- અચાનક બાઈકની વચ્ચે ઢોર આવી જતા અકસ્માત સર્જાયો
- યુવકને ગંભીર ઈજાઓ પહોંચતા હોસ્પિટલમાં ખસેડાયા હતા
- પોલીસે અકસ્માતનો ગુનો નોંધી કાર્યવાહી હાથ ધરી
હાઈકોર્ટ દ્વારા વારંવાર ટકોર કરવામાં આવી રહી છે તેમ છતાં પણ રખડતાં ઢોરનો આતંક ઓછો થવાનું નામ નથી લઈ રહ્યું. હજી વિવિધ શહેરોમાં ઢોર પકડવાની કામગીરી ચાલી રહી છે ત્યારે સુરતમાં રખડતાં ઢોરના કારણે 22 વર્ષના યુવકે જીવ ગુમાવવાનો વારો આવ્યો છે.
આ અંગેની માહિતી અનુસાર, સુરતમાં રખડતા ઢોરે એક 22 વર્ષીય યુવકનો ભોગ લીધો છે. બે સગાભાઇઓ બાઇક પર જઇ રહ્યા હતા. ત્યારે અચાનક રસ્તા પર એક પશુ આવી જતા પટકાયા હતા. ડાયમંડ ફેક્ટરીથી પરત ફરી રહેલા બંન્ને ભાઇઓના રખડતા ઢોરના કારણે અકસ્માત નડ્યો. બાઇક પરથી પટકાવાને કારણે નાના ભાઇનું મોત નિપજ્યું છે.
રખડતા ઢોરનો ત્રાસ સુરત હોય કે ગુજરાતનો કોઇ પણ હિસ્સો હોય અસહ્ય થઇ ચુક્યો છે. રત્નકલાકાર ભાઇઓ ઓલપાડ ઓમના ગામના રહેવાસી છે અને બંન્ને સગાભાઇઓ છે. તુષાર નામના યુવકનું સારવાર દરમિયાન મોત નિપજ્યું હતું. જ્યારે મોટા ભાઇને હાથનું હાડકું તુટી જતા હાથમાં ફ્રેક્ચર આવ્યું હતું.
કોર્પોરેશન ઢોર પકડવા જાય ત્યા ઢોરના માલિકો પણ ઘણી વખત ઢોર જેવું જ વર્તન કરતા હોય છે. મારામારી કરીને પોતાના ઢોર છોડાવી જાય છે. બીજી તરફ સરકાર પણ પોતાના મતની લાલચે કોઇ કડક કાયદો લાવવા અસમર્થ છે. અગાઉ કાયદો લાવીને પરત પણ ખેંચી ચુકી છે.
