- નેધરલેન્ડ અને અફઘાનિસ્તાન વચ્ચે મેચ
- લખનઉના ઈકાના ક્રિકેટ સ્ટેડિયમમાં મેચ
- વનડેમાં આ બંને ટીમો વચ્ચે કુલ 9 મેચ રમાઈ
અફઘાનિસ્તાન અને નેધરલેન્ડ વચ્ચે આજે વર્લ્ડકપની 34મી મેચ રમવામાં આવશે. આ મેચ લખનઉના ઈકાના સ્ટેડિયમમાં રમવામાં આવશે. જેના માટે ટોસ થયો છે. જે નેધરલેન્ડે જીતીને પહેલાં બેટિંગ કરવાનો નિર્ણય લીધો છે. ઉલ્લેખનીય છે કે, અફઘાનિસ્તાન આજે મેચ જીતશે, તો તેના માટે સેમીફાઈનલમાં પહોંચવાનો રસ્તો ખુલ્લો રહેશે.
આજે વનડે વર્લ્ડકપ 2023માં નેધરલેન્ડ અને અફઘાનિસ્તાન વચ્ચેની મેચ લખનઉના ઈકાના સ્ટેડિયમમાં બપોરે 2 વાગ્યે રમાશે. આ બંને ટીમો પહેલીવાર વર્લ્ડકપમાં આમને-સામને આવશે. અફઘાનિસ્તાને ટૂર્નામેન્ટમાં 6માંથી ત્રણ મેચ જીતી છે, જ્યારે નેધરલેન્ડે 6માંથી 2 મેચ જીતી છે.
અફઘાનિસ્તાન માટે સેમીફાઈનલમાં પહોંચવાની તક
આજની મેચ અફઘાનિસ્તાન માટે ખૂબ જ ખાસ બની રહી છે કારણ કે અફઘાનિસ્તાન માટે હજુ પણ સેમીફાઈનલમાં પહોંચવાની તક છે, જો ટીમ આજે જીતશે તો તે સેમીફાઈનલ તરફ મજબૂત પગલું ભરશે. બીજી તરફ નેધરલેન્ડ પણ સેમીફાઈનલની રેસમાં છે પરંતુ તેની પાસે એટલી તકો નથી કારણ કે નેધરલેન્ડ માત્ર 2 મેચ જીતી શક્યું છે. આવી સ્થિતિમાં હવે નેધરલેન્ડની ટીમ ચેમ્પિયન્સ ટ્રોફી માટે ક્વોલિફાય કરવાનો પ્રયાસ કરશે.
બંને ટીમનો હેડ ટુ હેડ રેકોર્ડ
વનડે ક્રિકેટમાં આ બંને ટીમો વચ્ચે અત્યાર સુધી 9 મેચ રમી છે. જેમાં અફઘાનિસ્તાને 7 મેચ અને નેધરલેન્ડે 2 મેચ જીતી છે. બંને ટીમો વચ્ચે છેલ્લી વનડે મેચ જાન્યુઆરી 2022માં રમી હતી. આ ઉપરાંત આ બંને ટીમો વર્લ્ડકપમાં પહેલીવાર આમને સામને આવી રહી છે. આવી સ્થિતિમાં બંને ટીમો વર્લ્ડકપમાં એકબીજા સામે જીત સાથે શાનદાર શરૂઆત કરવા માંગશે.
બંને ટીમના ટોચના ખેલાડીઓ
હશમતુલ્લાહ શાહિદી અને ગુરબાઝ અફઘાનિસ્તાન તરફથી બેટિંગમાં શાનદાર ફોર્મમાં છે અને ટીમ માટે સતત રન પણ બનાવી રહ્યા છે. હશમતુલ્લાહ શાહિદી વર્લ્ડકપ 2023માં અફઘાનિસ્તાન માટે સૌથી વધુ રન બનાવનાર બેટ્સમેન પણ છે. આ સિવાય રાશિદ ખાન શાનદાર બોલિંગ કરી રહ્યો છે. આ વર્લ્ડકપમાં રાશિદના નામે અત્યાર સુધી 7 વિકેટ છે.
જો આપણે નેધરલેન્ડના ખેલાડીઓની વાત કરીએ તો ટીમના કેપ્ટન સ્કોટ એડવર્ડ્સ શાનદાર બેટિંગ કરી રહ્યો છે અને તેણે આ વર્લ્ડકપમાં અત્યાર સુધીમાં 204 રન બનાવ્યા છે જેમાં બે ફિફ્ટી સામેલ છે. બોલિંગમાં, બાસ ડી લીડે સારા ફોર્મમાં છે અને તે પહેલાથી જ 11 વિકેટ પોતાના નામે કરી ચૂક્યો છે.
બંને દેશની પ્લેઈંગ ઈલેવન-
નેધરલેન્ડ- વેસ્લે બેર્રેસી, એક્સ ઓ’ડોડ, કોલિન એકરમેન, સાઈબ્રાંડ એંગલબ્રેટ, સ્કોટ એડવર્ડ્સ(કેપ્ટન અને વિકેટકીપર), બાસ ડી લીડે, સાકિબલ ઝુલ્ફિકાર, લોગન વેન બીક, રૂલોફ વેન ડેર મેરવે, આર્યન દત્ત, પોલ વેન મીકેરેન
અફઘાનિસ્તાન- રહમાનુલ્લાહ ગુરબાઝ, ઈબ્રાહિમ ઝાદરાન, રહમત શાહ, હશતુલ્લાહ શાહીદી(કેપ્ટન), અઝમતુલ્લાહ ઓમરઝાઈ, ઈકરામ અલીખિલ(વિકેટકીપર), મોહમ્મદ નબી, રાશિદ ખાન, મુઝીબ ઉર રહેમાન, ફઝહલક ફારૂકી, નૂર અહેમદ
