- આરોપી અશ્વિન ઉર્ફે ગોપાલ નાથાભાઇ ઉલ્વાની ધરપકડ
- આરોપી સુશાંત ઉર્ફે દલાલ શીતલ ચાલની ધરપકડ કરાઈ
- અડાજણ પોલીસે ચાર પૈકીના બે આરોપીની કરી ધરપકડ
સુરત શહેરના અડાજણના બિલ્ડરને ઠગ ટોળકીએ હનીટ્રેપમાં ફસાવી પાલનપુર જકાત નાકા ખાતે નૂતન રો-હાઉસના મકાનમાં બોલાવી દમદાટી આપી નકલી પોલીસે રૂપિયા ૩૦ લાખ પડાવી લીધા હતાં. અડાજણ પોલીસે ગણતરીના કલાકોમાં ઠગ ટોળકી પૈકી મુખ્ય સૂત્રધાર અને દલાલને પકડી પાડ્યાં હતાં.
અડાજણમાં રહેતા 40 વર્ષીય વ્યવસાયે બિલ્ડર
અડાજણમાં રહેતા 40 વર્ષીય વ્યવસાયે બિલ્ડર એક પાનના ગલ્લા પર નિયમિત જતાં હોય ત્યાં તેમની મુલાકાત સુશાંત સાથે થઇ હતી. સુશાંતે બિલ્ડરને વાતોમાં ભોળવી વિશ્વાસમાં લઈ મોબાઇલમાં કેટલીક યુવતીઓના ફોટાં બતાવ્યા હતા. મોડલ ટાઇપની યુવતીઓના ફોટા જોઈ બિલ્ડર લલચાયા હતાં. સુશાંતે તેમણે પાલનપુર જકાતાનાકા ખાતે આવેલા નૂતન રો-હાઉસના એક મકાનમાં મળવા બોલાવ્યા હતાં. અહીં મકાનમાં જતા બિલ્ડર સાથે રૂમમાં એક યુવતી ગઈ હતી, બિલ્ડર કંઇક વાતચીત કરે ત્યાં સુધીમાં તો ૪ યુવકો ત્યાં રૂમમાં ધસી ગયા હતા.
અસલ પોલીસની સ્ટાઇલમાં પહોંચેલી ઠગ ટોળકી
તેઓએ અડાજણ પોલીસ મથકના ડી-સ્ટાફ તરીકે ઓળખ આપી હતી, બિલ્ડર સમક્ષ સીનસપાટા ઉભા કર્યા હતાં. અસલ પોલીસની સ્ટાઇલમાં નોટપેડ સહિતના કાગળો લઈ પહોંચેલી ઠગ ટોળકીએ કાયદેસરનો પોલીસ કેસ કરી ધરપકડ કરવાનો દમ મારવા સાથે મીડિયા બોલાવી બદનામ કરવાની પણ ધમકી આપી હતી. વારંવાર ફોન પર વાત કરવાનો ડોળ કરવા સાથે અંદરોઅંદર વાતચીત કરી પીસીઆર ક્યાં પહોંચી? મીડિયાવાળા આવ્યા કે નહિ ? એવું કહીં પ્રેશર ઉભું કર્યુ હતુ.
અડધો કલાકમાં જ રૂ 30 લાખની વ્યવસ્થા કરાઇ હતી
પોલીસ જેવી લાકડી બતાવી એક રૂમમાં ગોંધી રાખી માર પણ માર્યો હતો. ગભરાઈ ઉઠેલા બિલ્ડરે પતાવટ કરવાની વાત કરી તો નકલી પોલીસે સમાધાન પેટે રૂ ૩૦ લાખ માંગ્યા હતા. બિલ્ડર એ હદે ગભરાઇ ગયા હતાં કે, તેમણે એક ફ્રેન્ડને પૈસા માટે કોલ કરતા અડધો કલાકમાં જ રૂ 30 લાખની વ્યવસ્થા કરાઇ હતી. જે રકમ ઠગ ટોળકીને આપી દેવાઇ હતી અને બિલ્ડરને મુક્ત કરી દેવાયા હતાં. દરમિયાન બિલ્ડરને પરિચિતોને ઘટના અંગે વાત કરતાં નકલી પોલીસ તેઓને છેતરી ગઈ હોવાનું માલુમ પડતા સમગ્ર મામલો અડાજણ પોલીસ મથકે પહોંચ્યો હતો.
મુખ્ય સૂત્રધાર અશ્વિન ઉર્ફે ગોપાલ અને દલાલ સુશાંતની ધરપકડ કરી
અડાજણ પોલીસે ખંડણી, મારપીટ સહિતની કલમો અંતર્ગત સુશાંત શીતલ ચાલ, અશ્વિન ઉર્ફે ગોપાલ નાથાભાઇ ઉલ્વા રબારી, મહેશ વિહા ભાઇ ઉલ્વા રબારી અને અન્ય બે અજાણ્યા સામે ગુનો નોંધ્યો હતો, અડાજણ પોલીસે પોલીસે ગણતરીના કલાકોમાં જ મુખ્ય સૂત્રધાર અશ્વિન ઉર્ફે ગોપાલ અને દલાલ સુશાંતની ધરપકડ કરી હતી.
અશ્વિન અગાઉ પણ હનીટ્રેપના ગુનામાં પકડાઈ ચૂક્યો
અશ્વિન અગાઉ પણ હનીટ્રેપના ગુનામાં અડાજણ પોલીસના હાથે પકડાઇ ચૂક્યો છે. આ ઉપરાંત પણ તેને અનેકને ફસાવ્યા છે. અડાજણ પોલીસ અન્ય આરોપીઓને પકડવાના ચક્રો ગતિમાન કર્યા છે,જયારે પકડાયેલા બે આરોપી ઓને કોર્ટમાં રજુ કરતા,સુરત ની કોર્ટે જ્યુડીશયલ કસ્ટડી નો હુકમ કરતા બંને આરોપી લાજપોર જેલ મોકલી પવામાં આવ્યા છે.
