વિધાનસભાનું સત્ર પૂર્ણ, ગૃહમાં ૨૪૭ પ્રશ્નો અંગે ચર્ચા-વિચારણા
૧૦ સરકારી બિલને મંજૂરી અપાઇ : ૧૧૪ કલાક ચાલેલુ સત્ર
અગ્ર ગુજરાત, ગાંધીનગર
15મી વિધાનસભાનું 8મું સત્ર આજે તેની કામગીરી પૂર્ણ કરીને સંપન્ન થયું છે. આ સત્ર દરમિયાન ગૃહમાં સત્તાપક્ષ અને વિપક્ષ વચ્ચે અનેક મુદ્દે ગરમાગરમ ચર્ચાઓ જોવા મળી હતી. સત્રના અંતે જાહેર કરવામાં આવેલા આંકડાકીય લેખાજોખા મુજબ, આ સત્ર રાજ્યના વિકાસ અને કાયદાકીય પ્રક્રિયા માટે અત્યંત ફળદાયી રહ્યું છે.
વિધાનસભાનું આ સત્ર કુલ 114 કલાક અને 5 મિનિટ સુધી ચાલ્યું હતું. આ સમયગાળા દરમિયાન લોકશાહીના આ પર્વને પ્રત્યક્ષ નિહાળવા માટે 49,229 લોકો પ્રેક્ષક ગેલેરીમાં ઉપસ્થિત રહ્યા હતા. ગૃહમાં જનતાના પ્રશ્નોને વાચા આપવા માટે કુલ 2110 તારાંકિત પ્રશ્નો રજૂ કરવામાં આવ્યા હતા, જેમાંથી 247 પ્રશ્નો પર ગૃહમાં વિગતવાર ચર્ચા વિચારણા કરવામાં આવી હતી.
રાજ્ય સરકાર દ્વારા આ સત્રમાં કુલ 10 સરકારી બિલ રજૂ કરવામાં આવ્યા હતા, જે તમામ પસાર કરવામાં આવ્યા છે. બજેટની વિવિધ 53 માંગણીઓ પર ગૃહમાં વિસ્તૃત ચર્ચા અને મતદાનની પ્રક્રિયા હાથ ધરવામાં આવી હતી. સત્ર દરમિયાન ગૃહની શિસ્ત અને નિયમોને લગતા 17 પોઈન્ટ ઓફ ઓર્ડર નોંધાયા હતા.
