- આ લીગ IPLની જેમ સીનિયર લેવલની નહીં હોય પણ ટીયર-2 લીગ હશે
- એક નક્કી ઉંમરના ક્રિકેટર્સને ચાન્સ મળે તેવી આશા
- જૂનિયર ખેલાડીને વધારે ચાન્સ મળવાની શક્યતાઓ વધારે
હવે ગણતરીના દિવસો બાદ એટલે કે 19 ડિસેમ્બરે ઈન્ડિયન પ્રીમિયર લીગના નવા સીઝનને માટે ખેલાડીઓની નિલામી થવાની છે. આ નીલામી દુબઈમાં થવાની છે અને માર્ચમાં નવી સીઝનની શરૂઆત થશે. 2008માં શરૂ થયેલી આઈપીએલની આ 17મી સીઝન હશે. IPLની નવી સીઝનની સાથે ભારતીય ક્રિકેટ કંટ્રોલ બોર્ડ હવે તેના જેવી એક અન્ય નવી ટૂર્નામેન્ટ શરૂ કરવાની યોજના કરી રહ્યું છે. જો બધું યોગ્ય રીતે ચાલશે તો 2024માં બીસીસીઆઈ આ નવી ફ્રેન્ચાઈઝી ટૂર્નામેન્ટ શરૂ કરશે અને આ વખતે તે T10 ફોર્મેટમાં આવી શકે છે.
ભારતીય બોર્ડમાં નવી ક્રિકેટ લીગને લઈને ચર્ચા થઈ રહી છે. આ નવી લીગનો આઈડિયા બોર્ડના સચિવ જય શાહના મગજની ઉપજ હોવાનું કહેવાઈ રહ્યું છે. તેના માટે સ્પોન્સર્સની તરફથી સપોર્ટ મળી રહ્યો છે. જો કે આ લીગ આઈપીએલના સીનિયર લેવલની નહીં હોય પણ ટીયર-2 લીગ હશે જેમાં નક્કી ઉંમરના ક્રિકેટર્સને ચાન્સ અપાય તેવી શક્યતાઓ જોવા મળી રહી છે.
T10 ફોર્મેટમાં શરૂ થશે નવી લીગ?
રિપોર્ટમાં કહેવાયું છે કે સૌથી મોટો સવાલ લીગના ફોર્મેટને લઈને છે. થોડા સમયથી ટી-10 ફોર્મેટે ફેન્સને આકર્ષિત કર્યા છે. અબૂ ધાબી ટી-10 લીગને લઈને ફેન્સ અને ક્રિકેટર્સમાં ઉત્સાહ જોવા મળી રહ્યો છે. ભારતમાં અત્યાર સુધી આ ફોર્મેટની કોઈ મોટી લીગ નથી. એવામાં બીસીસીઆઈની અંદર તેને અજમાવવાને લઈને ઉત્સુકતા છે અને સાથે આ ફોર્મેટને આગળ વધારવાનો વિચાર છે. ટી20 ફોર્મેટ પર પણ વિચાર થાય તેવી શક્યતાઓ છે.
કયા ખેલાડીઓને મળશે તક?
આ સિવાય એક મોટો પ્રશ્ન તેમાં ભાગ લેનાર ખેલાડીઓને લઈને છે. સ્વાભાવિક છે કે બીસીસીઆઈ તેને આઈપીએલ માટે મેચ બનાવશે નહીં અને આવી સ્થિતિમાં આઈપીએલમાં રમનારા મોટા ખેલાડીઓને તેમાં ભાગ લેવાની મંજૂરી આપવામાં આવશે નહીં, પરંતુ આ માટે કોઈ ‘ઉમર મર્યાદા’ હોવી જોઈએ કે નહીં? તેનો અર્થ એ કે ચોક્કસ વય સુધીના ખેલાડીઓને જ તેમાં સામેલ કરવામાં આવી શકે છે. આ એક સંભવિત વિકલ્પ હોઈ શકે છે, જેના કારણે જુનિયર સ્તરના ખેલાડીઓને વધુને વધુ તકો મળવાની સંભાવના છે.
ટુર્નામેન્ટ માટે વિન્ડો
એક પાસું એ છે કે આ માટે નવી ફ્રેન્ચાઈઝી શરૂ કરવી જોઈએ કે પછી આઈપીએલની માત્ર 10 ફ્રેન્ચાઈઝીને તેમાં ભાગ લેવાની મંજૂરી આપવી જોઈએ. રિપોર્ટમાં જણાવવામાં આવ્યું છે કે ભારતીય બોર્ડે આઈપીએલની હાલની ફ્રેન્ચાઈઝી સાથે જે કરાર કર્યો છે તેમાં સ્પષ્ટ છે કે આઈપીએલ જેવી કોઈ પણ નવી લીગ શરૂ કરવા પર બોર્ડે આ ફ્રેન્ચાઈઝીઓને પ્રથમ ઓફર કરવી પડશે, જેમ કે મહિલા પ્રીમિયર લીગ જોવા મળી હતી. જ્યાં સુધી ટુર્નામેન્ટના આયોજનની વાત છે, હવેથી તેના માટે સપ્ટેમ્બર અને ઓક્ટોબરની વિન્ડો નક્કી કરવામાં આવી રહી છે.
