અમેરિકાએ ફરી એકવાર પાકિસ્તાનને ઈરાન સાથેના સહયોગ સામે ચેતવણી આપી છે. ઈરાન-પાકિસ્તાન ગેસ પાઈપલાઈન એ પાકિસ્તાનની ઉર્જા જરૂરિયાતોને પહોંચી વળવા માટે એક મહત્વપૂર્ણ પ્રોજેક્ટ છે જે અમેરિકન આપત્તિઓને કારણે લાંબા સમયથી અટવાયેલો છે. અમેરિકાની નવી ચેતવણીથી હવે પાકિસ્તાનની ચિંતામાં વધારો થશે.
ઈરાન વિરુદ્ધ અમારા પ્રતિબંધો ચાલુ રહેશે
અમેરિકાના વિદેશ મંત્રાલયના પ્રવક્તા મૈથ્યૂ મિલરે હાલમાં એક પ્રેસ કોન્ફરન્સમાં ગેસ પાઇપલાઇન પર ટિપ્પણી કરી છે. પ્રેસ કોન્ફરન્સને સંબોધતા તેમણે કહ્યું કે, ‘અમે ઈરાન વિરુદ્ધ અમારા પ્રતિબંધો ચાલુ રાખીશું. આ ઉપરાંત, જેઓ ઈરાન સાથે વેપાર કરે છે તેઓએ તે કરારોની સંભવિત અસરથી વાકેફ હોવું જોઈએ.
2010માં કરાર થયો હતો
અમેરિકાએ લાંબા સમયથી પ્રતિબંધો દ્વારા ઈરાન પર દબાણ કરવાનું ચાલુ રાખ્યું છે. જેના કારણે ઈરાન-પાકિસ્તાન ગેસ પાઈપલાઈન પ્રોજેક્ટને ગંભીર અસર થઈ છે. ઈરાન-પાકિસ્તાને 2010માં પ્રોજેક્ટ ડીલ પર હસ્તાક્ષર કર્યા હતા. જે અંતર્ગત નક્કી કરવામાં આવ્યું હતું કે, ઈરાન પાકિસ્તાનને દરરોજ 750 મિલિયનથી 1 બિલિયન ફૂટ કુદરતી ગેસ સપ્લાય કરશે. પાઇપલાઇન નાખવાની અંતિમ તારીખ 2014 હતી અને ગેસ સપ્લાયનો સોદો 25 વર્ષનો હતો.
હજુ સુધી પાઈપલાઈન નાખવામાં આવી નથી
આ પાઈપલાઈન 1,900 કિલોમીટર લાંબી બનવાની હતી. જેમાંથી 1,150 કિલોમીટર ઈરાનમાં અને 781 કિલોમીટર પાકિસ્તાનમાં નાખવાની હતી. આ પાઈપલાઈન ઈરાનના દક્ષિણ પારસ ગેસ ફિલ્ડથી પાકિસ્તાનના ગ્વાદર સુધી લંબાવવાની હતી. એક દાયકાથી વધુ સમય વીતી જવા છતાં પણ પાકિસ્તાન પાઇપલાઇન નાખવાનું કામ શરૂ કરી શક્યું નથી. જ્યારે ઈરાને પાઈપલાઈનનું કામ લગભગ પૂર્ણ કરી લીધું છે.
પાઇપલાઇનની લંબાઈ માત્ર 80 કિલોમીટર જ રાખશે
પાકિસ્તાનનું કહેવું છે કે, ઈરાન પર અમેરિકાના પ્રતિબંધોને કારણે તે નિર્ધારિત સમયમાં આ પ્રોજેક્ટ પૂરો કરી શક્યું નથી. આ વર્ષની શરૂઆતમાં પાકિસ્તાને કહ્યું હતું કે, તે પાઇપલાઇનની લંબાઈ માત્ર 80 કિલોમીટર જ રાખશે. પાકિસ્તાનના સ્થાનિક મીડિયાના અહેવાલ અનુસાર આ પ્રોજેક્ટ આગામી 24 મહિનામાં 44 અરબ પાકિસ્તાની રૂપિયાના ખર્ચે પૂર્ણ થશે.
પાકિસ્તાનને અમેરિકાની ચેતવણી અને ખાતરી
અમેરિકાના વિદેશ મંત્રાલયના પ્રવક્તાએ ઈરાન સાથે સહયોગ સામે ચેતવણી આપતા પાકિસ્તાનને ઉર્જા સુરક્ષાની ખાતરી પણ આપી છે. તેમણે કહ્યું કે, ‘અમે ઉર્જા સુરક્ષાના મુદ્દે પાકિસ્તાન સરકાર સાથે વાત કરી રહ્યા છીએ.’જ્યારે પાકિસ્તાન ઈરાન સાથે ગેસ પાઈપલાઈન પ્રોજેક્ટ પૂર્ણ કરવા માટે નવી સમયમર્યાદા નક્કી કરી રહ્યું છે, ત્યારે અમેરિકાની આ નવી ચેતવણીને કારણે તેની મુશ્કેલીઓ વધવાની નક્કી છે.
