- એસીબીના છટકામાં ઝડપાયો લાંચિયો અધિકારી
- CGST ઈન્સ્પેક્ટર 1.50 લાખની લાંચ લેતેા ઝડપાયો
- એસીબીએ ભ્રષ્ટ અધિકારીને ઝડપી પાડ્યો
અમદાવાદ લાંચ રૂશ્વત વિરોધી બ્યૂરોની ટીમ દ્વારા એક મોટી કાર્યવાહી કરવામાં આવી છે. એક CGST ઈન્સ્પેક્ટર 1.50 લાખની લાંચ લેતો રંગે હાથ ઝડપાઈ ગયો છે. આ મામલે હવે ACB દ્વારા આગળની કાર્યવાહી હાથ ધરવામાં આવશે.
હાલમાં ગુજરાતમાં લાંચિયા કર્મચારીઓ પકડાવાની ઘટનાઓ વધી રહી છે. આ ગુજરાતના સરકારી આલમમાં ભ્રષ્ટ અધિકારીઓની વધતી જતી સંખ્યા અને પહોંચને દર્શાવે છે. પરંતુ એસીબી દ્વારા આવા અધિકારીઓને રંગે હાથ પકડી પણ લેવામાં આવી રહ્યા છે. તેથી આવા તત્વોમાં કાયદાનો પણ ડર પેસે છે. આવી જ એક ઘટના હાલમાં અમદાવાદથી સામે આવી છે. જેમાં એક લાંચિયો ટેક્સ અધિકારી એસીબીએ ગોઠવેલા છટકામાં આબાદ રીતે ઝડપાઈ ગયો હતો અને તેને 1.50 લાખ રૂપિયાની લાંચ લેતા રંગે હાથ ઝડપી લેવામાં આવ્યો હતો.
આ ઘટનાની માહિતી પ્રમાણે એક વ્યક્તિ પાસેથી તેને રૂપિયા 15 લાખનો ટેક્સ ભરવાનો બાકી છે તેમ કહીને ડરાવવા અને ધમકાવવામાં આવી રહ્યો હતો. તેની પાસેથી પૈસાની વસૂલીને રોકવા માટે લાંચની માગણી કરવામાં આવી હતી. આ મામલે કંટાળીને ફરિયાદી દ્વારા અમદાવાદ લાંચ રૂશ્વત વિરોધી બ્યૂરોને આ મામલે ફરિયાદ કરવામાં આવી હતી. જેના પછી એસીબીએ એક્શનમાં આવીને આ લાંચિયા અધિકારીને ઝડપી લેવા માટે છટકું ગોઠવ્યું હતું.
મહત્વની વાત એ છે કે આ છટકામાં આ લાંચિયો CGST ઈન્સ્પેક્ટર આબાદ રીતે ઝડપાઈ ગયો હતો, અમદાવાદ એસીબીએ લાંચિયા અધિકારી અરવિંદ સિંહને લાંચ લેતા ઝડપી લીધો હતો. હવે તેની સામે કાયદેસરની કાર્યવાહી કરવામાં આવી શકે તેમ છે.
