- ઇઝરાયલમાં 900 અને ગાઝા પટ્ટીમાં 704 લોકોએ જીવ ગુમાવ્યા
- હુમલાઓ અને વિસ્ફોટો વચ્ચે ઈઝરાયેલ પોલીસે શેર કર્યો વિડીયો
- હમાસના 2 આતંકીઓનો પીછો કરીને ઠાર મારવામાં આવ્યા
ઇઝરાયેલ અને હમાસ વચ્ચે છેલ્લા 72 કલાકથી લોહિયાળ યુદ્ધ ચાલી રહ્યું છે. બંનેમાંથી કોઈ પાછી પાની કરવા તૈયાર નથી. યુદ્ધમાં અત્યાર સુધીમાં 900 ઈઝરાયેલના લોકો માર્યા ગયા છે. 2,600 થી વધુ ઘાયલ થયા છે. તો, ગાઝા પટ્ટીમાં 704 લોકોએ જીવ ગુમાવ્યા છે અને લગભગ 4000 લોકો ઘાયલ થયા છે. સતત વિસ્ફોટો, હવાઈ હુમલા અને બોમ્બ વિસ્ફોટો વચ્ચે લોકોની મરણચીસોના ચિત્રો સામે આવવા લાગ્યા છે. આ દરમિયાન ઈઝરાયેલ પોલીસે એક નવો વિડીયો જાહેર કર્યો છે.
આ વીડિયોમાં જોઈ શકાય છે કે કેવી રીતે ઈઝરાયેલ પોલીસ હમાસના બે આતંકીઓનો પીછો કરી રહી છે. આતંકવાદીઓ કારમાં ભાગવાનો પ્રયાસ કરી રહ્યા છે અને ઈઝરાયેલ પોલીસ તેમનો પીછો કરી રહી છે. ઈઝરાયલની પોલીસે લાંબુ દૂર જઈને આતંકવાદીઓની કારને રોકે છે અને તેમના પર ધડાધડ ફાયરિંગ કરીને બંને આતંકીઓને ઠાર મારે છે. પોલીસના ફાયરિંગમાં હમાસના બે આતંકીઓ એક જ ક્ષણમાં માર્યા જાય છે.
જણાવી દઈએ કે, ઈઝરાયેલ-હમાસ યુદ્ધની અસર લેબનોનમાં પણ જોવા મળી રહી છે. એક તરફ વેસ્ટ બેંકના 16 લોકોના મોત થયા છે અને 2,616 લોકો ઘાયલ થયા છે, તો બીજી તરફ લેબનોનમાં 3 લોકોએ જીવ ગુમાવ્યા છે. એકંદરે, અત્યાર સુધીમાં બંને પક્ષોના લગભગ 1600 લોકો માર્યા ગયા છે અને 6 હજારથી વધુ લોકો ઘાયલ થયા છે.
ઇઝરાયલ કે હમાસ બંને માંથી કોઇ નમવા તૈયાર નથી. હમાસે ઈઝરાયેલને ધમકી આપી છે કે જો તે બોમ્બ હુમલાઓ બંધ નહીં કરે તો તે ઈઝરાયેલથી અપહરણ કરાયેલા લોકોને એક પછી એક મારવાનું શરૂ કરશે. જ્યારે ઈઝરાયેલના વડાપ્રધાન બેન્જામિન નેતન્યાહુએ પણ પીછેહઠ કરવાનો ઈન્કાર કરી દીધો છે. નેતન્યાહુએ કહ્યું છે કે હમાસની કાર્યવાહી બાદ પીછેહઠ કરવાનો પ્રશ્ન જ નથી. નેતન્યાહુએ પેલેસ્ટિનિયન આતંકવાદી સંગઠન હમાસને કડક ચેતવણી આપી છે. કહેવામાં આવ્યું છે કે ભવિષ્યમાં આપણે જે પગલાં લેવા જઈ રહ્યા છીએ તેની સીધી અસર આપણી ભાવિ પેઢીઓ પર પડશે.
મીડિયા રિપોર્ટ્સ મુજબ, આતંકવાદી સંગઠન હમાસે ઈઝરાયેલ પર હુમલાને અંજામ આપવાની આખી યોજના પહેલાથી જ તૈયાર કરી લીધી હતી. હમાસના 5 યુનિટ્સ દ્વારા આ યોજનાઓનો અમલ કરવામાં આવ્યો હતો. સૌથી પહેલા સવારે 6.30 કલાકે મિસાઈલ યુનિટ દ્વારા 3 હજાર રોકેટ છોડવામાં આવ્યા હતા. આટલા મોટા હવાઈ હુમલાથી ઈઝરાયેલના લોકો ચોંકી ગયા હતા. ત્યારબાદ આતંકવાદીઓ એરબોર્ન યુનિટ દ્વારા પેરાગ્લાઈડર મારફતે ઈઝરાયેલમાં પ્રવેશ્યા હતા. ત્યારપછી કમાન્ડો યુનિટે જમીન પરની વાડ કાપી નાખી અને આતંકવાદીઓ ગાઝા પટ્ટીમાંથી ઈઝરાયેલમાં પ્રવેશ્યા હતા. આ દરમિયાન હમાસનું ડ્રોન યુનિટ હુમલો કરવામાં અને માહિતી એકત્ર કરવામાં વ્યસ્ત રહ્યું. ઈઝરાયેલના અંદાજ મુજબ હમાસના લગભગ 1000 આતંકીઓએ ઘૂસણખોરી કરી હતી.
