- વડાપ્રધાન નરેન્દ્ર મોદી બ્રુનેઈના પ્રવાસ દરમિયાન બ્રુનેઈના સુલતાન સાથે કરશે મુલાકાત
- બ્રુનેઈના સુલતાન વિશ્વમાં બીજા સૌથી લાંબા સમય સુધી શાસન કરનાર રાજા
- બ્રુનેઈના સુલતાન હાજી હસનલ બોલકિયાની કુલ સંપત્તિ અંદાજે 30 અરબ ડોલર
વડાપ્રધાન નરેન્દ્ર મોદી બ્રુનેઈ પહોંચી ગયા છે. બ્રુનેઈની દ્વિપક્ષીય મુલાકાત લેનારા તેઓ પ્રથમ ભારતીય વડાપ્રધાન છે. બ્રુનેઈના ક્રાઉન પ્રિન્સ હાજી અલ-મુહતાદી બિલ્લાએ એરપોર્ટ પર પીએમનું સ્વાગત કર્યું, ત્યારબાદ તેમને ગાર્ડ ઓફ ઓનર આપવામાં આવ્યું. પીએમ મોદીએ કહ્યું, “અમે અમારા ડિપ્લમેટિક સંબંધોના 40 વર્ષની ઉજવણી કરી રહ્યા છીએ. હું સુલતાન હાજી હસનલ બોલ્કિયા અને શાહી પરિવારના બાકીના સભ્યો સાથેની મારી બેઠકોની રાહ જોઈ રહ્યો છું. “આ આપણા ઐતિહાસિક સંબંધોને નવી ઊંચાઈએ લઈ જશે.”
વિશ્વનું સૌથી મોટું પ્રાઈવેટ કાર કલેક્શન
બ્રુનેઈના સુલતાન હાજી હસનલ બોલ્કિયા બ્રિટનની રાણી એલિઝાબેથ દ્વિતીય પછી વિશ્વમાં બીજા સૌથી લાંબા સમય સુધી શાસન કરનાર રાજા છે. તે પોતાની સમૃદ્ધિ અને લક્ઝરી માટે આખી દુનિયામાં પ્રખ્યાત છે. તેમની પાસે વિશ્વનું સૌથી મોટું પ્રાઈવેટ કાર કલેક્શન છે. જેની કિંમત અંદાજે 5 બિલિયન ડોલર છે. સુલતાનની કુલ સંપત્તિ અંદાજે 30 અરબ ડોલર છે. આ સંપત્તિ મુખ્યત્વે તેલ અને ગેસના ભંડારમાંથી મેળવવામાં આવે છે.
7000થી વધુ લક્ઝુરિયસ કાર
સુલતાન પાસે 7000થી વધુ લક્ઝુરિયસ કારોનું કલેક્શન છે. જેમાં 600 રોલ્સ રોયસ કારનો સમાવેશ થાય છે. આ આંકડો ગિનિસ વર્લ્ડ રેકોર્ડમાં પણ નોંધાયેલો છે. તેમના કાર કલેક્શનમાં લગભગ 450 ફેરારી કાર અને 380 બેન્ટલી જેવી લક્ઝરી કારનો સમાવેશ થાય છે. આ સિવાય તેની પાસે પોર્શે, લેમ્બોર્ગિની, મેબેક, જગુઆર, BMW અને મેકલેરેન જેવી અન્ય મોંઘી કાર પણ છે.
કસ્ટમ ગોલ્ડ કોટેડ રોલ્સ રોયસ કાર
એક વિશિષ્ટ બેન્ટલી ડોમિનેટર SUVની કિંમત લગભગ 80 મિલિયન ડોલર છે અને તેની પાસે પોર્શ 911 જેવી કિંમતી કાર પણ છે. સુલતાને 2007માં તેની પુત્રી પ્રિન્સેસ માજેદાહના લગ્ન માટે કસ્ટમ ગોલ્ડ કોટેડ રોલ્સ રોયસ ખરીદી હતી.
22 કેરેટ સોનાનું બનેલું છે ઘર
સુલતાન હાજી હસનલ બોલકિયા જ્યાં રહે છે તે મહેલનું નામ ઈસ્તાના નુરુલ ઈમાન પેલેસ છે. તેમનો મહેલ વિશ્વનો સૌથી મોટો રહેણાંક મહેલ છે. આ મહેલ 20 લાખ ચોરસ ફૂટમાં ફેલાયેલો છે અને તેને 22 કેરેટ સોનાથી શણગારવામાં આવ્યો છે. આ મહેલ ગિનીસ વર્લ્ડ રેકોર્ડમાં પણ સામેલ છે.
બન્ને દેશો વચ્ચેના ડિપ્લમેટિક સંબંધોના 40 વર્ષની ઉજવણી
પીએમ મોદીની મુલાકાતનો હેતુ બ્રુનેઈ સાથે ભારતના સંબંધોને મજબૂત કરવાનો અને બન્ને દેશો વચ્ચેના ડિપ્લમેટિક સંબંધોના 40 વર્ષની ઉજવણી કરવાનો છે. આ મુલાકાત માત્ર રાજકીય દૃષ્ટિકોણથી જ મહત્વપૂર્ણ નથી, પરંતુ તે બન્ને દેશો વચ્ચે વેપાર, રોકાણ, સંરક્ષણ સહયોગ, ઉર્જા, અવકાશ તકનીક, આરોગ્ય સહયોગ અને સાંસ્કૃતિક આદાનપ્રદાનને પ્રોત્સાહન આપવાની તક પણ પૂરી પાડે છે. આ મુલાકાત દરમિયાન પીએમ મોદી સુલતાન સાથે અનેક મહત્વપૂર્ણ મુદ્દાઓ પર ચર્ચા કરશે, જેનાથી ભારત અને બ્રુનેઈ વચ્ચે સહયોગ વધુ મજબૂત થશે.
