- માલીમાં સોનાની ખાણોમાં અવાર-નવાર આવી દુર્ઘટના સર્જાતી હોય છે
- સરકારે દુર્ઘટનાને લઈ શોક વ્યક્ત કર્યો
- ધરાશાયી થાય તેવી ખાણમાં મજૂરો કામ કરી રહ્યા હતા
પશ્ચિમ આફ્રિકાના માલીમાં સોનાની ખાણ ધરાશાયી થતાં 70 લોકોએ જીવ ગુમાવ્યા હતા. આ દુર્ઘટના એવા વિસ્તારમાં બની છે જ્યાં હંમેશા ખાણ પડી જવાનો ભય રહે છે. માલીના ખાણ મંત્રાલયે બુધવારે સાંજે એક નિવેદન પ્રસિદ્ધ કરીને જણાવ્યું હતું કે દક્ષિણ પશ્ચિમ કૌલીકોરો ક્ષેત્રના કંગાબા જિલ્લામાં અનેક ખાણિયાઓએ જીવ ગુમાવ્યા છે. આ દુર્ઘટના પર ઊંડો ખેદ વ્યક્ત કરતા મંત્રાલયે ખાણિયાઓને સલામતી જરૂરિયાતોનું પાલન કરવા વિનંતી કરી છે.
સરકારે શોક વ્યક્ત કર્યો
મંત્રાલયના પ્રવક્તા બે કૌલિબેલીએ જણાવ્યું હતું કે ખાણિયાઓએ સલામતીના ધોરણોનું પાલન કર્યા વિના ગેલેરી ખોદી હતી, જેના કારણે આ દુર્ઘટના સર્જાઈ હતી. આ પહેલા, ખાણિયાઓને ઘણી વખત સલામતી ધોરણોને ધ્યાનમાં રાખવાની સલાહ આપવામાં આવી છે. દરમિયાન, માલીની સરકારે મૃતકોના પરિવારો અને માલીના લોકો પ્રત્યે ઊંડી સંવેદના વ્યક્ત કરી છે.
ચોક્કસ વિસ્તારોમાં ખાણકામ પર સલાહ
એક ખાનગી રિપોર્ટ અનુસાર, સરકારે ખાણકામની જગ્યાઓ પાસે રહેતા સમુદાયો અને સોનાની ખાણોમાં કામ કરતા લોકોને ઈમાનદારીપૂર્વક સુરક્ષા માપદંડોનું પાલન કરવાની અપીલ કરી છે. આ સાથે, માત્ર નિયુક્ત વિસ્તારમાં જ ખાણકામ કરવાની સલાહ આપવામાં આવે છે.
