- ઉત્તરાખંડના ઉત્તરકાશીમાં ભૂસ્ખલન
- યમુનોત્રીમાં નિર્માણાધીન ટનલમાં ભૂસ્ખલન
- 40થી વધુ મજૂરો ફસાયાની આશંકા
ઉત્તરાખંડના ઉત્તરકાશીમાં યમુનોત્રી નેશનલ હાઈવે પર સિલ્ક્યારાથી દાંડલગાંવ સુધી નિર્માણાધીન ટનલની અંદર ભૂસ્ખલન થયું છે. NHIDCLના નિર્દેશન હેઠળ નવયુગ કંપની દ્વારા આ ટનલનું નિર્માણ કરવામાં આવી રહ્યું છે. જિલ્લા ડિઝાસ્ટર મેનેજમેન્ટ ઉત્તરકાશીએ આ વાતની પુષ્ટિ કરી છે.
50થી વધુ શ્રમિકો ફસાયાની આશંકા
પ્રાથમિક માહિતી અનુસાર, કાટમાળ નીચે 50-60 મજૂરો ફસાયા હોવાના અહેવાલ છે. કંપની દ્વારા કાટમાળ હટાવવાની કામગીરી કરવામાં આવી રહી છે. ઘટનાસ્થળે પાંચ 108 એમ્બ્યુલન્સ તૈનાત કરવામાં આવી છે.તમને જણાવી દઈએ કે આ ચોમાસાની સિઝનમાં ઉત્તરાખંડમાં ભારે વરસાદ થયો હતો, જેના કારણે લોકોએ જીવ ગુમાવ્યા હતા અને ઈમારતો, રસ્તાઓ અને હાઈવેને નુકસાન થયું હતું.
બચાવકાર્ય શરૂ
ઉત્તરાખંડ સરકાર અને વહીવટીતંત્રની ટીમોએ બચાવ કામગીરી શરૂ કરી દીધી છે. એવું કહેવામાં આવી રહ્યું છે કે અંદર કામદારો માટે ઓક્સિજન સિલિન્ડર ઉપલબ્ધ છે. ટનલની અંદર વધારાની ઓક્સિજન પાઇપ પણ પહોંચાડવામાં આવી છે. ટનલની અંદર તમામ કામદારો સુરક્ષિત છે. ઘટના રવિવારે સવારે લગભગ 5 વાગ્યાની આસપાસ હોવાનું જાણવા મળી રહ્યું છે. આ ભૂસ્ખલન સિલ્ક્યારા તરફની ટનલના પ્રવેશદ્વારથી 200 મીટરના અંતરે થયું હતું, જ્યારે સુરંગમાં કામ કરી રહેલા કામદારો પ્રવેશદ્વારની અંદર 2800 મીટર અંદર હતા.
ચાર ધામ રોડ પ્રોજેક્ટ હેઠળ બની રહી હતી ટનલ
ઘટનાની માહિતી મળતાં જ ઉત્તરકાશીના પોલીસ અધિક્ષક અર્પણ યદુવંશી તાત્કાલિક ઘટનાસ્થળે પહોંચી ગયા હતા અને રાહત અને બચાવ કામગીરીનો હવાલો સંભાળ્યો હતો. પોલીસ, નેશનલ ડિઝાસ્ટર રિસ્પોન્સ ફોર્સ, સ્ટેટ ડિઝાસ્ટર રિસ્પોન્સ ફોર્સ, ફાયર બ્રિગેડ, ઈમરજન્સી 108 અને નેશનલ હાઈવેઝ એન્ડ ઈન્ફ્રાસ્ટ્રક્ચર ડેવલપમેન્ટ કોર્પોરેશન લિમિટેડ (NHIDCL) ના કર્મચારીઓ, જે ટનલનું નિર્માણ કરી રહી છે, તે પણ સ્થળ પર ટનલ ખોલવામાં વ્યસ્ત છે. ચાર ધામ રોડ પ્રોજેક્ટ હેઠળ આ ઓલ-વેધર ટનલના નિર્માણથી ઉત્તરકાશીથી યમુનોત્રી ધામ સુધીની મુસાફરીમાં 26 કિલોમીટરનો ઘટાડો થશે.
