- હાર્ટએટેકની ઘટનાઓમાં વધારો
- સુરતમાં વિદ્યાર્થી અચાનક ઢળી પડ્યો
- હોસ્પિટલ ખાતે ડોક્ટરે મૃત જાહેર કર્યો
ગુજરાતમાં હાલના દિવસોમાં હાર્ટ એટેકની ઘટનાઓમાં ચિંતાજનક સ્તરે વધારો નોંધાયો છે. જેને લઈને સરકારી તંત્રની સાથે જ મેડિકલ જગતના તબીબો અને સામાન્ય જનતા સૌ કોઈના મનમાં એક ભયની લાગણી વ્યાપી ગઈ છે. ખાસ કરીને નાની વયના લોકોમાં હાર્ટએટેકનું વધતું પ્રમાણ ભયજનક છે. આવી જ એક ઘટના સુરતમાં બનવા પામી છે. જેમાં એક કિશોરનું મૃત્યુ થયું છે.
આ ઘટનાની માહિતી પ્રમાણે માંગરોળના ઈસનપુર ગામે રહેતા એક કિશોરનું હાર્ટએટેકથી મોત થયું છે. આ કિશોરનું નામ હેનિલ ભૂપેન્દ્ર ચૌધરી હોવાનું જાણવા મળ્યું છે. તે ધોરણ 10માં અભ્યાસ કરતો હતો. તે ખુરશીમાં બેઠો હતો ત્યારે અચાનક જ ઢળી પડ્યો હતો. પરિવારજનોએ તેને ઉઠાડવાનો પ્રયાસ કર્યો પણ તે ઉઠ્યો નહોતો ત્યારે તેને તાત્કાલિક હોસ્પિટલ ખાતે રિફર કરવામાં આવ્યો હતો. જો કે ફરજ પરના ડોક્ટરે તેને મૃત જાહેર કર્યો હતો. ધોરણ 10માં અભ્યાસ કરતા કિશોરનું આટલી નાની વયે અચાનક મોત થતાં પરિવાર સહિત સગા સંબંધીઓ અને મિત્ર વર્તુળમાં શોક વ્યાપી ગયો હતો. આ ઉપરાંત હાલમાં જ સુરત જિલ્લામાં બે યુવકોના હાર્ટએટેકથી મોત થયું હોવાની જાણકારી સામે આવી હતી. હાર્ટ એટેકની વધતી જતી ઘટનાઓના પગલે હાલમાં સુરત શહેર અને જિલ્લાની જનતામાં ભયની લાગણી વ્યાપી ગઈ છે.
હાર્ટ એટેક આવતા વધુ એક વ્યક્તિનું મોત થયું
હાર્ટ એટેક આવતા વધુ એક વ્યક્તિનું મોત થયું છે. જેમાં રાજયમાં હાર્ટ એટેકના બનાવ સતત વધી રહ્યાં છે. જીવન શૈલી બદલવાથી હૃદય રોગનું જોખમ 60 ટકા નિવારી શકાય છે. દુનિયામાં વિવિઘ રોગોને કારણે લોકોની સંખ્યામાં હૃદય રોગથી મૃત્યુ પામતાં લોકોની સંખ્યા વધારે છે. અંદાજે એક તૃતિયાંશ લોકો હાર્ટ એટેક અથવા તો પક્ષઘાતના હુમલાના ભોગને કારણે મૃત્યુ પામે છે. હૃદય એક પંપ છે અને આપણા જીવનકાળ દરમ્યાન 20 કરોડ લીટર લોહીનું શરીરમાં પપીંગ કરે છે. દિવસ-રાત કોઈપણ વિરામ કર્યા વગર આ એક જ અંગ શરીર માટે કાર્યરત રહે છે. તેને પોતાને કાર્યરત રહેવા માટે ઓક્સિજન અને ગ્લુકોઝની જરૂર પડે છે. જે હૃદયની સપાટી ઉપર આવેલી રકતવાહિનીઓ (ઘમની) દ્વારા પહોચે છે.
60% પુરૂષો અને 50% સ્ત્રીઓમાં હૃદયની બિમારીની ચેતવણી જ મળતી નથી
ઉંમર વધવાની સાથે દરેક વ્યકિતની આ ધમનીઓમાં કોલેસ્ટેરોલ (ચરબી) ની જમાવટ થતી જાય છે અને નળીઓ સાંકળી થતી જાય છે. આ કારણે વ્યકિતને શ્રમ કરતી વખતે હૃદયનો દુખાવો અનુભવાય છે. આ દુખાવો ક્ષણીક હોય છે અને 2 થી 5 મીનીટ આરામ કરવાથી કે નાઈટ્રોગ્લીસરીનની ગોળી ચૂસવાથી દુખાવો બંઘ થઈ જાય છે. આ દુખાવો છાતીની ડાબી બાજુ કે ડાબા હાથમાં જ થાય તેવી સામાન્ય માન્યતા પણ સાચી નથી. આ દુખાવો જમણા હાથમાં કે ખભામાં, ગળામાં, નીચેના જડબામાં, પેટમાં, વાંસામાં કે છાતીના મધ્યમાં પણ થઈ શકે છે. 20% લોકોને તો કોઇ દુઃખાવાનો અનુભવ થતો જ નથી. જયારે આ સાંકળી નળી ઓચીંતી બંધ થઈ જાય છે ત્યારે હૃદયના અમુક ભાગમાં લોહીનો પૂરવઠો તદ્ન બંઘ થઈ જાય છે અને તે હૃદયરોગના હુમલામાં (હાર્ટ એટેક) પરિણમે છે. તમને ખબર છે કે 60% પુરૂષો અને 50% સ્ત્રીઓમાં હૃદયની બિમારીની ચેતવણી જ મળતી નથી અને સૌથી પહેલા લક્ષણ રૂપે સીધો હાર્ટ એટેક જ આવે છે.
હાર્ટ એટેક દરમ્યાન 25 % લોકો તો ઘરેથી ડોકટર પાસે પહોચતાં પહેલા જ મૃત્યુ પામે છે
અત્યંત ગંભીર બાબત એ છે કે હાર્ટ એટેક દરમ્યાન 25 % લોકો તો ઘરેથી ડોકટર પાસે પહોચતાં પહેલા જ મૃત્યુ પામે છે, વિશ્વની કોઈપણ બિમારીમાં આટલો ઉંચો અને આટલો ઝડપી મૃત્યુ દર નથી. છેલ્લા કેટલાક વર્ષોમાં આપણી જીવનશૈલી તદ્ન બદલાઈ ગઈ છે. તનાવ-યુકત જીવન, ખોરાકમાં ઘી, તેલ, ફરસાણ, મીઠાઈનો વધુ પડતો ઉપયોગ, તમાકુનું સેવન, વઘુ પડતું વજન અને શરીરની મેદસ્વીતા, કસરતનો અભાવ, ડાયાબીટીસ-બીપી જેવા રોગનું વઘતું પ્રમાણ અને આધુનિક જીવનની દોડઘામ, હરીફાઈ અને ટૂંકા ગાળામાં વઘુ પૈસા કમાઈ લેવાની આપણી વૃતીના કારણે આપણું કોલેસ્ટેરોલનું પ્રમાણ લોહીમાં પણ વઘી ગયું છે. જેના કારણે હૃદયરોગનો હુમલો કે લકવાના રોગનો જન્મ થયો છે.
