- સોલન જિલ્લાના બદ્દીમાં કોસ્મેટિક અને પરફ્યુમ બનાવટી ફેક્ટરીમાં આગ લાગી
- પરફ્યુમ બનાવવામાં આલ્કોહોલનો ઉપયોગ થતો હોવાથી આગ ઝડપથી ફેલાઈ
- જીવ બચાવવા માટે અનેક મહિલા કામદારો છત પર ચઢી જઈને કૂદી પડતાં ઇજાગ્રસ્ત
હિમાચલ પ્રદેશના સોલન જિલ્લાના બદ્દીમાં શુક્રવારે કોસ્મેટિક અને પરફ્યુમ બનાવટી ફેક્ટરીમાં ભીષણ આગ ફાટી નીકળી હતી. આનો એક વીડિયો સામે આવ્યો છે, જે હચમચાવી દે તેવો છે. વિડીયોમાં જોઈ શકાય છે કે મહિલા કામદારો પોતાનો જીવ બચાવવા છત પરથી કૂદી રહી છે. આ ઘટનામાં અત્યાર સુધીમાં 5 લોકોના મોતની પુષ્ટિ થઈ છે. નાયબ મુખ્યપ્રધાન મુકેશ અગ્નિહોત્રી આજે બદ્દી પરફ્યુમ ફેક્ટરી પહોંચ્યા અને મૃત્યુની જાણકારી આપી.
જણાવી દઈએ કે બદ્દી ઝારમાજરી સ્થિત કોસ્મેટિક્સ અને પરફ્યુમ બનાવતી એરોમા ફેક્ટરીમાં આગ લાગવાથી ભારે હોબાળો મચી ગયો હતો. જ્યારે આગ ફેક્ટરીમાં લાગી ત્યારે લગભગ 130 કર્મચારીઓ કામ કરી રહ્યા હતા. પરફ્યુમ બનાવવામાં આલ્કોહોલ સહિતના ઘણા જ્વલનશીલ રસાયણોનો ઉપયોગ થાય છે. જેને કારણે આગ ઝડપથી ભભૂકી ઉઠી હતી. થોડી જ વારમાં આખી ફેક્ટરી આગની લપેટમાં આવી ગઈ હતી. આગ ફાટી નીકળતા અરાજકતા ફેલાઈ ગઈ હતી. પોતાનો જીવ બચાવવા માટે શ્રમિક મહિલાઓ બિલ્ડીંગની છત પર ચઢી ગઈ હતી અને કૂદી પડી હતી. આ દરમિયાન મોટાભાગની મહિલાઓને ઈજા થઈ હતી. કેટલાકને પગમાં, કોઈને હાથમાં અને અમુકને કરોડરજ્જુમાં ફ્રેક્ચર થયું હતું.
ઘટનાની માહિતી મળતા જ ફાયર બ્રિગેડ અને પોલીસની ટીમ ઘટના સ્થળે પહોંચી ગઈ હતી. ઘણા વરિષ્ઠ અધિકારીઓ પણ ઘટનાસ્થળે પહોંચ્યા અને મામલાની તપાસ કરી અને ઘાયલોને હોસ્પિટલ મોકલ્યા હતા. ઘાયલોને અલગ-અલગ હોસ્પિટલમાં દાખલ કરવામાં આવ્યા છે. હાલ તેમની સારવાર ચાલી રહી છે.
આ ઘટના અંગે હિમાચલ પ્રદેશના ઉપમુખ્યમંત્રી મુકેશ અગ્નિહોત્રીએ કહ્યું કે શુક્રવારે દિવસ દરમિયાન અહીં આગ લાગી હતી. મળતી માહિતી મુજબ અત્યાર સુધીમાં 5 લોકોના મોત થયા છે. 30 જેટલા લોકો જીવ બચાવવા છત પરથી કૂદી પડયા હતા જેને કારણે તેઓને ઘણી ઈજાઓ થઈ છે.
ઉપમુખ્યમંત્રીએ કહ્યું છે કે ઘાયલોની સારવાર ચાલી રહી છે. 4 લોકો હજુ પણ લાપતા છે. પોલીસે ફેક્ટરીના મેનેજરની અટકાયત કરી છે. તેની પૂછપરછ ચાલુ છે. પોલીસ અધિકારીઓ સ્થળ પર હાજર છે. મામલાની તપાસ માટે SITની રચના કરવામાં આવી છે.
