સરકારના વાઇબ્રન્ટ દાવા પોકળ: ઊંચ ડિગ્રી ધરાવતા યુવાઓએ પણ એલઆરડીમાં ફૉર્મ ભર્યા
વાઈબ્રન્ટ ગુજરાતમાં રોજગારીના સંપૂર્ણ તકના દાવાના બણગાં ફૂંકતી રાજ્ય સરકારની વરવી હકિકત સામે આવી છે. હાલમાં પણ ગુજરાતમાં શિક્ષિત બેરોજગારો નોકરી માટે ફાંફા મારી રહ્યા છે. PSI અને લોકરક્ષક માટે કુલ 12,272 જગ્યાની ભરતી પ્રક્રિયા શરૂ કરાઇ છે ત્યારે અત્યાર સુધી પોલીસ રિક્રુટમેન્ટ બોર્ડને અધધધ કહી શકાય તેટલી 15 લાખ અરજીઓ મળી છે.
આ પરથી ગુજરાતમાં બેરોજગારીનુ અસલી ચિત્ર ઉપસી આવ્યુ છે.તાજેતરમાં આવેલી ભરતીઓમાં લખો બેરોજગાર યુવાનો ફૉર્મ ભરી રહ્યા છે અને આ તમામ ભરતીમાં 10 લાખથી વધુ ફૉર્મ ભરાય છે
વર્ષ 2023નું વર્ષ ભરતી બોર્ડના નામે પૂર્ણ કરાયું હતું. ત્યારબાદ આ વર્ષે લોકસભા ચૂંટણી અગાઉ ઉમેદવારોએ વારંવાર રજૂઆત કરી સરકારને કઠેડામાં ઉભી કરી દીધી હતી. આખરે લોકસભા ચૂંટણી જાહેર થાય એ પહેલા સરકાર સફાળી જાગી હતીને 12મી માર્ચે 2024ના રોજ 12,272 જગ્યાની પોલીસ સંવર્ગની ભરતી બહાર પાડવામાં આવી હતી.
ભરતી બોર્ડના ચેરમેન હસમુખ પટેલે ટ્વિટ કર્યુ હતું કે, ઓગસ્ટ સપ્ટેમ્બરમાં લોકરક્ષક તથા PSI માટેની અરજી ફરી મંગાવવામાં આવશે. શૈક્ષણિક લાયકાત, ઉંમર સહિતના કારણોસર કારણોસર અરજી ન કરી શકે તે ઉમેદવારને અરજી કરવાની તક મળશે. PSIના પદ માટે ઉમેદવાર પાસે સ્નાતકની ડિગ્રી હોવી જોઈએ જયારે લોકરક્ષક કેડરની નોકરી માટે ધો.12 પાસ હોવું જરૂરી છે.
ગુજરાતમાં શિક્ષિત યુવા બેરોજગારોની સંખ્યા દિનદિને વધતી જાય છે. કેલેન્ડર મુજબ સરકારી નોકરીની ભરતી થતી નથી, ત્યારે શિક્ષિત બેરોજગારોની દશા કફોડી બની છે કેમકે, સખત મહેનત અને પૈસા ખર્ચ્યા પછી ય પરિણામ મળતું નથી આખરે નાછૂટકે યુવાઓને ખાનગી નોકરી મેળવવા મજબૂર થવુ પડે છે.
પોલીસ રિક્રુટમેન્ટ બોર્ડને અત્યાર સુધી PSI માટે 4.5 લાખ એને લોકરક્ષક દળ માટે 9.83 લાખ અરજીઓ મળી છે. 15મી સપ્ટેમ્બર બાદ આખીય પ્રક્રિયા શરૂ થશે. ફિઝીકલ ટેસ્ટ ઓક્ટોબર-નવેમ્બરમાં લેવાય તેવી સંભાવના છે. ટૂંકમાં, પીએસઆઈ અને લોકરક્ષક દળ માટે અરજીઓનો ઢગલો થયો છે તે જોતા ચોક્કસ કહી શકાય કે, ગુજરાતમાં બેરોજગારની સમસ્યાએ ફેણ માંડી છે તે અસલિયત ભાજપ સરકાર છુપાવી શકે તેમ નથી.
તાજેતરમાં 12 પાસ ઉમેદવારને તક મળસે
ગુજરાત શિક્ષણ બોર્ડ દ્વારા તાજેતરમાં ધોરણ 12 ની પરીક્ષાનું પરિણામ જાહેર કરવામાં આવ્યું છે અને આ પરિક્ષમાં પાસ થયેલા છાત્રો પણ પોલીસમાં નોકરી મેળવી સકે તે માટે ફૉર્મ ભરવાની તક આપવામાં આવીઓ છે જેથી આ આંકડો હજુ મોટો થવાની શક્યતા છે
