- સેલિબ્રેશન સિટી સેન્ટરના પાંચમા માળે છ નબીરા નશો કરીને ભાન ભૂલ્યા
- ગોળીબારના અવાજથી સ્થાનિકોમાં ફફડાટ, પોલીસે તમામને દબોચી જેલભેગા કર્યા
- પકડાવાની બીકે બે શખ્સ પાંચમા માળથી ચોથા માળ તરફ કૂદ્યા પણ ભાગવામાં નિષ્ફળ રહ્યા
બોપલના સેલિબ્રેશન સિટી સેન્ટરમાં પાંચમા માળે આવેલી ઓફિસમાં દારૂની મહેફિલ માણતા છ શખ્સોમાંથી નશામાં ચુર થયેલા જમીન દલાલે યુએસ મેઇડ પિસ્ટલ અને તુર્કીની સ્ટાર્ટર પિસ્ટલમાંથી છ રાઉન્ડ ફાયરિંગ કરી સ્થાનિકોમાં દહેશત ફેલાવી હતી. ગોળીબારના અવાજથી ધ્રૂજી ગયેલા સ્થાનિક લોકો ઘરની બહાર દોડી આવ્યા હતા. અમદાવાદ ગ્રામ્યની બોપલ પોલીસે સ્થળ પર જઈ આરોપીઓને કોર્ડન કરતા બે શખ્સે પાંચમાં માળેથી ચોથા માળ તરફ કૂદીને ભાગવાનો પ્રયાસ કરતા એક શખ્સને ઈજા પહોંચી હતી. બોપલ પોલીસે મહેફીલનો કેસ ઉપરાંત ફાયરિંગ કરનાર શખ્સ વિરૂદ્ધ આર્મ્સ એક્ટ મુજબ ગુનો દાખલ કરી તપાસ હાથ ધરી છે. બોપલ પોલીસે મહેફિલના કેસમાં ઋતુરાજસિંહ ભૂપેન્દ્રસિંહ જાડેજા (માંડવી), ફતુભા બળવંતસિંહ જાડેજા (રહે, ભચાઉ, ગાંધીધામ), મહાવીરસિંહ ભાવસંગજી જાડેજા (રહે, ગાંધીધામ), મહેન્દ્ર બાબુ ઠાકોર, સુરજ મણીલાલ ભરવાડ અને કેદાર ગોવિંદભાઈ પટવા ત્રણે રહે, ઘાટલોડિયાની પ્રોહિબિશન એક્ટ મુજબ ધરપકડ કરી હતી.
પોલીસને સેલિબ્રેશન સિટી સેન્ટરમાં પાંચમાં માળે આવેલી ઓફિસમાંથી 23 બિયરના ટીન મળ્યા જેમાં દસ ખાલી હતા. જોની વોકર બ્લેક લેબલ બ્લેન્ડેડ સ્કોચ વ્હીસ્કીની ખાલી બોટલ અને એક અડધી ભરેલી બોટલ પોલીસને મળી હતી. પોલીસને જોઈને પાંચમાં માળેથી ચોથા માળે આવેલી ગેલેરીમાં કૂદી ભાગવા જતા ઘાટલોડિયાના સૂરજ ભરવાડ અને કેદાર પટવાને જમણા પગના પંજામાં સામાન્ય ઈજા થઈ હતી. પોલીસે આરોપીઓ પાસેથી 1.28 લાખની રોક્ડ, 9 મોબાઈલ ફોન તેમજ બે વૈભવી કાર ફોર્ડ એન્ડએવર અને સ્કોર્પીયો મળીને કુલ રૂ.27,50,600નો મુદ્દામાલ કબ્જે લીધો હતો.
બોપલ પોલીસે ફાયરિંગ કરનાર શખ્સ અંગે તપાસ કરતા મહેફિલમાં હાજર મહાવીરસિંહ ભાવસંગજી જાડેજાએ ફાયરિંગ કર્યાની વિગતો મળી હતી. પોલીસે મહાવીરસિંહની તલાશી લેતા તેની પાસેથી સ્ટાર્ટર પિસ્ટલ, એક જીવતો કારતૂસ, સાત ફૂટેલા કારતૂસ તેમજ યુએસએની બનાવટની નાઇન એમએમ પિસ્ટલ મળી હતી. તપાસમાં ખુલેલી વિગત મુજબ ઓફિસ ભાડે રાખીને ઋતુરાજ જાડેજા તેના ભાગીદાર સૂરજ સાથે જમીન લે-વેચનું કામ કરતો હતો. કેદાર ઓફિસમાં પટાવાળા તરીકે અને મહેન્દ્ર ડ્રાઈવર તરીકે નોકરી કરતો હતો. મહાવીરસિંહ અને ફતુભા બંને કચ્છના રહેવાસી હોવાનું અને જમીન લે-વેચના ધંધા સાથે સંકળાયેલા છે. આરોપીઓ એકબીજા મીત્ર થતા હોવાથી જમીનના મામલે મુલાકાત થતા પાર્ટીનું આયોજન કર્યું હતું.
તર્કીની પિસ્ટલ આપનારનું મોત થયાની કબૂલાત
બોપલ પોલીસની તપાસમાં મહાવિરસિંહે જણાવ્યું કે, ધમાભાઈ નામના વ્યક્તિએ તેણે તર્કીની પિસ્ટલ અને સ્ટાર્ટર બંને આપ્યા હતા. જોકે, તેમનું થોડા સમય પહેલાં મૃત્યુ થયું છે. પોલીસે આ મામલે પણ તપાસ શરૂ કરી છે. આરોપી મહાવિરસિંહ વિરૂદ્ધ શામખિયાળીમાં મારામારીના ગુનામાં અગાઉ પકડાયાની વિગતો પોલીસને મળી છે.
આરોપીએ યુએસ મેડ પિસ્ટલમાંથી પણ ફાયરિંગ કર્યું છતાં પોલીસે હત્યાના પ્રયાસની કલમો ન ઉમેરી
આરોપી મહાવીરસિંહે તર્કીની સ્ટાર્ટર ઉપરાંત યુએસએ બનાવટની નાઇન એમએમ પિસ્ટલમાંથી ફાયરિંગ કર્યાનો ઘટસ્ફોટ થયો છે. સ્ટાર્ટર ગનમાંથી ફાયરિંગ થાય તો માત્ર અવાજ જ આવે કોઈને નુકસાન ન પહોંચે પણ આ ઘટના બાદ મહાવીરસિંહે જે ઓફિસમાંથી ફાયરિંગ કર્યું તેની સામેની ઓફિસમાં કાણું પડી ગયું છે. એના પરથી અંદાજો લગાવી શકાય કે મહાવીરસિંહે અમેરિકન બનાવટની પિસ્ટલથી ફાયરિંગ કર્યું છે, તેમ છતાં બોપલ પોલીસે આ કેસમાં હત્યાના પ્રયાસની કલમ ન ઉમેરતા સમગ્ર મામલે ગૂંચવાડો ઊભો થયો છે.
