અમદાવાદમાં RBIની બહાર લાગતી લાંબી કતારો પર મોટો ખુલાસો

• રૂ.2000ની નોટ પાછળ રૂ.400 કમિશન 
• રાત્રે 3 વાગે ઉભા રહી છે લોકો લાંબી કતારોમાં
  
• રૂ.2 હજારની નોટોમાં બ્લેકનાં વ્હાઈટ કરવાનું કૌભાંડ
  

અમદાવાદમાં RBIની બહાર લાગતી લાંબી કતારો પર મોટો ખુલાસો થયો છે. જેમાં સંદેશ ન્યૂઝના રિયાલિટી ચેકમાં મોટો ખુલાસો થયો છે. તેમાં રૂપિયા 2000ની નોટ પાછળ રૂપિયા 400 કમિશન માટે લોકો લાઇનો લગાવી રહ્યાં છે. જેમાં રાત્રે 3 વાગે લોકો લાંબી કતારોમાં ઉભા રહે છે. તેમજ નાના બાળકો સાથે ઉભા રહી ગરીબ લોકો રૂપિયા કમાય છે.

 રૂપિયા 2 હજાર નોટોનું બ્લેકનાં વ્હાઈટ કરવાનું કૌભાંડ

અમદાવાદમાં આર.બી.આઈ.ની બહાર રૂપિયા 2 હજાર નોટોનું બ્લેકનાં વ્હાઈટ કરવાનું કૌભાંડ કેટલાય દિવસથી ચાલી રહ્યું છે. ત્યારે સંદેશ ન્યૂઝના સ્ટીંગ ઓપરેશનમાં મોટો ખુલાસો થયો છે. જેમાં મળતીયાઓ કમિશનમાં ચલાવે છે. RBI બેંકની બહાર રૂપિયા 2 હજારની નોટ બદલવા લોકોની લાંબી લાઈનો લાગે છે. સમયમર્યાદા પૂર્ણ થયા બાદ નોટ બદલવા આટલી લાંબી લાઈન કેમ લાગી તેવા પ્રશ્નના જવાબમાં એજન્ટો રૂપિયા 2 હજારની નોટો શ્રમિક મહિલાઓને લાઇનમાં ઉભી રાખીને બેંકમાં બદલાવી રહ્યા છે.

3-3 દિવસ સુધી નોટ બદલાવવાનો વારો આવતો નથી

આમ તો બેંકમાં રૂપિયા 2 હજારની નોટ બદલાવવાની મુદત પુરી થઈ ગઈ છે, પરંતુ અમદાવાદ રિઝર્વ બેન્ક બહાર નોટ બદલાવવા નાગરિકોની લાંબી કતારો લાગે છે. દિવાળીના તહેવાર પૂર્વે રિઝર્વ બેન્ક બહાર નોટ બદલાવવા એક હજારથી વધુ લોકોનો જમાવડો જોવા મળ્યો છે. લોકોનો આક્ષેપ છે કે વચેટિયાઓ 20-30 ટકા કમિશન પર નોટો બદલી આપે છે અને 3-3 દિવસ સુધી નોટ બદલાવવાનો વારો આવતો નથી. જેથી મધ્યમ વર્ગને હાલાકીનો સામનો કરવો પડી રહ્યો છે. બીજી તરફ લોકો દિવાળી સુધી સામાન્ય બેંકમાં પણ નોટો સ્વીકારવામાં આવે તેવી માગ કરી રહ્યા છે. મહત્વનું છે કે દરેક વ્યક્તિ પાસે 2 હજારના દરની 10-10 ચલણી નોટ જોવા મળી રહી છે, ત્યારે લોકો પાસે 2 હજાર રુપિયાની નોટ ક્યાંથી આવી તેને લઈને સવાલો ઉઠી રહ્યા છે.

RBI ની ઓફીસ બહાર લોકોની લાઈન લાગી

ભારતીય રિઝર્વ બેન્ક દ્વારા સાત ઓક્ટોબર છેલ્લી તારીખ આપવામાં આવી હતી. રૂપિયા બે હજારની નોટો બદલવા ની અંતિમ તારીખ સુધી નોટો નહીં બદલનાર અનેક લોકોની લાઈનો રિઝર્વ બેંક ઓફ ઈન્ડિયાની ઓફીસ બહાર જોવાં મળી રહી છે. ત્યારે મહિલાઓ, વૃદ્ધો તેમજ યુવાનો દરેક લાઈનમાં ઉભા રહ્યા છે.

નોટ બદલવા ઉભા છે કે કમિશન માટે તે ચર્ચા શરૂ

જ્યાં સુધી રિઝર્વ બેંકની અંતિમ તારીખ આવીને જતી રહી ત્યાં સુધી કોઈને યાદ નહીં આવ્યું અને અચાનક લોકોનાં ઘરમાંથી બે- બે હજારની નોટો નીકળવા માંડી, એટલે સ્પષ્ટ સમજી શકાય છે કે કલાકો સુધી લાઈનમાં ઉભા રહીને તડકે તપતાં લોકો ફકત મામૂલી કમિશનનાં હકદાર છે પણ અસલીમાં રૂપિયા બે બે હજારની નોટો કોઈ અન્ય વટાવી રહ્યું છે.