નેપાળમાં તાજેતરમાં ફાટી નીકળેલી હિંસાને કારણે અંદાજે 90 જેટલા ગુજરાતી પ્રવાસીઓ ત્યાં ફસાયા હોવાના અહેવાલ સામે આવ્યો છે. જેના કારણે તેમના પરિવારોમાં ભારે ચિંતાનો માહોલ ફેલાયો છે. આ ઘટના અંગે જાણ થતાં જ ગુજરાતના મુખ્યમંત્રી ભૂપેન્દ્ર પટેલે તાત્કાલિક કેન્દ્ર સરકાર સાથે સંપર્ક સાધ્યો છે. તેમણે કેન્દ્ર સરકાર અને નેપાળમાં ભારતીય એમ્બેસી સાથે સતત સંવાદ સ્થાપિત કરીને સમગ્ર પરિસ્થિતિનો તાગ મેળવ્યો છે.
સરકારની સતર્કતાને કારણે ફસાયેલા તમામ મુસાફરો હાલ સુરક્ષિત
CM ભૂપેન્દ્ર પટેલે ફસાયેલા ગુજરાતી મુસાફરોની સુરક્ષાને સર્વોચ્ચ પ્રાથમિકતા આપી છે. આ મામલે સરકારની સતર્કતાને કારણે ફસાયેલા તમામ મુસાફરો હાલ સુરક્ષિત સ્થળે છે. તેમના કેટલાક વીડિયો પણ સામે આવ્યા છે. આ વીડિયોમાં તેઓ પોતાની સ્થિતિ વિશે જાણકારી આપી રહ્યા છે. આ વીડિયોએ પરિવારોની ચિંતામાં થોડો ઘટાડો કર્યો છે. રાજ્ય સરકાર ભારતીય એમ્બેસીના માધ્યમથી નેપાળમાં ફસાયેલા તમામ મુસાફરોને સુરક્ષિત રીતે પરત લાવવા માટેના પ્રયાસો કરી રહી છે. નેપાળમાં સ્થાનિક સ્તરે હિંસા અને અસ્થિરતાને કારણે મુસાફરીમાં અવરોધો આવી રહ્યા છે.
પ્રવાસીઓને વહેલી તકે વતન પરત લાવવા માટે સરકાર કટિબદ્ધ
પરંતુ સરકાર આ પ્રવાસીઓને વહેલી તકે વતન પરત લાવવા માટે કટિબદ્ધ છે. આ ઘટના ફરી એકવાર દર્શાવે છે કે આંતરરાષ્ટ્રીય પ્રવાસ દરમિયાન સંભવિત જોખમો વિશે જાગૃત રહેવું કેટલું મહત્વનું છે. સરકારી સૂત્રોએ જણાવ્યું છે કે રાહત અને બચાવ કામગીરી માટે તમામ જરૂરી પગલાં લેવામાં આવી રહ્યા છે. નેપાળમાં ભારતીય એમ્બેસી સ્થાનિક સત્તાવાળાઓ સાથે મળીને કામ કરી રહી છે જેથી પ્રવાસીઓને સુરક્ષિત સ્થળેથી બહાર કાઢી શકાય. આ પ્રવાસીઓને શક્ય તેટલી વહેલી તકે પરત લાવવાની વ્યવસ્થા ગોઠવવામાં આવશે.
