ગુજરાત અને સમગ્ર ભારત માટે ગૌરવપૂર્ણ સમાચાર છે કે, અમદાવાદને વર્ષ 2030ની કોમનવેલ્થ ગેમ્સ (CWG 2030) ની યજમાની મળી છે. આ જાહેરાત માત્ર પ્રતિષ્ઠાનો વિષય નથી, પરંતુ શહેરના ઇન્ફ્રાસ્ટ્રક્ચર અને રમતગમત ક્ષેત્ર માટે એક મોટો માઈલસ્ટોન છે. કોમનવેલ્થ ગેમ્સનું સફળ આયોજન કરવા માટે અમદાવાદમાં મોટાપાયે પૂર્વ તૈયારીઓ શરૂ કરી દેવામાં આવી છે. આ તૈયારીઓ શહેરને આંતરરાષ્ટ્રીય સ્તરના ‘ગ્લોબલ મલ્ટી સ્પોર્ટ્સ હબ’ તરીકે સ્થાપિત કરશે.
સ્પોર્ટ્સ ઇન્ફ્રાસ્ટ્રક્ચર ડેવલપમેન્ટ પ્લાન
અમદાવાદની યજમાની માટેનો મુખ્ય આધાર તેનો મજબૂત સ્પોર્ટ્સ ઇન્ફ્રાસ્ટ્રક્ચર ડેવલપમેન્ટ પ્લાન રહ્યો છે, જેમાં ઘણી બાબતો પર વિશેષ ધ્યાન આપવામાં આવ્યું છે. આ માટે ઘણી નવી આધુનિક સુવિધાઓ ઉભી કરવામાં આવશે.
સરદાર વલ્લભભાઈ પટેલ સ્પોર્ટ્સ એન્ક્લેવ
આ ગેમ્સનું કેન્દ્રબિંદુ બનશે. તેમાં વિશ્વનું સૌથી મોટું નરેન્દ્ર મોદી ક્રિકેટ સ્ટેડિયમ પહેલેથી જ અસ્તિત્વમાં છે. આ સંકુલમાં એક હાઇ-ટેક એક્વેટિક્સ સેન્ટર, અત્યાધુનિક ફૂટબોલ સ્ટેડિયમ અને બે વિશાળ ઇન્ડોર એરેના જેવી અન્ય આધુનિક સુવિધાઓ વિકસાવવામાં આવી રહી છે
એથ્લેટ્સ વિલેજનું નિર્માણ
ખેલાડીઓને શ્રેષ્ઠ સુવિધા મળી રહે તે માટે સ્પોર્ટ્સ એન્ક્લેવની અંદર 3,000 ખેલાડીઓને સમાવવાની ક્ષમતા ધરાવતું એક વિશાળ એથ્લેટ્સ વિલેજ બનાવવામાં આવશે.
જમીન સંપાદન
રમતગમતના માળખાકીય સુવિધાઓ અને અન્ય આનુષંગિક પ્રોજેક્ટ્સ માટે જરૂરી જમીન સંપાદનની પ્રક્રિયા પર ભાર મૂકવામાં આવ્યો છે.
સ્પેશિયલ ટાઉન પ્લાનિંગ સ્કીમ્સ
ગેમ્સને ધ્યાનમાં રાખીને શહેરી વિકાસ અને આયોજનને વેગ આપવા માટે વિશેષ ટાઉન પ્લાનિંગ સ્કીમ્સનો પ્રોગ્રેસ ઝડપી કરવામાં આવ્યો છે.
માળખાકીય સુધારા
અમદાવાદમાં મેટ્રો રેલ, BRTS અને રોડ ઇન્ફ્રાસ્ટ્રક્ચર, તેમજ પાણી અને ડ્રેનેજ સિસ્ટમ જેવા પાયાના માળખામાં પણ મહત્ત્વપૂર્ણ સુધારા કરવામાં આવી રહ્યા છે, જે શહેરની પરિવહન અને લોજિસ્ટિક્સ વ્યવસ્થાને મજબૂત બનાવશે.
વહીવટી અને ટેકનિકલ વ્યવસ્થા
ગેમ્સની ટેકનિકલ વ્યવસ્થા, વહીવટી તંત્ર અને ખેલાડીઓના અનુભવને વિશ્વસ્તરીય બનાવવા માટે આયોજન કરવામાં આવી રહ્યું છે. આ તૈયારીઓ ભારતને માત્ર કોમનવેલ્થ ગેમ્સ માટે જ નહીં, પરંતુ 2036 ઓલિમ્પિક ગેમ્સના આયોજનના સપના તરફ પણ એક મજબૂત પગલું ભરવામાં મદદ કરશે.
