બલૂચ નેતા મીર યાર બલોચે બુધવારે ઔપચારિક રીતે બલુચિસ્તાનની પાકિસ્તાનથી સ્વતંત્રતાની જાહેરાત કરી દીધી છે, જેમાં દાયકાઓની હિંસા, બળજબરીથી ગુમ થવા અને માનવાધિકાર ઉલ્લંઘનનો ઉલ્લેખ કરવામાં આવ્યો છે. તેમણે X પરની એક પોસ્ટમાં કહ્યું કે બલુચિસ્તાનના લોકોએ પોતાનો રાષ્ટ્રીય નિર્ણય લઈ લીધો છે અને દુનિયાએ હવે ચૂપ રહેવું જોઈએ નહીં. તેથી, તેમણે ભારત સહિત આંતરરાષ્ટ્રીય સમુદાય પાસેથી સમર્થનની અપીલ કરી છે.
અમે બલૂચી છીએ, પાકિસ્તાની નથી: બલુચ નેતા
મીર યાર બલોચે સોશિયલ મીડિયા પ્લેટફોર્મ X પર ભાવનાત્મક પોસ્ટ કરતા લખ્યું કે તમે મારી નાખો, પણ અમે બહાર આવીશું, કારણ કે અમે અમારી જાતિ બચાવવા માટે બહાર આવ્યા છીએ, આવો અને અમારી સાથે જોડાઓ. તેમણે કહ્યું કે પાકિસ્તાન કબજા હેઠળના બલુચિસ્તાનમાં બલુચ લોકો રસ્તાઓ પર છે અને તેમનો નિર્ણય છે કે બલુચિસ્તાન હવે પાકિસ્તાનનો હિસ્સો નથી અને દુનિયા હવે મૂકપ્રેક્ષક બનીને જોઈ રહી શકે નહીં. મીર યાર બલોચે ભારતીય મીડિયા, યુટ્યુબર્સ અને બૌદ્ધિકોને બલોચને ‘પાકિસ્તાનના પોતાના લોકો’ કહેવાનું બંધ કરવા વિનંતી કરી છે. તેમણે કહ્યું કે અમે બલૂચી છીએ, પાકિસ્તાની નથી.
PoK પર ભારતના વલણને સમર્થન
બીજી તરફ બલૂચ નેતા મીર યાર બલોચે પીઓકે ખાલી કરવાની ભારતની માગને સંપૂર્ણ સમર્થન આપ્યું છે. તેમણે આંતરરાષ્ટ્રીય સમુદાયને વિનંતી કરી કે તેઓ પાકિસ્તાન પર આ વિસ્તાર ખાલી કરવા માટે દબાણ લાવે. મીર યારે કહ્યું કે બલુચિસ્તાન 14 મે, 2025ના રોજ પાકિસ્તાનને PoK ખાલી કરવા કહેવાના ભારતના નિર્ણયને સંપૂર્ણ સમર્થન આપે છે. આંતરરાષ્ટ્રીય સમુદાયે પાકિસ્તાનને તાત્કાલિક PoK ખાલી કરવા વિનંતી કરવી જોઈએ. તેમણે ચેતવણી આપી હતી કે જો પાકિસ્તાન સાંભળશે નહીં તો પાકિસ્તાની સેનાના લોભી સેનાપતિઓ, જેઓ પીઓકેના લોકોને માનવ ઢાલ તરીકે ઉપયોગ કરી રહ્યા હતા, તેઓ 93,000 સૈનિકોની ઢાકા જેવી બીજી શરમજનક હાર માટે સંપૂર્ણપણે જવાબદાર રહેશે. તેમણે કહ્યું કે ભારત પાકિસ્તાની સેનાને હરાવવા સક્ષમ છે.
આંતરરાષ્ટ્રીય સમુદાયને અપીલ
મીર યાર બલોચે ભારત અને આંતરરાષ્ટ્રીય સમુદાય પર બલુચિસ્તાનની સ્વતંત્રતાને માન્યતા આપવા અને પાકિસ્તાનના ખોટા દાવાઓને સમર્થન ન આપવા અપીલ કરી છે. તેમણે કહ્યું કે બલુચિસ્તાનને બળજબરીથી અને વિદેશી શક્તિઓની મિલીભગતથી પાકિસ્તાનમાં ભેળવી દેવામાં આવ્યું હતું.
