કામના બહાને રસોડામાં બોલાવી નશીલું પીણું પીવડાવી હેવાનિયત આચરી
આહવાની ડાંગ સ્વરાજ આશ્રમશાળામાં વિદ્યાર્થીની પર ટ્રસ્ટીએ દુષ્કર્મ ગૂજાર્યુ
રસોઇ બનાવતી મહિલા અને ટ્રસ્ટી વિરૂધ્ધ પોકસો એકટ હેઠળ ગુનો નોંધાયો
અગ્ર ગુજરાત, ગાંધીનગર
ડાંગ જિલ્લાના આહવા ખાતે આવેલી ડાંગ સ્વરાજ આશ્રમશાળામાં એક સગીરા પર દુષ્કર્મ આચરવામાં આવ્યું છે. આ ઘટનામાં આશ્રમશાળાના ટ્રસ્ટી અને રસોઈ બનાવનાર મહિલા વિરુદ્ધ પોક્સો એક્ટ હેઠળ ગુનો નોંધવામાં આવ્યો છે. આ ઘટનાને પગલે સમગ્ર જિલ્લામાં આક્રોશ જોવા મળી રહ્યો છે.
સાતથી આઠ દિવસ અગાઉ આશ્રમશાળાની અન્ય વિદ્યાર્થિનીઓ સફાઈના કામમાં રોકાયેલી હતી. ત્યારે આશ્રમશાળામાં રસોઇ બનાવતા સોનલબેને એક 15 વર્ષીય સગીરાને કામના બહાને રસોડામાં બોલાવી હતી અને તેને નશીલું પીણું પીવડાવ્યું હતું, જેના કારણે સગીરા બેભાન જેવી અવસ્થામાં પહોંચી ગઈ હતી.
આ સ્થિતિનો લાભ લઈને આશ્રમશાળાના મહિલા પ્રમુખનો પતિ અને ટ્રસ્ટી પ્રફુલ નાયક સગીરાને પોતાના રૂમમાં લઈ ગયો હતો અને ત્યાં તેણે સગીરાની અચેતન સ્થિતિનો લાભ ઉઠાવીને તેની પર દુષ્કર્મ આચર્યું હતું. આ ઘટનાની જાણ પીડિત સગીરાના પરિવારજનોને થતાં તેઓ આદિવાસી સમાજના આગેવાનો સાથે આહવા પોલીસ મથકે ફરિયાદ નોંધાવી હતી.
આહવા પોલીસે આરોપી પ્રફુલ નાયક અને તેને મદદ કરનાર સોનલબેન વિરુદ્ધ પોક્સો એક્ટ સહિતની કલમો હેઠળ ગુનો દાખલ કરી પ્રફુલ નાયકની ધરપકડ કરી છે અને સોનલબેનની ધરપકડ કરવાની કાર્યવાહી તજવીજ હાથ ધરી છે. હાલ પોલીસે પીડિત સગીરાનું મેડિકલ પરીક્ષણ કરાવીને આગળની વધુ તપાસ હાથ ધરી છે.
આ અંગે ડાંગ એસ.પી. પૂજા યાદવે જણાવ્યું કે, ડાંગ સ્વરાજ આશ્રમમાં ભણતી એક 15 વર્ષની છોકરીની સાથે રેપની ફરિયાદ એમના માતા દ્વારા આપવામાં આવી છે, એમાં ડાંગ સ્વરાજ આશ્રમના ટ્રસ્ટી દ્વારા જ બાળકી ઉપર રેપ કરવામાં આવ્યો છે. જેમાં BNSની કલમ 64, 65 અને 123 મુજબ અને એટ્રોસિટીની કલમ પણ એમાં એડ કરવામાં આવી છે.
આરોપીઓને કડક સજા મળે તેવી કાર્યવાહી કરાશો
એસ.પી. પૂજા યાદવે વધુમાં જણાવ્યું કે, પોલીસે તાત્કાલિક મુખ્ય આરોપીની ધરપકડ કરી છે અને બીજા આરોપીની ધરપકડની કાર્યવાહી ચાલું છે. આ કેસની તપાસ હાલ dy.sp SC ST સેલ પાસે છે. આરોપીઓને કડકમાં કડક સજા મળે એવી કાર્યવાહી કરવામાં આવશે. આશ્રમશાળામાં બીજા કોઈ સાથે પણ આવો બનાવ બન્યો છે કે નહીં એની પણ તાપસ કરવામાં આવશે.
