થાઈલેન્ડમાં ચાલી રહેલી એશિયન પેરા કેનો ચેમ્પિયનશિપમાં ભારતે ત્રીજા દિવસે પોતાનું શાનદાર પ્રદર્શન ચાલુ રાખ્યું. દિલ્હીના પેરા એથ્લીટ અમિત કુમારે શાનદાર પ્રદર્શન કર્યું અને બ્રોન્ઝ મેડલ પોતાને નામ કર્યો. અમિતની જીત સાથે ભારત પાસે હવે કુલ 20 મેડલ છે. જેમાં 5 ગોલ્ડ, 5 સિલ્વર અને 10 બ્રોન્ઝનો સમાવેશ થાય છે. આ ભારત માટે એશિયન સ્તર પર એક મોટી સિદ્ધિ માનવામાં આવી રહી છે.
ખેલાડીઓને પ્રોત્સાહિત કરવા પહોંચ્યા અધિકારીઓ
ઈન્ડિયન કાયાકિંગ અને કેનોઈંગ એસોસિએશન (IKCA) ના અધ્યક્ષ આ અવસર પર પણ થાઈલેન્ડ પહોંચ્યા અને ખેલાડીઓને મળ્યા. તેમને ખેલાડીઓને પ્રોત્સાહિત કરતા કહ્યું કે અમે અમારા પેરા ખેલાડીઓને જરૂરી દરેક સુવિધા પૂરી પાડીશું, જેથી તેઓ ભવિષ્યમાં પણ ઓલિમ્પિકમાં ભારત માટે મેડલ જીતી શકે.
પેરા કેનોને નવી ઓળખ અપાવનાર મયંક ઠાકુર
પેરા કેનોને ભારતમાં એક અલગ ઓળખ આપવાનો શ્રેય મયંક ઠાકુરને જાય છે. તેમને પેરા કેનોના જનક કહેવામાં આવે છે. તેમના માર્ગદર્શન અને વિઝનને કારણે જ આ રમતમાં ભારતને એક નવી ઓળખ મળી છે. ભારતીય ટીમના કોચિંગની જવાબદારી અનિલ રાઠી અને રિંકુ સિંહે સંભાળી, જેમણે ખેલાડીઓને યોગ્ય દિશામાં તૈયારી કરાવી અને તેમને ઉત્તમ પ્રદર્શન માટે તૈયાર કર્યા.
અમિત કુમારની મહેનત રંગ લાવી
અમિત કુમારની સફળતા પાછળ તેમના સમર્પણ, મહેનત અને આત્મવિશ્વાસનો મોટો ફાળો છે. તેમના કોચ મનજીત શેખાવતે કહ્યું હતું કે અમિત દિલ્હીની યમુના નદીમાં દરરોજ અભ્યાસ કરતો, સવારે અને સાંજે બંને સમયે. તેમને સાબિત કર્યું કે જો ઈરાદો મજબૂત હોય તો સરકારી સુવિધાઓનો અભાવ પણ રસ્તો રોકી શકતો નથી.
દિલ્હીમાં જશ્નનો માહોલ
દિલ્હી સ્ટેટ કાયાકિંગ અને કેનોઈંગ એસોસિએશનમાં અમિતની સફળતાને લઈને ગર્વ અને ખુશીનો માહોલ છે. બધા સભ્યો આ જીતને મોટી સિદ્ધિ માની રહ્યા છે. અમિતનો આ વિજય ફક્ત તેમના માટે જ નહીં પરંતુ સમગ્ર દેશ માટે ગર્વની ક્ષણ છે. આ દર્શાવે છે કે ભારતના પેરા એથ્લેટ્સ પણ આંતરરાષ્ટ્રીય મંચ પર દેશનું ગૌરવ વધારવામાં કોઈથી પાછળ નથી.
