- પેટલાદમાં વાતાવરણમાં પલટા સાથે ભારે વરસાદ
- શહેરના માર્ગો પર ભરાયા પાણી
- પાણી ભરાતા વાહનચાલકોને પરેશાની
આણંદના પેટલાદ પંથકમાં દિવસ દરમિયાન વરસાદે વિરામ લીધા બાદ સાંજના સમયે ફરી વરસાદ વરસ્યો છે. પેટલાદમાં સાંજના સમયે અચાનક વાતાવરણમાં પલટો આવ્યો હતો અને ભારે વરસાદ વરસ્યો હતો.
વાહનો પાણીમાં બંધ પડ્યા
ત્યારે એકાએક ધોધમાર વરસાદ પડી જતા શહેરના માર્ગો ઉપર વરસાદી પાણી ભરાયા હતા અને દિવસ દરમિયાન વરસાદના વિરામ બાદ સાંજના સમયે વરસાદ પડતા જનજીવન ઉપર સીધી અસર પડી હતી. શહેરના અનેક વિસ્તારમાં પાણી ભરાઈ જતા વાહનચાલકોને મુશ્કેલી પડી હતી, ઘણા વાહનો પાણીમાં બંધ પડી ગયા હતા તો ધક્કા મારીને બહાર કાઢવાની ફરજ પડી હતી.
સાબરકાંઠા જિલ્લામાં પણ ધોધમાર વરસાદ
સાબરકાંઠા જિલ્લામાં વરસાદ ધમાકેદાર બેટિંગ કરી છે અને જિલ્લાના ઈડર, વડાલી અને વિજયનગર વિસ્તારમાં ધોધમાર વરસાદ પડ્યો છે. માત્ર દોઢ કલાકમાં એક ઈંચ કરતા વધુ વરસાદ વરસ્યો છે. વિજયનગરના કોડિયાવાડા બસ સ્ટેન્ડ ઉપર પાણી ભરાતા લોકોને ભારે હાલાકી પડી હતી. કોડિયાવાડા વિજયનગર મેઈન રોડ પર પણ વરસાદી પાણી ફરી વળતા રાહદારીઓને ચાલવાની પણ મુશ્કેલી થઈ હતી. ઘણા વાહનોના એન્જિનમાં પાણી ભરાઈ જતા વાહનો બંધ થવાની ઘટનાઓ પણ સામે આવી છે.
વાપીમાં મેઘરાજાની ધમાકેદાર બેટિંગ
આજે વાપીમાં છ કલાકમાં પાંચ ઈંચ જેટલો વરસાદ પડ્યો છે. જેના કારણે શહેરમાં ઠેરઠેર જગ્યાએ પાણી ભરાયા છે. શહેરના અંડરપાસમાં પાણી ભરાઈ ગયુ છે, જેના કારણે લોકોની અવરજવર બંધ કરાવવામાં આવી છે. વાપી તાલુકામાં મોટાભાગના વિસ્તારોમાં પાણી ભરાતા સવારથી જનજીવન ઠપ થયું હતુ. ઉલ્લેખનીય છે કે હવામાન વિભાગે પણ વરસાદને લઈ મોટી આગાહી કરી છે.
નવસારીના જલાલપોર તાલુકામાં અડધો ઈંચ વરસાદ
નવસારી જિલ્લામાં વહેલી સવારથી વરસાદ પડી રહ્યો છે. નવસારીના વાંસદામાં જુજ ડેમ ઓવરફલો થતા નીચાણવાળા વિસ્તારોને એલર્ટ કરાયા છે, ત્યારે જિલ્લાના નવસારીના જલાલપોર તાલુકામાં અડધો ઈંચ વરસાદ, ખેરગામ, વાંસદા,ગણદેવી અને ચીખલી તાલુકાઓમાં દોઢથી બે ઈંચ વરસાદ તો જિલ્લાના તમામ તાલુકાઓમાં ધીમી ધારે વરસાદ વરસી રહ્યો છે.
