- મેડલની રેસમાં માર્શે સુકાની પેટ કમિન્સ તથા સ્ટિવ સ્મિથને પાછળ રાખી દીધા
- લાયન બેસ્ટ ટેસ્ટ પ્લેયર બન્યો
- ગાર્ડનરે પૂરી સિઝનમાં ત્રણેય ફોર્મેટમાં શાનદાર પ્રદર્શન કર્યું હતું
મહિલા ઓફ સ્પિનર ઓલરાઉન્ડર એશ્લે ગાર્ડનર તથા પેસ બોલિંગ ઓલરાઉન્ડર મિચેલ માર્શે અનુક્રમે બેલિન્ડા ક્લાર્ક એવોર્ડ તથા એલન બોર્ડર મેડલનું સન્માન હાંસલ કરીને 2024ના ઓસ્ટ્રેલિયન ક્રિકેટ પુરસ્કારોમાં ટોચનું સ્થાન મેળવ્યું હતું. માર્શે પ્રથમ વખત એલન બોર્ડર મેડલ હાંસલ કર્યો છે. ગાર્ડનર અગાઉ 2022માં એવોર્ડ હાંસલ કરી ચૂકી છે. બેલિન્ડા ક્લાર્ક એવોર્ડની રેસમાં ગાર્ડનરે બીજા ક્રમે રહેલી એલિસ પેરી (134)ની તુલનામાં 147 વોટ હાંસલ કર્યા હતા અને એનાબેલ સધરલેન્ડ 106 વોટ સાથે ત્રીજા ક્રમે રહી હતી. એલન બોર્ડર મેડલની રેસમાં માર્શને 223 વોટ મળ્યા હતા. પેટ કમિન્સને 144 તથા સ્ટિવ સ્મિથને 141 વોટ મળ્યા હતા.
ગાર્ડનરે પૂરી સિઝનમાં ત્રણેય ફોર્મેટમાં શાનદાર પ્રદર્શન કર્યું હતું જેના કારણે ઓસ્ટ્રેલિયન વિમેન્સે સાઉથ આફરીકામાં આઇસીસી વિમેન્સ ટી20 વર્લ્ડ કપ જીતીને ઇન્ટરનેશનલ સ્તરે પોતાનો દબદબો જાળવી રાખ્યો હતો. વિમેન્સ એશિઝ જાળવી રાખવા ઉપરાંત ભારતમાં વન-ડે તથા ટી20 શ્રેણી પણ જીતી હતી. તમામ ફોર્મેટમાં ગાર્ડનરે 24.94ની સરેરાશથી 499 રન બનાવવા ઉપરાંત 66 રનમાં આઠ વિકેટના બેસ્ટ પ્રદર્શન સાથે 19.39ની સરેરાશથી 56 વિકેટ હાંસલ કરી હતી. ઓસ્ટ્રેલિયન વિમેન્સ ટીમની સફળતામાં મહત્ત્વનું યોગદાન આપનાર ઓલરાઉન્ડર એલિસ પેરીને વિમેન્સ વન-ડે તથા ટી20 પ્લેયર ઓફ ધ યરનો એવોર્ડ અપાયો હતો. મિચેલ માર્શે મેન્સ વન-ડે પ્લેયર ઓફ ધ યરનો પુરસ્કાર પણ જીત્યો હતો. તેણે વર્લ્ડ કપમાં પૂણે ખાતે બાંગ્લાદેશ સામે 177 રનની અણનમ ઇનિંગના ટોપ સ્કોર સાથે પૂરા વર્ષ દરમિયાન વન-ડેમાં 858 રન બનાવ્યા હતા. ઓફ સ્પિનર નાથાન લાયનને શેન વોર્ન મેન્સ ટેસ્ટ પ્લેયર ઓફ ધ યરના એવોર્ડનું સન્માન મળ્યું હતું. સાઉથ આફરીકા અને ભારતના પ્રવાસમાં ઓસ્ટ્રેલિયન મેન્સ ટીમમાં સફળ પુનરાગમન કરનાર જેસન બેહરિનડોર્ફને વર્ષના સર્વશ્રેષ્ઠ ટી20 ખેલાડી તરીકેનો પુરસ્કાર અપાયો હતો.
એવોર્ડ સમારંભમાં ઓસ્ટ્રેલિયાના ડોમેસ્ટિક ક્રિકેટર્સને પણ સન્માનિત કરવામાં આવ્યા હતા જેમાં વેસ્ટર્ન ઓસ્ટ્રેલિયાના કેમરુન બેનક્રોફ્ટને મેન્સ તથા સોફી ડે તથા એલિસ વિલાનીને વિમેન્સ ડોમેસ્ટિક પ્લેયર ઓફ ધ યરનો એવોર્ડ અપાયો હતો. મેથ્યૂ શોર્ટ અને વિમેન્સ બિગ બેશ લીગમાં સિડની થંડર માટે રમનાર શ્રીલંકાની ચામરી અટાપટ્ટુને પ્લેયર ઓફ ધ ટૂર્નામેન્ટ જાહેર કરવામાં આવ્યા હતા.
