- યૂટયૂબ ચેનલ સબસ્ક્રાઈબ કરાવી ટાસ્કના નામે કૌભાંડ આચર્યું
- CID સાઇબર સેલે 3 બેંક ખાતાની તપાસ કરતા ખુલાસો થયો
- ફરિયાદમાં ભોગ બનનાર સાથે 1.92 લાખની છેતરપિંડી
યૂ-ટયૂબ ચેનલ સબસ્ક્રાઈબ કરાવી ટાસ્ક બેઝડ વર્ક આપવાના નામે લોકો સાથે છેતરપિંડી આચરનાર ટોળકીના મુખ્ય સૂત્રધાર નિરવ ધાનકના જુદા જુદા ત્રણ બેંક એકાઉન્ટોમાં 390 કરોડની હેરાફેરી થયાનો ઘટસ્ફોટ સીઆઈડી ક્રાઈમ સાઇબર સેલની તપાસમાં થયો છે. માર્ચ, 2023ના રોજ સીઆઈડી સાઇબર સેલ પાસે આવેલી ફરિયાદમાં ભોગ બનનાર સાથે 1.92 લાખની છેતરપિંડી થઈ હતી. આ રકમ જે એકાઉન્ટમાં ગઈ તે શ્રી એન્ટરપ્રાઈઝના એકાઉન્ટની તપાસ કરતા પોલીસની ટીમે નિરવ ધાનક સુધી પહોંચી હતી. નિરવની ધરપકડ બાદ કોર્ટએ તેણે પાંચ દિવસના રવિવાર સુધીના રિમાન્ડ પર સોંપવાનો હુકમ કર્યો હતો.
સાઇબર સેલે આ મામલે તપાસ શરૂ કરતા શ્રી એન્ટરપ્રાઈઝનું એકાઉન્ટ મળ્યું જેમાં 2023ના છ માસના ગાળામાં 13.60 કરોડ જુદા જુદા લોકો દ્વારા જમા થયેલાનું અને તે એકાઉન્ટમાંથી 11.69 કરોડની રકમ જુદા જુદા બેનીફિશયરી એકાઉન્ટમાં ટ્રાન્સફર થયા હતા. આ એકાઉન્ટની તપાસમાં પોલીસે સુજલ બાબુભાઈ પટેલની ધરપકડ કરતા તેણે કબૂલાત કરી કે, પોતે શ્રી એન્ટરપ્રાઈઝના પ્રોપરાઈટર રાહુલ ઠાકોર અને સંજય પટણીના નામનું બોગસ ખાતું ખોલાવી તેમાં ખોટી સહીઓ કરી હતી. આ રીતે પોતાના સાગરિતો સાથે મળી સમગ્ર કૌભાંડ આચર્યું હતું. જેમાં સુજલ સાથે કમલ ઉદેપુર, નિરવ ધાનક અને બિશ્વાસ ગારમેન્ટસ એન્ડ ટ્રેડિંગ નામની સાઉથ દિલ્હીમાં આવેલી પેઢીનો સમાવેશ થતો હતો.
સાઇબર સેલની ટીમે આ મામલે રાજકોટના નિરવ પુલીનભાઈ ધાનકની ધરપકડ કરી પાંચ દિવસના રિમાન્ડ લીધા હતા. સાઇબર સેલની તપાસમાં ખુલેલી વિગત મુજબ આરોપી નિરવના એક્સીસ બેંકના ખાતામાં એપ્રિલ, 2022થી એપ્રિલ, 2023ના સમયગાળામાં 120 કરોડ જુદા-જુદા લોકો દ્વારા જમા થયા બાદ તેમાંથી 119.72 કરોડ અલગ અલગ બેનિફિશયરી ખાતામાં ગયા હતા. આ જ રીતે આરોપીના આઈડીબીઆઈ બેંક ખાતામાં સપ્ટેમ્બર, 2022થી એપ્રિલ, 2023ના સમયગાળા દરમિયાન 266.32 કરોડ જુદા-જુદા લોકો દ્વારા જમા કરાવવામાં આવ્યા અને તેમાંથી 266.32 કરોડની રકમ અલગ અલગ બેનિફિશયરી ખાતામાં ગયા હતા. આરોપીનું ત્રીજું બેંક એકાઉન્ટ રિધન એન્ટરપ્રાઈઝના નામે કોટક બેંકમાં હતું. આ એકાઉન્ટમાં જાન્યુ, 2023થી માર્ચ, 2023 દરમિયાન 4.24 કરોડ જુદા જુદા લોકો દ્વારા જમા કરાવવામાં આવ્યા અને તેમાંથી 4.24 કરોડ અલગ અલગ બેનિફિશયરીના ખાતામાં ગયા હતા. પોલીસે નીરવ ધાનકની સઘન પૂછપરછ હાથ ધરીને અન્ય સંડોવાયેલા આરોપીઓ અંગે તપાસ હાથ ધરી છે.
ન્યૂડ વીડિયો રેકોર્ડ કરી બ્લેકમેલ કરીને પૈસા પડાવતી ટોળકીના સાગરીતને ઝડપી લેવાયો
સીઆઈડી સાઇબર સેલની ટીમે ન્યૂડ વીડિયો કોલ રેકોર્ડ કરી ભોગ બનનારને બ્લેકમેલ કરી પૈસા પડાવતી ટોળકીના સાગરિત લીયાકત હકમુદ્દીન (ઉં,39)ની ધરપકડ કરી હતી. આરોપી લીયાકત રાજસ્થાનના પહારી જિલ્લાના સાંવલેર ગામનો છે. આરોપીઓએ ફેસબૂક, ઈન્સ્ટાગ્રામ અને વોટ્સએપ પર યુવતીઓના નામના ફેક આઈડી બનાવી જુદા જૂદા લોકો સાથે ચેટ શરૂ કરી હતી. આ રીતે યુવતીના નામે ચેટ કર્યા બાદ ઉત્તેજક વાતો કરી ભોગ બનનારને વીડિયો કોલ પર કપડાં ઉતારવાનું જણાવતા અને તેનો કોલ રેકોર્ડ કરી તેને વાઈરલ કરવાની ધમકી આપી પૈસા પડાવતા હતા. આ રીતે કુલ 15 જેટલા લોકો પાસેથી આરોપીઓ ચાર લાખ રૂપિયા પડાવ્યા હતા.
