- અમદાવાદના સ્ટ્રેટેજિક સ્થાનો પર ચાર્જિંગ સ્ટેશન ઉભા કરાશે
- આધુનિક EV સોલ્યુશન્સ માટે જાણીતી મોબિલેન કંપની છે
- નાગરિકોને પ્લગ એન્ડ પ્લે ચાર્જની સુવિધા ઉપલબ્ધ કરાવાશે
કેન્દ્રીય ગૃહમંત્રી અમિત શાહ 12 ફેબ્રુઆરીના રોજ અમદાવાદમાં 12 EV ચાર્જિંગ સ્ટેશનનું ઉદ્ઘાટન કરશે. મોબિલેન કંપની દ્વારા નિર્મિત આ ચાર્જિંગ સ્ટેશનોની મદદથી અમદાવાદની હવાને વધુ સ્વચ્છ બનાવવા તેમજ વડાપ્રધાન નરેન્દ્ર મોદીના 2070 સુધી ઝીરો કાર્બન ઉત્સર્જનના વિઝનને સાર્થક કરવાની દિશામાં મદદ મળશે. અમદાવાદના સ્ટ્રેટેજિક સ્થાનો પર આ ચાર્જિંગ સ્ટેશન ઉભા કરવામાં આવ્યા હોવાથી, નાગરિકોને બહોળી સુવિધાનો લાભ મળશે.
આધુનિક EV સોલ્યુશન્સ માટે જાણીતી મોબિલેન કંપની
ભારતમાં બહોળો વ્યાપ ધરાવતી અને તેના ફાસ્ટ ચાર્જિંગ અને આધુનિક EV સોલ્યુશન્સ માટે જાણીતી મોબિલેન કંપની દ્વારા આ સુવિધા વિકસિત કરવામાં આવી છે. આ 12 ચાર્જિંગ સ્ટેશન પર ભારતમાં પ્રથમ વખત, નાગરિકોને પ્લગ એન્ડ ચાર્જની સુવિધા મળશે, જેથી વધારે ગૂંચવણ વિના સહજતાથી વાહન ચાર્જિંગ થઇ શકશે. આ ચાર્જિંગ સ્ટેશન્સની મદદથી ટુ વ્હિલર, 3 વ્હિલર અને 4 વ્હિલર વાહનોને ચાર્જિંગ સુવિધા મળશે. તેના લીધે અમદાવાદમાં રહેતા અને બહારથી પ્રવાસ કરતા ટ્રાવેલર્સ માટે EV ચાર્જિંગની સમસ્યા દૂર થશે, અને રાજ્યમાં EV વેચાણને પ્રોત્સાહન મળશે.
મોબિલેનના સ્થાપક ગુંજન મહેતા
આ પ્રસંગે મોબિલેનના સ્થાપક ગુંજન મહેતાએ જણાવ્યું હતું કે, અમારા ચાર્જિંગ સ્ટેશનો વ્યૂહાત્મક રીતે શહેરની આસપાસના મુખ્ય વિસ્તારોમાં, હાઇવે પર સ્થિત છે. તેના દ્વારા અમે એ સુનિશ્વિત કરવાનો પ્રયત્ન કર્યો છે કે તમે જ્યાં પણ હોવ, ત્યાં હંમેશા નજીકમાં વિશ્વસનીય અને સુલભ ચાર્જિંગ પોઈન્ટ મળી રહે. રિયલ-ટાઇમ ઍક્સેસિબિલિટીની માહિતીને કારણે અમારું નેટવર્ક અલગ તરી આવે છે. તે ચાર્જિંગ સ્ટેશનોની શ્રૃંખલા માત્ર જ નથી. તે સ્વચ્છ, હરિયાળા અને વધુ ટકાઉ ભવિષ્ય પ્રત્યેની અમારી પ્રતિબદ્ધતાનું પ્રમાણ છે. સાથે મળીને, એક સમયે એક ચાર્જિંગ પોઇન્ટની મદદથી અમે શહેરી વિસ્તારને ફરીથી વ્યાખ્યાયિત કરી રહ્યા છીએ.
સ્ટેન્ડિંગ કમિટીના ચેરમેન દેવાંગ દાણી
આ પ્રસંગે અમદાવાદ મ્યુનિસિપલ કોર્પોરેશનના સ્ટેન્ડિંગ કમિટીના ચેરમેન દેવાંગ દાણીએ જણાવ્યું કે, મોબિલેન કંપની દ્વારા આ ચાર્જિંગ સુવિધા શરૂ થવાથી, શહેરના EV વપરાશકર્તાઓની ચાર્જિંગની સમસ્યા દૂર કરવામાં તેમજ અમદાવાદની હવાને વધુ સ્વચ્છ બનાવવામાં મદદ મળશે. વડાપ્રધાનશ્રીના સ્વચ્છ ઊર્જાના વિઝન અનુસાર હરિયાળું ભવિષ્ય બનાવવાની દિશામાં આ એક મહ્તવપૂર્ણ કામગીરી છે. આવનારો સમય EVનો છે, અને સમગ્ર વિશ્વમાં મોટાપાયે તેના પર કામ થઇ રહ્યું છે. આ EV ક્રાંતિમાં ગુજરાત રાજ્ય એક અગ્રણી યોગદાન આપનાર રાજ્ય તરીકે આગળ આવી રહ્યું છે, તે આપણા માટે ગૌરવની વાત છે.
