અલ્પના મિત્રને કલીન ચીટ મળશે? : મનપાના વર્તુળોમાં ચર્ચા શરૂ

ફાઇલકાંડમાં નવ ઇજનેરોએ બિલ પાસ કરાવવામાં ગંભીર વહિવટી બેદરકારી દાખવ્યાનું બહાર આવ્યું છે

રાજકોટ મનપામાં જેમના નામના સિક્કા પડતા હતા તે નિવૃત સિટિ ઇજનેર અલ્પના મિત્રાને ફાઇલકાંડમાં કલીનચીટ મળી જશે તેવી વાતો મનપાના વર્તુળોમાં ચર્ચાવા માંડી છે. નિવૃત સિટી ઈજનેરે કરોડો રૂ।.ના વોટરવર્ક્સ અને ડ્રેનેજ મેઈન્ટનન્સના બિલોની મંજુરી માટે ફાઈલો પોતાના ઘરે મંગાવ્યાની ગંભીર ઘટના અન્વયે મ્યુનિ.કમિશનર દ્વારા વિજીલન્સ તપાસ સોંપાઈ છે જેનો રિપોર્ટ હજુ બાકી છે અને તપાસ પૂર્ણતાના આરે હોવાનું જાણવા મળે છે. પરંતુ, મહાપાલિકાના ઈજનેરો સહિતના સૂત્રોમાંથી આજ સુધી મળેલી વિગતો પરથી નીકળતા તારણ મૂજબ ફાઈલ કાંડમાં અલ્પના મિત્રાને સાગઠીયા જેવી ગુનાહિત બેદરકારીમાંથી ક્લીન ચીટ મળી જવાના એંધાણ મળ્યા છે. 

અનેકવિધ સૂત્રોનો સંપર્ક સાધતા પ્રાપ્ત વિગત અનુસાર કૂલ 37 ફાઈલો અને 58 રજીસ્ટર,એમ.બી. કબજે કરાઈ છે તેમાં હજુ સુધી અલ્પના મિત્રાએ ઘરે સહી કરી હોય તેવી એક પણ ફાઈલ મળી નથી. જો કે, અલ્પના મિત્રાએ ઈજનેરોને સહી કરવા માટે ઘરે બોલાવ્યા અને તેમના બંગલામાંથી પણ ફાઈલ કબજે કરાઈ છે ત્યારે આ કૃત્ય શિસ્તભંગ,નિયમભંગનું પ્રથમનજરે જ દેખાય છે.  અલ્પના મિત્રાએ આ માટે મ્યુનિ.કમિશનરની પૂર્વ મંજુરી લેવાની હતી પરંતુ, તે લીધી નથી તે બહાર આવી ગયું છે. 

બીજી તરફ, આ નિવૃત સિટી ઈજનેરના ઘરે ફાઈલ લઈને પહોંચેલા 9 એન્જિનિયરો,માં નાયબ કાર્યપાલક ઈજનેરો કપિલ જોષી, દિવ્યેશ ત્રિેદી, વી.એચ.ઉમટ, એચ.એમ.ખખ્ખર તથા અધિક મદદનીશ ઈજનેરોમાં અશ્વીન કણજારીયા, હિરેનસિંહ જાડેજા, દેવરાજ મોરી, આસિ.એન્જિનિયર રાજેશ રાઠોડ અને વર્ક આસિસ્ટન્ટ અંકિત તળાવીયાએ ઓફિસના મહત્વના દસ્તાવેજો કોઈની પણ મંજુરી વગર ઓફિસ બહાર નિવૃત અધિકારીના ઘરે લઈ જવાનો શિસ્તભંગ આચર્યો છે. ઉપરાંત સંબંધિતોનો સંપર્ક સાધતા જણાવ્યા અનુસાર આ બિલો સહી કરાવવા મિત્રાના ટેબલ પર મુકાયાનું જણાવતા ઈજનેરોએ આ અન્વયે જરૂરી નોંધ કરાવી નહીં હોવાનું પણ જાણવા મળ્યું છે. 

એકંદરે અગ્નિકાંડમાં જેમ પોલીસ કમિશનરની જવાબદારી ન ઠરી, મ્યુનિ.કમિશનરની હજુ સુધી જવાબદારી નક્કી કરીને પગલા નથી લેવાયા અને પદાધિકારીઓની તો કોઈ જ જવાબદારી નથી દેખાઈ તેમ હવે ફાઈલ કાંડમાં પણ વગદાર પૂર્વ અધિકારી  મુક્ત થઈ જશે કે હળવા પગલા લેવાશે તેના પર મીટ મંડાઈ છે.