- અફઘાનિસ્તાન વિજય મેળવવાની સાથે નેટ રનરેટ સુધારવાનો પણ પ્રયાસ કરશે
- અફઘાનિસ્તાનના છ પોઇન્ટ અને નેધરલેન્ડ્સના ચાર પોઇન્ટ છે
- અફઘાન ટીમે રમત પ્રત્યેના પોતાના સકારાત્મક અભિગમથી તમામને પ્રભાવિત કર્યા છે
અફઘાનિસ્તાનની ટીમ પોતાના ઘાતક સ્પિન આક્રમણના કારણે શુક્રવારે નેધરલેન્ડ્સ સામે રમાનારી વર્લ્ડ કપની મેચમાં ઇકાનાની પેચિદી પિચ ઉપર વિજય માટેની દાવેદાર તરીકે મેદાનમાં ઊતરશે. અફઘાનિસ્તાનની ટીમ આ મેચમાં બે મહત્ત્વપૂર્ણ પોઇન્ટ હાંસલ કરવા ઉપરાંત પોતાનો નેટ રનરેટ પણ સુધારવાનો પ્રયાસ કરશે. અફઘાનિસ્તાનના છ પોઇન્ટ અને નેધરલેન્ડ્સના ચાર પોઇન્ટ છે જેના કારણે સેમિફાઇનલની રેસમાં જારી રહેવા માટે અફઘાન ટીમ મોટા માર્જિનથી વિજય હાંસલ કરવાનો પ્રયાસ કરશે. ટોચના બેટ્સમેનોએ પાકિસ્તાન અને શ્રીલંકા સામેના વિજયમાં જે ભૂમિકા અદા કરી હતી તેવી વધુ એક વખત કરવાનો પ્રયાસ કરશે. આ મુકાબલો બપોરે 2:00 વાગ્યાથી શરૂ થશે.
એશિઝ જીતનાર ઇંગ્લેન્ડની ટીમનો હિસ્સો રહી ચૂકેલો જોનાથાન ટ્રોટ અફઘાનિસ્તાનનો કોચ છે અને તેણે ટીમના ખેલાડીઓમાં વિજય મેળવવાનું ઝનૂન પેદા કર્યું છે. અફઘાન ટીમે રમત પ્રત્યેના પોતાના સકારાત્મક અભિગમથી તમામને પ્રભાવિત કર્યા છે. નેધરલેન્ડસ સામેની મેચ બાદ અફઘાનિસ્તાને સાતમી નવેમ્બરે ઓસ્ટ્રેલિયા અને 10મી નવેમ્બરે સાઉથ આફ્રિકા સામે રમવાનું છે. આ મેચોના પરિણામના આધારે અફઘાનિસ્તાન સેમિફાઇનલ માટે ક્વોલિફાય થશે કે નહીં તે નક્કી થશે.
નેધરલેન્ડ્સની ટીમે પણ સાઉથ આફ્રિકા અને બાંગ્લાદેશ સામે અપસેટ સર્જીને અન્ય ટીમોને ચકિત કરી દીધી છે. ડચ ટીમ માટે સેમિફાઇનલની તક નજીવી છે પરંતુ તે બાકીની મેચોમાં અન્ય ટીમોની ગણતરી બગાડી શકે છે. નેધરલેન્ડ્સ અંતિમ-4માં પહોંચે તો મોટો ચમત્કાર જ ગણાશે. સુકાની એડવર્ડ્સ નેધરલેન્ડ્સનો બેટિંગ સ્તંભ બની ચૂક્યો છે.
