- અગાઉ ઈડીએ 60 કરોડની મિલકત જપ્ત કરી હતી
- આ કેસમાં કુલ 115 કરોડની મિલકતો જપ્ત
- બોગસ બિલિંગ કેસની તપાસમાં નામ બહાર આવતા ઈડીની કાર્યવાહી
એન્ફેર્સમેન્ટ ડિરેક્ટોરેટ (ED)એ સુરત સ્થિત મની લોન્ડરિંગ કેસના સંબંધમાં દુબઈ સ્થિત હવાલા ઓપરેટર પંકજ કપૂર, હીરા વેપારી વિજેન ગિરીશચંદ્ર ઝવેરી અને તેમના પરિવારના સભ્યોના નામની આશરે રૂ.55.17 કરોડની દસ સ્થાવર મિલકતો અસ્થાયીરૂપે જપ્ત કરી છે. સુરતના હવાલા ઓપરેટર અફરોઝ ફ્ટ્ટા દ્વારા આચરવામાં આવેલા બોગસ બિલીંગ કેસની ઈડી દ્વારા કરવામાં આવેલી તપાસમાં આ બહાર આવ્યું છે. ઉલ્લેખનીય છે કે, વર્ષ 2014માં સુરતના અફરોઝ ફટ્ટાએ રૂ.5,600 કરોડનું હવાલા રેકેટ આચર્યું હતું. જેની તપાસમાં મુંબઈના સોનાના વેપારીઓ સહિતના નામો બહાર આવ્યા હતા.આ પછી તપાસમાં નવું કૌભાંડ બહાર આવતા કુલ115 કરોડની મિલકતો ટાંચમાં લેવામાં આવી છે.
એન્ફેર્સમેન્ટ ડિરેક્ટોરેટ (ED)એ સુરતમાં ICIC બેંક દ્વારા સુરતમાં નોંધાવેલી ફરિયાદના આધારે તપાસ શરૂ કરી હતી, જેમાં એવો આરોપ મૂકવામાં આવ્યો હતો કે આર.એ. ડિસ્ટ્રીબ્યુટર્સ પ્રા. લિ. અને અન્ય આઠ કંપનીઓએ બનાવટી બિલ્સ ઑફ્ એન્ટ્રી (BoEs) સબમિટ કર્યા અને UAE-આધારિત ત્રણ અને હોંગકોંગ સ્થિત પંદર કંપનીઓને ભંડોળ મોકલ્યું હતું. તપાસમાં બહાર આવ્યું છે કે યુએઈ અને હોંગકોંગમાં પંકજ કપૂર અને વિજેન ગિરીશચંદ્ર ઝવેરી દ્વારા અનુક્રમે રૂ.58.14 કરોડ અને રૂ.2.81 કરોડની રકમ મળી હતી. બનાવટી BoEs અને દસ્તાવેજોના આધારે મુંબઈ સ્થિત હીરા વેપારી મદન લાલ જૈન અને અફરોઝ ફ્ટ્ટા દ્વારા નિયંત્રિત અને સંચાલિત સંસ્થાઓમાંથી ગુનાની રકમ વિદેશમાં મોકલવામાં આવી હતી.
EDએ એક નિવેદનમાં જણાવ્યું હતું કે પંકજ કપૂર, વિજેન ગિરીશચંદ્ર ઝવેરી અને તેમના પરિવારના સભ્યોની દસ સ્થાવર મિલકતોને પ્રિવેન્શન ઑફ્ મની લોન્ડરિંગ એક્ટ, 2002ની કલમ 5 હેઠળ ગુનાહિત પ્રવૃત્તિઓમાં સામેલ થવા બદલ અસ્થાયીરૂપે અટેચ કરવામાં આવી છે. આ કિસ્સામાં ઇડીએ અગાઉ જ રૂ.60 કરોડની મિલકતો જપ્ત કરી હતી. આ કેસમાં જોડાયેલ સ્થાવર અને જંગમ મિલકતોની કુલ કિંમત રૂ.115 કરોડ છે.
5,600 કરોડનું હવાલા રેકેટ 2014માં બહાર આવ્યું હતું
માર્ચ 2014માં આઈસીઆઈસીઆઈ બેંક લિમિટેડ દ્વારા આ મામલે સુરત પોલીસમાં થયેલી એફ્આઈઆરમાં આર.એ. ડિસ્ટ્રીબ્યુટર્સ પ્રાઈવેટ લિમિટેડ અને અન્ય સામે આરોપ લગાવતા કે કેટલીક કંપનીઓએ ગેરકાયદે આઉટવર્ડ રેમિટન્સ માટે નકલી બીલ ઓફ્ એન્ટ્રી સબમિટ કર્યા હતા. આ કેસની તપાસ ડિટેક્શન ઓફ્ ક્રાઈમ બ્રાન્ચ (DCB), સુરત દ્વારા કરવામાં આવી હતી, જેમાં અફરોઝ ફ્ટ્ટા સહિત અન્યો સામે કાર્યવાહી કરતા 5600 કરોડનું હવાલા રેકેટનો પર્દાફાશ થયો હતો. DCB તપાસના આધારે એન્ફેર્સમેન્ટ ડિરેક્ટોરેટ (ED)એ પ્રિવેન્શન ઓફ્ મની લોન્ડરિંગએક્ટ (PMLA), 2002 હેઠળ ફ્ટ્ટા સામે બીજો કેસ દાખલ કર્યો હતો.
