ખાનગી એજન્સી અમને ભણાવતી તો હતી, યુનિ.એ તો રખડતાં કરી દીધાં :

• પૂર્વ VCએ મૂકેલી એજન્સીને નવા VCએ હટાવી, વિદ્યાર્થી ભોગ બન્યા
• જે પ્રોફેસરો મુકાયા છે તેઓને ભણાવતા આવડતું ન હોવાની વિદ્યાર્થીઓની ફરિયાદ
  
• નવા કુલપતિ બિરાજમાન થતાની સાથે તેમને ખાનગી એજન્સીને હટાવી દીધી
  

ગુજરાત યુનિવર્સિટીના પૂર્વ કુલપતિ દ્વારા 45થી વધુ હાયર પેમેન્ટ કોર્સિસ ચલાવવા માટે એક ખાનગી એજન્સીને ગોઠવી હતી. એ પછી નવા કુલપતિ બિરાજમાન થતાની સાથે તેમને ખાનગી એજન્સીને હટાવી દીધી. ખાનગી એજન્સીને હટાવતી વખતે સત્વરે વૈકલ્પિક વ્યવસ્થા ન કરાતાં લાખો રૂપિયા ફી ચુકવેલ વિદ્યાર્થીઓ તેનો ભોગ બન્યાં છે. છેલ્લા 2 મહિનાથી આ વિદ્યાર્થીઓને ભણાવવાનું જ બંધ કરી દેવાયું છે. જેની સામે યુનિ. દ્વારા એવો પણ બચાવ કરાઈ રહ્યો છે કે, ફેકલ્ટીની નિયુક્તિ કરાઈ છે. પરંતુ વિદ્યાર્થીઓ દ્વારા જે આક્ષેપ કરાઈ રહ્યાં છે એ મુજબ હજુ તમામ કોર્સ, તમામ સેમેસ્ટરમાં ફેકલ્ટી નથી અને જેમાં છે એ પ્રોફેસર સમયસર હાજર રહેતા નથી. એટલુ જ નહી મુકાયેલ ફેકલ્ટી લાયકાત વિનાની હોવાના પણ વિદ્યાર્થીઓએ આક્ષેપ કર્યાં છે. આ અંગે રજિસ્ટ્રાર પીયૂષ પટેલે જણાવ્યુ હતુ કે, વિદ્યાર્થીઓએ અમને આજે રજુઆત કરી હતી, જે અન્વયે નિયમિત વર્ગો લેવાય એ માટે સંબંધિત વિભાગના વડાને સુચના અપાઈ છે.

ડેટા મેનેજમેન્ટના છઠ્ઠા સેમેસ્ટરમાં આવેલા એક વિદ્યાર્થીએ તેની આપવિતી જણાવી હતી કે, અમારી પાસે 1 સેમેસ્ટરની ફી રૂ.50 હજાર એટલે કે, વાર્ષિક ફી રૂ.1 લાખ વસુલવામાં આવે છે. અમારા જુનિયર વિદ્યાર્થીઓ પાસે સેમેસ્ટર દીઠ રૂ.65 હજાર લેખે ફી વસુલાય છે. અમારા વર્ગમાં 150 વિદ્યાર્થી અભ્યાસ કરી રહ્યાં છે, જેઓના પાંચમાં સેમેસ્ટરની પરીક્ષા ગત તા.7 ડિસેમ્બરના રોજ પૂર્ણ થઈ હતી. દરમિયાન અમને જણાવાયું હતુ કે, અત્યારે તમારુ વેકેશન પડે છે, આગામી 15 જાન્યુઆરીથી તમારુ છઠ્ઠુ સેમેસ્ટર શરૂ થઈ જશે. આ દરમિયાન ગુજરાત યુનિવર્સિટી દ્વારા અમારો કોર્સ ચલાવતી ખાનગી એજન્સીને દુર કરી હતી. જેથી અમને રાહત થઈ હતી કે, હવે ખાનગી એજન્સી નહી પણ સરકાર અમારો કોર્સ ચલાવશે અને તેમાં ફીને લઈ પણ રાહત થશે. એ પછી અમને એવી જાણ કરાઈ હતી કે, તમારુ શૈક્ષણિક કાર્ય હવે 21મી જાન્યુઆરીએ શરૂ થશે, એ પછી ફરી 16 જાન્યુઆરીના રોજ મેસેજ આવ્યો કે, હવે 21ના બદલે 29મીથી ભણાવવાનું શરૂ થશે. 29મીએ અમે સવારે 8થી 12ના સમય મુજબ ડિપાર્ટમેન્ટ ઉપર પહોચી ગયા હતા, પરંતુ ત્યાં અમને ભણાવવાવાળુ તો દુર સાંભળવા વાળુ પણ કોઈ મળ્યુ નહી. સાડા ત્રણ કલાક સુધી રાહ બાદ અમને 11:30 વાગે જાણ કરાઈ કે, 12 વાગે તમારૂ ઓરિએન્ટેશન છે, જે દર વખતે નવા સેમેસ્ટર શરૂ થયા પહેલાની પ્રક્રિયા હતી. જેમાં અમને અભ્યાસક્રમ, પરીક્ષા સહિતની તમામ માહિતી અપાતી હતી, પરંતુ આમા તો માત્ર 10 જ મિનિટમાં અમને એવુ કહી છુટા કરી દેવાયા કે, તમારૂ એક વોટ્સએપ ગ્રુપ બનાવાશે અને તેમા સુચના મોકલાશે. એ પછી વારંવાર રજૂઆત કર્યા બાદ માત્ર અભ્યાસક્રમના વિષય જણાવવામાં આવ્યા છે. ભણાવવાનુ શરૂ કરવાની વાત તો દુર ડિસેમ્બરમાં લેવાયેલી પરીક્ષાનું પરિણામ પણ જાહેર કર્યુ નથી. અમારા જેવા અંદાજે 3થી 4 હજાર વિદ્યાર્થીઓના ભાવી સાથે ચેડા કરાત હોવાનું આ વિદ્યાર્થીએ જણાવ્યું હતું.

ફેકલ્ટી લાયકાત વિનાની હોવાના વિદ્યાર્થીઓના આક્ષેપ

બી.ડીઝાઈનમાં પ્રોડક્ટમાં ચોથા સેમેસ્ટરમાં અભ્યાસ કરતા એક વિદ્યાર્થીએ જણાવ્યુ હતુ કે, અત્યારે અમને એક મહિલા ફેકલ્ટી મળ્યા છે જેઓને અમે ગ્રુપમા ક્લાસના સમય અંગે પૂછયુ હતુ. જેમાં તેમણે પ્રથમ 11 વાગ્યાનું કહ્યુ, એ પછી 11:20 એ ફરી મેસેજ કરે છે કે, 12 વાગે છે, પછી કહે છે કે, 1 વાગે છે. એટલુ જ નહી, તેઓ જે મેસેજનો જવાબ આપતા હતા એમા પણ ખોટા સ્પેલિંગ લખતા હતા.