી માત્ર એક સદી નોંધાઈ છે. વર્લ્ડ કપ બાદ ક્રિકેટને અલવિદા કરનાર ઇંગ્લેન્ડનો ડેવિડ વિલી પણ છેલ્લી તકોનો શાનદાર ઉપયોગ કરવાના લક્ષ્યાંક સાથે મેદાનમાં ઊતરશે. માર્ક વૂડ, ક્રિસ વોકિસ તથા સ્પિનર આદિલ રાશિદે વધારે જવાબદારીથી બોલિંગ કરવી પડશે.