- પાકિસ્તામાં ફરી બોમ્બ વિસ્ફોટ
- મોંઘવારી અને બોમ્બ વિસ્ફોટ પાકિસ્તાનની ઓળખ સમાન
- એક તરફ ચૂંટણી બીજી તરફ વિસ્ફોટ
પાકિસ્તાનમાં સામાન્ય ચૂંટણીના એક દિવસ પહેલા બુધવારે બલૂચિસ્તાન પ્રાંતમાં ચૂંટણી કાર્યાલયોને નિશાન બનાવતા બે બોમ્બ વિસ્ફોટોમાં ઓછામાં ઓછા 40 લોકો માર્યા ગયા અને 30 અન્ય ઘાયલ થયા. પ્રથમ ઘટનામાં, પિશિન જિલ્લામાં અપક્ષ ઉમેદવાર અસફંદ્યાર ખાન કાકરના કાર્યાલયની બહાર પ્રચંડ વિસ્ફોટમાં 20 લોકો માર્યા ગયા અને 30 અન્ય ઘાયલ થયા.
એક કલાક કરતાં ઓછા સમય પછી, કિલા અબ્દુલ્લા વિસ્તારમાં જમીયત ઉલેમા ઇસ્લામ (JUI) ના ચૂંટણી કાર્યાલયની બહાર બીજો બોમ્બ વિસ્ફોટ થયો, જેમાં 10 લોકો માર્યા ગયા અને 22 અન્ય ઘાયલ થયા. બંને વિસ્ફોટોની જવાબદારી કોઈ જૂથ કે વ્યક્તિએ લીધી નથી. બલૂચિસ્તાનના પંજગુરના વરિષ્ઠ પોલીસ અધિકારી અબ્દુલ્લા ઝહરીએ જણાવ્યું હતું કે ઉમેદવાર અસફંદ્યાર ખાન કાકરના ચૂંટણી કાર્યાલયની બહાર ‘ટાઈમર’ વાળી બેગમાં બોમ્બ રાખવામાં આવ્યો હતો.
તેમણે કહ્યું, “કેટલાક ઘાયલોની હાલત નાજુક છે અને તેમને સારવાર માટે ક્વેટા લઈ જવામાં આવ્યા છે.” ઝાહરીએ કહ્યું, “આતંકવાદીઓ લોકોને મતદાન મથકો પર જતા રોકવા ઉમેદવારોને નિશાન બનાવી રહ્યા છે, પરંતુ ચૂંટણી ચાલી રહી છે. તે સમયસર થાય તે સુનિશ્ચિત કરવા માટે સુરક્ષા કર્મચારીઓની સંખ્યામાં વધારો કરવામાં આવી રહ્યો છે.” સ્થાનિક મીડિયા અહેવાલો અનુસાર, કિલા અબ્દુલ્લા વિસ્તારમાં JUI ઉમેદવારના ચૂંટણી કાર્યાલયમાં થયેલા વિસ્ફોટથી ભારે નુકસાન થયું છે.
પાકિસ્તાનના ચૂંટણી પંચ (ECP) એ બે વિસ્ફોટોની પુષ્ટિ કરી અને કહ્યું કે ગુરુવારે યોજાનારી ચૂંટણી પહેલા પ્રાંતમાં સુરક્ષા વધારી દેવામાં આવી છે. ECPના પ્રવક્તાએ જણાવ્યું હતું કે, “આ આતંકવાદી હુમલાના ગુનેગારોને પકડવામાં આવશે અને તેમની સામે કડક કાર્યવાહી કરવામાં આવશે.” બલૂચિસ્તાનના ગૃહ પ્રધાન જાન અચકઝાઈએ હુમલાની નિંદા કરી અને કહ્યું કે ચૂંટણી નિર્ધારિત મુજબ યોજાશે. કાર્યવાહક ગૃહ પ્રધાન ગૌહર એજાઝે પિશિનમાં અપક્ષ ઉમેદવારના ચૂંટણી કાર્યાલયની બહાર થયેલા વિસ્ફોટની સખત નિંદા કરી છે.
પાકિસ્તાનમાં 8 ફેબ્રુઆરીએ યોજાનારી સામાન્ય ચૂંટણી પહેલા અફઘાનિસ્તાન અને ઈરાનની સરહદે આવેલા બલૂચિસ્તાનમાં હિંસા ચરમસીમા પર છે. મંગળવારે પ્રાંતના વિવિધ વિસ્તારોમાં સુરક્ષા ચોકીઓ, ચૂંટણી પ્રચાર કાર્યાલયો અને રેલીઓ પર 10 ગ્રેનેડ હુમલા કરવામાં આવ્યા હતા. રવિવારથી, પ્રાંતમાં આવા લગભગ 50 હુમલાઓ થયા છે અને સિબી શહેરમાં એક ઘટનામાં, હુમલાખોરોએ નેશનલ એસેમ્બલી માટે પાકિસ્તાન તહરીક-એ-ઈન્સાફના ઉમેદવારની ચૂંટણી રેલીને નિશાન બનાવી હતી, જેમાં ચાર લોકો માર્યા ગયા હતા અને છ અન્ય ઘાયલ થયા હતા.
