રશિયા અને યુક્રેન વચ્ચે ચાલી રહેલા યુદ્ધનો હજુ સુધી ઉકેલ આવ્યો નથી. કારણ કે ગઈકાલે યુક્રેને રશિયન લશ્કરી થાણાઓ પર ડ્રોનથી હુમલો કર્યો હતો. યુક્રેને 5 રશિયન એરબેઝનો નાશ કર્યો છે. એવો દાવો કરવામાં આવ્યો હતો કે, આ સમય દરમિયાન ઘણા વિમાનો પણ નિશાન બન્યા હતા. હવે યુક્રેનના ઓપરેશન પર રશિયન વિદેશ મંત્રાલય તરફથી પ્રતિક્રિયા આવી છે. તેમણે આ હુમલાને આતંકવાદી હુમલો ગણાવ્યો છે.
રશિયાના રક્ષા મંત્રાલયે યુક્રેન હુમલા પર કહ્યું હતું કે, ‘કિવ શાસને મુર્મન્સ્ક, ઇર્કુત્સ્ક, ઇવાનોવો, રિયાઝાન અને અમુરમાં સ્થિત એરફિલ્ડ્સ પર FPV ડ્રોનનો ઉપયોગ કરીને આતંકવાદી હુમલો કર્યો છે. ઇવાનોવો, રિયાઝાન અને અમુરમાં લશ્કરી એરફિલ્ડ્સ પરના તમામ આતંકવાદી હુમલાઓને નિષ્ફળ બનાવવામાં આવ્યા હતા. મુર્મન્સ્ક અને ઇર્કુત્સ્ક પ્રદેશોમાં લશ્કરી એરબેઝ નજીક વિસ્તારોમાંથી લોન્ચ કરાયેલા FPV ડ્રોનને કારણે અનેક વિમાનોમાં આગ લાગવાની ઘટના બની હતી.
40 રશિયન વિમાનોને તોડી પાડવાનો દાવો
યુક્રેનના રાષ્ટ્રપતિ વોલોડીમીર ઝેલેન્સકીએ આ ઓપરેશન અંગે સોશિયલ મીડિયા પર એક પોસ્ટ શેર કરી હતી. તેમણે રશિયા પરના હવાઈ હુમલાને ઐતિહાસિક ગણાવ્યો છે. ઝેલેન્સકીએ આ માટે પોતાની સેનાનો આભાર પણ માન્યો હતો. યુક્રેનના આ હવાઈ હુમલાના ઘણા વીડિયો સોશિયલ મીડિયા પર જોઈ શકાય છે. યુક્રેને દાવો કર્યો હતો કે તેણે રવિવારે ઓપરેશનના ભાગ રૂપે રશિયન લક્ષ્યો પર મોટા ડ્રોન હુમલામાં લગભગ 40 રશિયન વિમાનોનો નાશ કર્યો હતો.
રશિયા પરના હુમલા અંગે ઝેલેન્સકીએ શું કહ્યું?
રશિયા પરના હુમલા અંગે ઝેલેન્સકીએ કહ્યું હતું કે, ‘આજે દુશ્મનના દેશમાં એક શાનદાર કાર્યવાહી કરવામાં આવી હતી જેમાં ફક્ત લશ્કરી ઠેકાણાઓને નિશાન બનાવવામાં આવ્યા હતા. યુક્રેન પર હુમલો કરવા માટે ઉપયોગમાં લેવાતા સાધનોને નિશાન બનાવવામાં આવ્યા હતા. આ હુમલામાં રશિયાને ઘણું નુકસાન થયું હતું. સૌથી રસપ્રદ વાત એ છે કે રશિયન પ્રદેશમાં અમારું ઓપરેશન ઓફિસ તેમના પ્રદેશમાં FSB મુખ્યાલયની બાજુમાં જ સ્થિત હતું. આ કામગીરીમાં કુલ 117 ડ્રોનનો ઉપયોગ કરવામાં આવ્યો હતો.
