વિજય હજારે ટ્રોફી 2024-25 શરૂ થઈ ગઈ છે અને ટુર્નામેન્ટના પહેલા જ દિવસે એક મોટો રેકોર્ડ તૂટી ગયો છે. પંજાબના અનમોલપ્રીત સિંહે અરુણાચલ પ્રદેશ સામે અણનમ સદી ફટકારી હતી અને આ દરમિયાન તેણે લિસ્ટ A ક્રિકેટમાં કોઈપણ ભારતીય દ્વારા સૌથી ઝડપી સદી ફટકારવાનો રેકોર્ડ પણ બનાવ્યો હતો. અત્યાર સુધી આ રેકોર્ડ પૂર્વ ભારતીય ઓલરાઉન્ડર યુસુફ પઠાણના નામે હતો પરંતુ હવે 14 વર્ષ બાદ તેને અનમોલપ્રીતે તોડી દીધો છે. તેની શાનદાર ઇનિંગ્સને કારણે અનમોલપ્રીતે તેની ટીમ પંજાબને એકતરફી જીત અપાવી હતી.
યુસુફ પઠાણનો તોડ્યો રેકોર્ડ
આ પહેલા આ રેકોર્ડ યુસુફ પઠાણના નામે હતો. યુસુફે 2010માં મહારાષ્ટ્ર સામે 42 બોલમાં 108 રનની અણનમ ઇનિંગ રમી હતી. આ દરમિયાન તેણે 40 બોલમાં તેની સદી પૂરી કરી, જે લિસ્ટ A ક્રિકેટમાં અત્યાર સુધીની કોઈપણ ભારતીય દ્વારા સૌથી ઝડપી સદી હતી. ગયા વર્ષે ગુજરાતના ઉર્વિલ પટેલે પણ 41 બોલમાં સદી ફટકારી હતી.
આ ખેલાડીએ ફટકારી સૌથી ઝડપી સદી
લિસ્ટ A ક્રિકેટમાં સૌથી ઝડપી સદી ફટકારનાર બેટ્સમેનોની એકંદર યાદી પર નજર કરીએ તો ઓસ્ટ્રેલિયાના જેક ફ્રેઝર-મેકગર્કનું નામ ટોચ પર છે. વર્ષ 2023માં તસ્માનિયા સામે દક્ષિણ ઓસ્ટ્રેલિયા તરફથી રમતા મેકગર્કે માત્ર 29 બોલમાં સદી ફટકારી હતી. તેણે મેચમાં 38 બોલમાં 125 રનની ઇનિંગ રમી હતી. બીજા સ્થાન પર દક્ષિણ આફ્રિકાનો દિગ્ગજ ખેલાડી એબી ડી વિલિયર્સ છે જેણે 2015માં વેસ્ટ ઈન્ડિઝ સામે માત્ર 31 બોલમાં સદી ફટકારી હતી.
IPL 2025ના ઓક્શનમાં અનસોલ્ડ રહ્યો હતો અનમોલપ્રીત
પંજાબ ક્રિકેટ એસોસિએશન સાથે જોડાયેલા યુવા બેટ્સમેન અનમોલપ્રીત સિંહ IPL 2025ની હરાજીમાં વેચાયા નથી. આ પહેલા તેણે હૈદરાબાદ માટે IPL 2024માં ભાગ લીધો હતો અને તેણે વર્ષ 2021માં મુંબઈ ઈન્ડિયન્સ માટે તેની IPL કારકિર્દીની શરૂઆત કરી હતી. તેની આક્રમક બેટિંગને જોયા બાદ એવું કહેવામાં આવી રહ્યું છે કે હવે તેને રિપ્લેસમેન્ટ તરીકે કોઈપણ ફ્રેન્ચાઈઝી સંપર્ક કરી શકે છે.
