હજી તો થોડા સમય પહેલા જ અમેરિકાની રાજધાની વોશિંગ્ટનમાં રીગન નેશનલ એરપોર્ટ નજીક એક મોટી વિમાન દુર્ઘટના બની હતી. ત્યારે હવે વધુ એકવાર અમેરિકાના ફિલાડેલ્ફિયામાં ફરી એકવાર વિમાન અકસ્માત થયો હોવાનું સામે આવ્યું છે. શુક્રવારે ફિલાડેલ્ફિયામાં એક નાનું મેડેવેક જેટ ક્રેશ થયું.
વિસ્ફોટ થતા આગ લાગી
આ અકસ્માત પેન્સિલવેનિયાના ફિલાડેલ્ફિયામાં રૂઝવેલ્ટ મોલ નજીક થયો હતો. વિમાન દુર્ઘટનાને કારણે એક મોટો વિસ્ફોટ થયો, જેના કારણે ઘણા ઘરોમાં આગ લાગી ગઈ.મહત્વનું છે કે આ પહેલા બુધવારે અમેરિકામાં એક ખતરનાક વિમાન અકસ્માત થયો હતો જેમાં એક વિમાન અને હેલિકોપ્ટર અથડાયા હતા અને આ અકસ્માતમાં 67 લોકોના મોત થયા હતા.
વિમાન દુર્ઘટના ક્યાં થઈ?
ફેડરલ એવિએશન એડમિનિસ્ટ્રેશને વિદેશી મીડિયાને જણાવ્યું હતું કે લિયરજેટ 55 માં બે મુસાફરો સવાર હતા. આ જેટ ઉત્તરપૂર્વ ફિલાડેલ્ફિયા એરપોર્ટથી ઉડાન ભરી હતી અને મિઝોરીના સ્પ્રિંગફીલ્ડ-બ્રાન્સન એરપોર્ટ તરફ જઈ રહી હતી ત્યારે સાંજે 6:30 વાગ્યે તે ક્રેશ થયું. એક અહેવાલ મુજબ વિમાન કોટન એવન્યુ અને રૂઝવેલ્ટ બુલવર્ડ નજીક એરપોર્ટથી માત્ર 3 માઇલ દૂર ક્રેશ થયું હતું અને ત્યારબાદ એક મોટો વિસ્ફોટ થયો હતો. વિસ્ફોટને કારણે ઘણા ઘરોમાં આગ પણ લાગી ગઈ. ઘણા લોકોના મોતના અહેવાલો પણ છે, પરંતુ હજુ સુધી કોઈના મોતની પુષ્ટિ થઈ નથી.
શું બોલ્યા ડોનાલ્ડ ટ્રમ્પ?
અમેરિકાના રાષ્ટ્રપતિ ડોનાલ્ડ ટ્રમ્પે ફિલાડેલ્ફિયા વિમાન દુર્ઘટનાની ઘટના પર કહ્યું કે તેઓ ફિલાડેલ્ફિયામાં વિમાન દુર્ઘટનાની ઘટનાથી દુઃખી છે. કેટલાક વધુ નિર્દોષ લોકો મૃત્યુ પામ્યા. આપણા લોકો મદદ કરવામાં વ્યસ્ત છે. ફિલાડેલ્ફિયાના ઇમરજન્સી મેનેજમેન્ટ ઓફિસે આ અકસ્માતને “મોટી ઘટના” ગણાવી હતી અને આ વિસ્તારમાં રસ્તાઓ બંધ હોવાની પુષ્ટિ કરી હતી. નેશનલ ટ્રાન્સપોર્ટેશન સેફ્ટી બોર્ડ (NTSB) એ જણાવ્યું હતું કે અકસ્માત અંગે માહિતી એકત્રિત કરવામાં આવી રહી છે. અકસ્માતનું કારણ નક્કી કરવા અને જાહેર સલામતી સુનિશ્ચિત કરવા માટે કામ ચાલી રહ્યું છે.
