- ISના પુણે મોડ્યુલ સાથે સંકળાયેલા ત્રીજા શખ્સની ધરપકડ
- 3 નવેમ્બરે મોડ્યૂલના 2 શખ્સોની ધરપકડ બાદ મોટી સફળતા
- પકડવામાં આવેલ શખ્સ અલીગઢમાં વિદ્યાર્થીઓને કોચિંગ આપતો
ISના પુણે મોડ્યુલ સાથે સંકળાયેલા ત્રીજા શખ્સ વજીહુદ્દીનની પણ ATS દ્વારા મંગળવારે છત્તીસગઢના દુર્ગ જિલ્લામાંથી ધરપકડ કરવામાં આવી હતી. 3 નવેમ્બરે અલીગઢમાંથી ISના પુણે મોડ્યુલના સભ્યો અબ્દુલ્લા અર્સલાન અને માઝ બિન તારિકની ધરપકડ કર્યા બાદ ATSને ત્રીજી સફળતા મળી છે. તેને ટ્રાન્ઝિટ રિમાન્ડ પર લખનઉ લાવવામાં આવી રહ્યો છે, જ્યાં કોર્ટમાં રજૂ કર્યા બાદ પોલીસ કસ્ટડી રિમાન્ડ પર તેની પૂછપરછ કરવામાં આવશે.
એડીજી એટીએસ મોહિત અગ્રવાલે જણાવ્યું છે કે, 3 નવેમ્બરના રોજ એટીએસ પોલીસ સ્ટેશનમાં પુણે મોડ્યુલના સક્રિય આતંકવાદીઓ ઝારખંડના રહેવાસી શાહનવાઝ અને દિલ્હીના રહેવાસી રિઝવાન ઉપરાંત અલીગઢ નિવાસી વજીહુદ્દીન, અબ્દુલ્લા અર્સલાન, માઝ બિન તારિક, અલીગઢ મુસ્લિમ યુનિવર્સિટીના અબ્દુલ સમદ મલિક, ફૈઝાન બખ્તિયાર, દિલ્હીના બાટલા હાઉસ રહેવાસી અરશદ વારસી, સંભલના ચંદૌસીના રહેવાસી મોહમ્મદ નાવેદ સિદ્દીકી, પ્રયાગરાજના રહેવાસી રિઝવાન અશરફને નામજદ કર્યા છે. આમાંથી વજીહુદ્દીન મૂળ છત્તીસગઢના દુર્ગ જિલ્લાનો છે અને અલીગઢના ફિરદૌસનગરમાં કોચિંગ ભણાવે છે.
તપાસમાં સામે આવ્યું છે કે વજીઉદ્દીન આતંકી સંગઠન IS સાથે સંકળાયેલો છે. તે પોતાના IS હેન્ડલરની સૂચના મુજબ પોતાની આતંકી યોજનાઓને પૂર્ણ કરવા માટે કોઈ મોટી ઘટનાને અંજામ આપવાની યોજના બનાવી રહ્યો હતો. તે દેશમાં શરિયા કાનૂન લાગુ કરવા માટે અન્ય લોકોને પણ પોતાની સંસ્થામાં જોડતો હતો અને તેમને આતંકી જેહાદની તાલીમ આપતો હતો. વજીહુદ્દીને અલીગઢ મુસ્લિમ યુનિવર્સિટીમાંથી પીએચડીની ડિગ્રી મેળવી છે. તે અલીગઢ મુસ્લિમ યુનિવર્સિટીના વિદ્યાર્થીઓની આડમાં કામ કરી રહ્યો હતો અને યુવાનોને આઈએસની વિચારધારા સાથે જોડતો હતો. એટીએસ તેના આતંકવાદી બેકગ્રાઉન્ડ અને તેની સાથે જોડાયેલા લોકોની તપાસ કરી રહી છે.
રિઝવાને લેવડાવ્યા હતા આઈએસના શપથ
બીજી તરફ, બુધવારે પોલીસ કસ્ટડીમાં રિમાન્ડ પર લેવામાં આવેલા અબ્દુલ્લા અર્સલાન અને માઝ બિન તારિકે પૂછપરછ દરમિયાન જણાવ્યું કે દિલ્હીના રહેવાસી રિઝવાને તેમની સાથે વજીહુદ્દીન, અબ્દુલ સમદ મલિક, ફૈઝાન બખ્તિયાર, મોહમ્મદ નાવેદ સિદ્દીકી અને અરશદ વારસીને આઈએસના શપથ લેવડાવ્યા હતા. આ તમામને અલીગઢ મુસ્લિમ યુનિવર્સિટીના વધુને વધુ વિદ્યાર્થીઓને આઈએસ સાથે જોડવાનું કામ સોંપવામાં આવ્યું હતું. એટીએસ કેમિકલ બોમ્બ બનાવવા અને તેનો ક્યાં ઉપયોગ કરવામાં આવ્યો હતો તે અંગે તેમની સઘન પૂછપરછ કરી રહી છે.
શાહનવાઝ અને રિઝવાનની પણ પૂછપરછ કરવામાં આવશે
એટીએસ આઈએસના આતંકી શાહનવાઝ અને રિઝવાનને પોલીસ કસ્ટડી રિમાન્ડ પર લઈને પૂછપરછ કરશે. ગત મહિને દિલ્હી પોલીસની સ્પેશિયલ સેલે બંનેની ધરપકડ કરી હતી. ત્યારબાદ, તેને મુંબઈ એટીએસ દ્વારા કસ્ટડીમાં લેવામાં આવ્યો હતો. હાલ બંને પુણેની જેલમાં બંધ છે. આ માટે બી વોરંટ મેળવ્યા બાદ ટૂંક સમયમાં એટીએસની એક ટીમ પુણે મોકલવામાં આવશે.
