પવનની ગતિ વધતાં રાજ્યમાં તાપમાનનો પારો નીચે ગગડ્યો

• આજે અને આવતિકાલે ઠંડીનો ચમકારો વધારે રહશે
  
• રાજ્યના 7 શહેરમાં તાપમાન 14 ડિગ્રીથી નીચું નોંધાયું
  
• 8.8 ડિગ્રી તાપમાન સાથે નલિયા સૌથી ઠંડુ શહેર
  

રાજ્યમાં ઠંડીનો છેલ્લો રાઉન્ડ ચાલી રહ્યો છે. જેમાં ફરી એકવાર વિવિધ શહેરોમાં તાપમાનનો પારો નીચે ગયો છે. જેમાં રાજ્યના 7 શહેરમાં તાપમાન 14 ડિગ્રીથી નીચું નોંધાયું છે. આ સાથે જ ફરી એકવાર 8.8 ડિગ્રી તાપમાન સાથે નલિયા સૌથી ઠંડુ શહેર બન્યું છે. જ્યારે અમદાવાદ અને ડીસામાં 14 ડિગ્રી તાપમાન નોંધાયું છે.

ક્યાં કેટલું તાપમાન નોંધાયું ?

છેલ્લા બે-ત્રણ દિવસથી ઠંડીનો પારો ગગડ્યો છે. જેમાં ફરી એકવાર ઠંડીનું જોર વધ્યું છે. હવામાન વિભાગના જણાવ્યા અનુસાર, ફેબ્રુઆરીમાં ઠંડીનો અંતિમ રાઉન્ડ ચાલી રહ્યો છે. જેમાં ફરી એકવાર કેટલાંક શહેરોમાં ઠંડીનો પારો 2 થી 3 ડિગ્રી નીચે પહોંચ્યો છે. રાજ્યના 7 શહેરમાં તાપમાન 14 ડિગ્રીથી નીચું નોંધાયું છે.

આ દરમિયાન ગાંધીનગરમાં 13 ડિગ્રી તાપમાન નોંધાયું છે. તો ભુજ 15.1 , કંડલા 14.7 ડિગ્રી તાપમાન, તેમજ અમરેલી 16.2 , રાજકોટ 12.2 ડિગ્રી તાપમાન તો સુરેન્દ્રનગર 15.8, કેશોદ 16.6 ડિગ્રી તાપમાન સુધી પહોંચ્યું છે જ્યારે દક્ષિણ ગુજરાતમાં સુરત 18.6, વલસાડ 16.8 ડિગ્રી તાપમાન નોંધાયું છે.

કેમ ઘટી રહ્યો છે ઠંડીનો પારો 

આ અંગે હવામાન વિભાગે જણાવ્યું કે, હાલમાં ઉત્તર દિશા તરફથી આવતા પવનોને કારણે તાપમાનનો પારો ગગડ્યો છે. ગત બે દિવસ પહેલા ગુજરાત રાજ્ય પર આવતાં પવનની દિશા પશ્ચિમ અને ઉત્તર પશ્ચિમ તરફથી હતી. જેમાં હજી ઘટાડો જોવા મળી શકે છે. આ વર્ષમાં ઠંડીનો છેલ્લો રાઉન્ડ રહેશે.

રાજ્યમાં આગામી 48 કલાકમાં ગુજરાતનું તાપમાન યથાવત્ રહેશે. એટલે કે, લઘુત્તમ તાપમાનમાં ઘટાડો થતાં મોડી રાત્રે અને વહેલી સવારે ઠંડીનો ચમકારો અનુભવાશે. જે બાદ ત્રીજા દિવસથી તાપમાન ફરીએકવાર ઉચકાશે. જે બાદ ગુજરાત પર આવતા પવનોની દિશા પૂર્વ તરફથી ને કારણે તાપમાનમાં વધારો થશે.