અમદાવાદ, સુરત બાદ હવે રાજકોટમાં કાર્યવાહી
આર્ય ક્લબ એન્ડ રિસોર્ટમાં IT વિભાગ ત્રાટક્યું
હોટલ–રિસોર્ટ બિઝનેસની ઝીણવટ ભરી તપાસ : અમદાવાદ અને સુરતમાં ડાયમંડ–રિયલ એસ્ટેટ યુનિટ્સ પર ચાલતી કાર્યવાહી બાદ રાજકોટમાં સર્ચથી ઉદ્યોગપતિઓમાં સન્નાટો
અગ્ર ગુજરાત, રાજકોટ
નવા વર્ષની શરૂઆત સાથે જ ગુજરાતમાં આવકવેરા વિભાગે મોટા પાયે કાર્યવાહી શરૂ કરતાં ઉદ્યોગજગતમાં ખળભળાટ મચી ગયો છે. અમદાવાદ બાદ સુરત અને હવે રાજકોટમાં ઇન્કમટેક્સ વિભાગના દરોડાઓથી રાજ્યભરમાં હાઈપ્રોફાઈલ ઉદ્યોગપતિઓ અને બિઝનેસ હાઉસીસમાં ફફડાટનો માહોલ સર્જાયો છે. ડાયમંડ, રિયલ એસ્ટેટ, સ્કૂલ ટ્રસ્ટ અને હવે હોટલ–રિસોર્ટ બિઝનેસ સુધી IT વિભાગની રડાર પહોંચતા આ કાર્યવાહી ‘મેગા ઓપરેશન’ રૂપે સામે આવી રહી છે.
પ્રાપ્ત વિગતો મુજબ, સુરતમાં જાણીતા ઉદ્યોગપતિ વસંત ગજેરા અને ચુનીભાઈ ગજેરા સાથે સંકળાયેલા અનેક યુનિટ્સ પર આવકવેરા વિભાગ દ્વારા સર્ચ અને સર્વે હાથ ધરવામાં આવ્યો છે. ડાયમંડ અને રિયલ એસ્ટેટ ક્ષેત્ર સાથે સંકળાયેલા કુલ 30થી વધુ સ્થળો પર IT વિભાગની ટીમો દ્વારા એકસાથે તપાસ શરૂ કરાઈ હતી. સુરત ઉપરાંત મુંબઈમાં પણ IT વિભાગની ટીમો દ્વારા સંબંધિત સ્થળોએ સર્વે હાથ ધરવામાં આવ્યો હોવાનું જાણવા મળે છે.
સુરત શહેરના કતારગામ, પીપલોદ અને વરાછા જેવા મહત્વપૂર્ણ વિસ્તારોમાં આવેલી ડાયમંડ ઓફિસો, રિયલ એસ્ટેટ પ્રોજેક્ટ્સ તેમજ શૈક્ષણિક સંસ્થાઓમાં IT વિભાગની ટીમોએ દસ્તાવેજોની ઝીણવટપૂર્વક તપાસ શરૂ કરી છે. સ્કૂલ ટ્રસ્ટ, ડાયમંડ યુનિટ્સ અને રિયલ એસ્ટેટ ઓફિસોમાં ચાલી રહેલી તપાસને કારણે સુરતના ઉદ્યોગજગતમાં ભારે ચકચાર જોવા મળી રહી છે.
આ વચ્ચે આજ વહેલી સવારથી રાજકોટમાં પણ આવકવેરા વિભાગે એન્ટ્રી કરતાં સ્થાનિક બિઝનેસ સેક્ટરમાં ખળભળાટ મચી ગયો છે. સૂત્રો પાસેથી મળતી માહિતી અનુસાર રાજકોટના કાલાવડ રોડ પર આવેલા આર્ય રિસોર્ટ એન્ડ ક્લબમાં આજે વહેલી સવારથી IT વિભાગની ટીમ દ્વારા નાણાકીય વ્યવહારોની તપાસ શરૂ કરવામાં આવી છે. વહેલી સવારે અધિકારીઓની ટીમ રિસોર્ટ પર પહોંચી હતી અને રિસોર્ટના હિસાબ–કિતાબ તેમજ વિવિધ સેવાઓ સાથે સંકળાયેલા દસ્તાવેજોની તપાસ હાથ ધરવામાં આવી છે.
રાજકોટમાં ચાલી રહેલી આ કાર્યવાહીથી શહેરભરના હોટલ અને રિસોર્ટ સંચાલકોમાં ફફડાટનો માહોલ ફેલાયો છે. કારણ કે અમદાવાદ અને સુરતમાં રિયલ એસ્ટેટ તથા ડાયમંડ ક્ષેત્ર બાદ હવે હોટલ–હોસ્પિટાલિટી સેક્ટર IT વિભાગના નિશાન પર હોવાનું સ્પષ્ટ થઈ રહ્યું છે. જાણકારોના મત મુજબ, સર્વિસ સેક્ટરમાં થતી આવક અને તેના પર ભરવામાં આવતા ટેક્સ અંગે લાંબા સમયથી IT વિભાગ પાસે ચોક્કસ માહિતી હોવા છતાં હવે સીધી મેદાનમાં ઉતરી કાર્યવાહી કરવામાં આવી રહી છે.
આર્યા રિસોર્ટ એન્ડ ક્લબ રાજકોટના હાર્દિક સમાન કાલાવડ રોડ વિસ્તારમાં અંદાજે 1.5 લાખ સ્ક્વેર ફીટના વિશાળ વિસ્તારમાં ફેલાયેલું છે. અહીં હોટલ રૂમ્સ, રેસ્ટોરન્ટ, સ્વિમિંગ પૂલ, જીમ, વર્કઆઉટ ઝોન અને અન્ય અનેક લક્ઝરી સુવિધાઓ ઉપલબ્ધ છે. આવકવેરા વિભાગ દ્વારા રિસોર્ટમાં ઉપલબ્ધ વિવિધ સેવાઓ બદલ કેટલો ચાર્જ લેવામાં આવે છે અને તેના અનુરૂપ કેટલો ટેક્સ ભરવામાં આવ્યો છે, તેની વિગતવાર ચકાસણી કરવામાં આવી રહી હોવાનું સૂત્રો જણાવે છે.
મોટાભાગે હોટલ અને રિસોર્ટ વ્યવસાય સાથે સંકળાયેલા કેટલાક સંચાલકો દ્વારા સર્વિસ સેક્ટરની આવકને ઓછું બતાવી અથવા કેટલાક બિલ્સ છુપાવી કરચોરી કરવામાં આવતી હોવાની શંકા IT વિભાગને લાંબા સમયથી હતી. આ દિશામાં રાજકોટમાં શરૂ થયેલી તપાસને મહત્વપૂર્ણ માનવામાં આવી રહી છે. વહેલી સવારથી અધિકારીઓ દ્વારા રેસ્ટોરન્ટના બિલ, હોટલ રૂમ બુકિંગ રેકોર્ડ, ડિજિટલ ટ્રાન્ઝેક્શન, કેશ ફ્લો, GST સંબંધિત દસ્તાવેજો તેમજ અન્ય ફિઝિકલ ફાઈલોની ઝીણવટપૂર્વક તપાસ કરવામાં આવી રહી છે.
સૂત્રો મુજબ, IT વિભાગ દ્વારા ડિજિટલ ડેટા, કમ્પ્યુટર સિસ્ટમ, સર્વર અને એકાઉન્ટિંગ સોફ્ટવેરમાંથી માહિતી એકત્ર કરવામાં આવી રહી છે. ખાસ કરીને રિસોર્ટમાં આયોજિત પાર્ટી, ઇવેન્ટ, મેમ્બરશીપ ફી અને અન્ય પ્રીમિયમ સેવાઓમાંથી થતી આવક અંગે તપાસનું ફોકસ હોવાનું માનવામાં આવે છે.
અમદાવાદમાં તાજેતરમાં રિયલ એસ્ટેટ ક્ષેત્રમાં ચાલેલી IT કાર્યવાહી બાદ હવે સુરત અને રાજકોટમાં એકસાથે અલગ–અલગ સેક્ટરોને ટાર્ગેટ કરવામાં આવ્યા હોવાનું સ્પષ્ટ થઈ રહ્યું છે. આવકવેરા વિભાગ નવા વર્ષના પ્રારંભથી જ ‘એક્શન મોડ’માં હોવાની ચર્ચા ઉદ્યોગવર્તુળોમાં ચાલી રહી છે. ખાસ કરીને હાઈ વેલ્યુ ટ્રાન્ઝેક્શન, કેશ ડીલિંગ અને ટેક્સ રિટર્નમાં દર્શાવેલી આવક વચ્ચેના તફાવત પર IT વિભાગની નજર હોવાનું માનવામાં આવે છે.
રાજકોટમાં આર્ય રિસોર્ટ ખાતે ચાલી રહેલી તપાસને પગલે શહેરના અન્ય હોટલ, રિસોર્ટ અને ક્લબ સંચાલકોમાં પણ સાવચેતીનો માહોલ જોવા મળી રહ્યો છે. ઘણા સંચાલકો પોતાના એકાઉન્ટ્સ અને દસ્તાવેજો અપડેટ કરવામાં લાગી ગયા હોવાની ચર્ચા પણ ઉઠી રહી છે.
હાલ સુરત, મુંબઈ અને રાજકોટમાં ચાલી રહેલી આ કાર્યવાહી અંગે આવકવેરા વિભાગ તરફથી કોઈ સત્તાવાર નિવેદન આપવામાં આવ્યું નથી. જોકે સૂત્રોનું કહેવું છે કે તપાસ હજુ પ્રારંભિક તબક્કામાં છે અને આવનારા દિવસોમાં વધુ સ્થળોએ IT વિભાગની કાર્યવાહી જોવા મળી શકે છે.
આ સમગ્ર મેગા ઓપરેશન બાદ ડાયમંડ, રિયલ એસ્ટેટ, શિક્ષણ અને હોટલ–હોસ્પિટાલિટી સેક્ટરમાં શું મોટા ખુલાસા થાય છે અને કેટલો કરચોરીનો આંકડો બહાર આવે છે, તે અંગે રાજ્યભરની નજર આવકવેરા વિભાગની કાર્યવાહી પર મંડાઈ છે.
