Ahmedabad News: શહેરમાં મતદાનની નિરસતા દેખાતા કોર્પોરેટરની અનોખી પહેલ

અમદાવાદમાં મતદાન માટે કોર્પોરેટરની અનોખી પહેલ સામે આવી છે. જેમાં કોર્પોરેટરે ઘરે ઘરે જઇ મતદાન કરવા માટે અપીલ કરી છે. તેમાં અમરાઇવાડી કોર્પોરેટરે માઇકથી બોલી લોકોને અપીલ કરી છે. ગરમીમાં ઘરે ઘરે જઇને લોકોને મતદાન કરવા માટે અપીલ કરી છે.

ચૂંટણીપંચ દ્વારા મતદાનમાં લોકો વધુને વધુ ભાગ લે તે માટે અનોખી ‘અવસર ડિસ્કાઉન્ટ’ની શરૂઆત કરવામાં આવી છે. જેમાં મતદાર મતદાન કરીને આંગળી પર શાહીનું નિશાન બતાવીને દુકાનદારો પાસેથી ડિસ્કાઉન્ટ લઈ શકશે. દવાની દુકાનો, કરિયાણાની દુકાનો, પેટ્રોલપંપ તેમજ કપડાં સહિતના નાના-મોટા વ્યવસાય કરતાં વ્યવસાયકારો મતદાન જાગૃતિ અભિયાન ‘અવસર ડિસ્કાઉન્ટ’માં જોડાયા.

અમદાવાદ મ્યુનિસિપલ ટ્રાન્સપોર્ટ સર્વિસ કમિટીના ચેરમેન ધરમશી દેસાઈ દ્વારા જણાવવામાં આવ્યું છે કે, મતદાનના દિવસે જે નાગરિકો દ્વારા પોતાની આંગળીમાં મતદાન કર્યા અંગેની શાહી બતાવશે. તેઓને AMTS બસમાં મફતમાં મુસાફરી કરવા દેવામાં આવશે. જેથી એએમટીએસ દ્વારા અપીલ કરવામાં આવી છે કે વધુમાં વધુ મતદાન કરવામાં આવે અને આ તકનો લાભ ઉઠાવવામાં આવે.

ગુજરાત રાજ્ય હોટલ એસોસિયેશન દ્વારા પણ મતદાતા માટે ખાસ ઓફર જાહેર કરવામાં આવી છે. મતદાનના દિવસે ભોજનના બિલમાં 7-10 ટકાનું ડિસ્કાઉન્ટ આપવાની જાહેરાત કરવામાં આવી છે અને વધુમાં વધુ મતદાન થાય એ માટેની તમામ કામગીરીમાં સહભાગી બનવાની ખાતરી પણ આપી છે. આમ, ગુજરાત રાજ્ય હોટલ એસોસિયેશન દ્વારા સૌ નાગરિકોને વધુમાં વધુ મતદાન કરી લોકશાહીના મહાપર્વમાં સહભાગી બનવા અપીલ કરાઇ છે.

લોકશાહીના મહાપર્વમાં વધુ મતદાન ઝુંબેશમાં સહભાગી થવા ફેડરેશન ઓફ ગુજરાત સ્ટેટ કેમિસ્ટસ એન્ડ ડ્રગીસ્ટ એસોસિયેશનના સભ્યો દ્વારા મહત્વનો નિર્ણય કરવામાં આવ્યો છે. લોકશાહીના આ પર્વની ગર્વભેર ઉજવણી થાય અને નાગરિકો વધુમાં વધુ મતદાન કરે એ ઉદ્દેશ્યથી ફેડરેશન ઓફ ગુજરાત સ્ટેટ કેમિસ્ટસ એન્ડ ડ્રગીસ્ટ એસોસિયેશન દ્વારા મતદાન કરેલ દરેક મતદાતાને મતદાનના દિવસે દવાના બિલ પર 7-10 ટકાનું ડિસ્કાઉન્ટ આપવાની જાહેરાત કરવામાં આવી છે.