- જામનગર શહેરમાં ચકચાર
- 16 વર્ષીય સગીરે જીવન ટૂંકાવ્યું
- મિત્રોના ત્રાસથી કંટાળી આત્મહત્યા કર્યાનો ખુલાસો
જામનગરના 16 વર્ષના તરૂણે 30-11-23ના રોજ *દુઆઓમે યાદ રખનાના* ગીતનું સ્ટેટસ અપલોડ કરી વિજરખી ડેમમાં ઝંપલાવી આપઘાત કર્યો હતો. આ મામલે મૃતકની માતાએ પોલીસમાં નોંધાવેલી ફરિયાદમાં હુમલો કરનાર શખ્સો તેના પુત્ર પાસે પૈસા માટે ત્રાસ આપતા હોવાનો આક્ષેપ કર્યો હતો.
જામનગરમાં રહેતા એક 16 વર્ષના તરૂણે તેના ઉપર થયેલ હુમલાનો વીડિયો સોશિયલ મીડિયામાં વાયરલ કરી પોતાની પાસેથી વારંવાર રૂપિયાની માંગણી થતી હોવાથી કંટાળીને જીવન ટૂંકાવી રહ્યો છું એમ કહી આપઘાત કર્યો હતો. મહત્વનું છે કે આ મામલે જાણકારી અનુસાર તરૂણે વિજરખી ડેમમાં ઝંપલાવી પોતાની જીંદગીનો અંત આણી દીધો હતો. મૃતકના માતાએ આ અંગે વીડિયો ઉતારી વાયરલ કરનાર સહિતના શખ્સો સામે પોલીસમાં ફરિયાદ નોંધાવી છે.
જામનગરમા ચાર દિવસ પહેલા એક સગીર યુવકે સોશિયલ મીડિયામાં રીલ બનાવી જામનગરના વિજરખી ડેમમાં આપઘાત કર્યો હોવાની ઘટના બનવા પામી હતી. આ ઘટનાની પોલીસે દ્વારા ઝીણવટપૂર્વકની તપાસ ધરાતા ચોંકાવનારી વિગતો સામે આવી. જેમાં તેમના મિત્રોના ત્રાસના કારણે તેણે આ પગલું ભર્યું હોવાનું સામે આવ્યું હતું. હાલ પોલીસે આ સમગ્ર મામલે અમુક લોકોની અટકાયત કરી વિશેષ તપાસ હાથ ધરી છે.
જામનગરમાં કાલાવડ નાકા બહાર આવેલ મહારાજા સોસાયટીમાં રહેતા સુલતાનાબેન અબ્બાઅલી કેરૂનનામની મહિલાએ પંચકોષી એ ડિવિઝન પોલીસ મથકમાં નોંધાવેલી ફરિયાદ અનુસાર તેના પુત્ર અબ્દુલ કાદીરને તોફીક ઉર્ફે ભાણેજ ખીરા અને કામીલ ખેરાણી તથા આ શખ્સોના મિત્રોએ માર માર્યો હતો અને તેનો વીડિયો બનાવી ઇન્સ્ટાગ્રામમાં અપલોડ કરી વાયરલ કરેલ હતો. આ વીડિયો આરોપી તોફિક ખીરા પાસે હોય જે ડિલિટ કરવા માટે તે મૃતક પાસે અવાર-નવાર રૂપિયાની માંગણી કરતો હતો.
બીજી બાજુ યુવકના આ ત્રાસને લીધે અબ્દુલ કાદીરે કંટાળી જઇ સતત ટેન્શનમાં રહેતો હોવાથી અને ફરી વખત આરોપીઓ તેને માર મારશે તેવો ભય રહેતો હોવાથી અબ્દુલ કાદીરે વિજરખી ડેમ પાસે થઇ પોતાના મોબાઇલમાં અચ્છા ચલતા હું દુવાઓ મેં યાદ રખના ગીત સાથેનો વીડિયો બનાવ્યો હતો અને વોટસએપમાં સ્ટેટસ તરીકે અપલોડ કરી મોબાઇલ ત્યાં રેઢો મૂકી વિજરખી ડેમમાં ઝંપલાવી આપઘાત કર્યો હતો. પોલીસે મૃતક તરૂણની માતા સુલતાનાબેનની ફરિયાદના આધારે તોફીક ઉર્ફે ભાણેજ ખીરા અને કામીલ ખેરાણી તથા આ બન્ને શખ્સના મિત્રો વિરૂદ્ધ આઇપીસી કલમ 305 અને 114 મુજબ ગુન્હો નોંધ્યો છે અને આ બનાવમાં મૃતક યુવકના મિત્રો કે જેઓ પણ સગીર છે તેની પોલીસ દ્વારા અટકાયત કરી આગળની કાર્યવાહી હાથ ધરવામાં આવી છે.
