– વિશ્વબજારમાં કિંમતી ધાતુઓના ભાવમાં ફરી પીછેહટ જોવા મળી
Updated: Nov 12th, 2023
મુંબઈ : મુંબઈ ઝવેરીબજારમાં આજે શનિવારના કારણે બુલીયન બજાર સત્તાવાર બંધ રહી હતી. જોકે બંધ બજારે સોના- ચાંદીના ભાવમાં ઉછાળા ઉભરા જેવા નિવડતાં ભાવ ફરી તૂટી ગયાના નિર્દેશો મળ્યા હતા.
વિશ્વબજારમાં ભાવ ગબડતાં ઘરઆંગણે ઈમ્પોર્ટ કોસ્ટ ફરી નીચી ઉતરતા દેશના ઝવેરીબજારોમાં દિવાળી પૂર્વે ભાવ ઝડપી તૂટી જતાં દિવાળીની માગ સારી રહેવાની આશા બજારના જાણકારો બતાવી રહ્યાહતા. વિશ્વબજારમાં સોનાના ભાવ ઔંશદીઠ ૧૯૪૭થી ૧૯૪૮ વાળા નીચામાં ૧૯૩૩થી ૧૯૩૪ થઈ છેલ્લે ભાવ સપ્તાહના અંતે ૧૯૪૦થી ૧૯૪૧ ડોલર રહ્યા હતા.
દરમિયાન, ઘરઆંગણે અમદાવાદ ઝવેરીબજારોમાં સોનાના ભાવ ૧૦ ગ્રામના રૃ.૭૦૦ તૂટી ૯૯.૫૦ના રૃ.૬૧૮૦૦ તથા ૯૯.૯૦ના રૃ.૬૨૦૦૦ બોલાતા થયા હતા. જ્યારે અમદાવાદ ચાંદીના ભાવ કિલોના રૃ.૧૦૦૦ ગબડી રૃ.૭૧૫૦૦ રહ્યા હતા. વિશ્વબજારમાં સોના પાછળ ચાંદીના ભાવ ઔંશના ૨૨.૪૮થી ૨૨.૪૯ વાળા નીચામાં ૨૨.૧૯ થઈ છેલ્લે ભાવ ૨૨.૨૬થી ૨૨.૨૭ ડોલર રહ્યા હતા. વૈશ્વિક કોપરના ભાવ છેલ્લે ૧.૪૭ ટકા માઈનસમાં ટ્રેડ થતા જોવા મળ્યા હતા.
દરમિયાન, મુંબઈ કરન્સી બજારમાં બંધ બજારે આજે રૃપિયા સામે ડોલરના ભાવ રૃ.૮૩.૩૪ વાળા વધી રૃ.૮૩.૩૭ બોલાઈ રહ્યા હતા.વિશ્વબજારમાં ક્રૂડતેલના ભાવમાં તળીયેથી સુધારો જોવા મળ્યો હતો. બ્રેન્ટ ક્રૂડના ભાવ બેરલ દીઠ ૮૧.૦૫ વાળા ૮૨.૦૬ થઈ ૮૧.૪૩ ડોલર રહ્યા હતા. જ્યારે યુએસ ક્રુડના ભાવ ૭૬.૭૬ વાળા ૭૭.૭૩ થઈ છેલ્લે ભાવ ૭૭.૧૭ ડોલર રહ્યા હતા.
મુંબઈ બુલીયન બજારમાં આજે સોનાના ભાવ જીએસટી વગર ૯૯.૫૦ના રૃ.૫૯૯૯૯ વાળા રૃ.૫૯૭૦૦ તથા ૯૯.૯૦ના ભાવ રૃ.૬૦૨૪૦ વાળારૃ.૫૯૯૫૦ રહ્યા હતા. મુંબઈ ચાંદીના ભાવ જીએસટી વગર રૃ.૭૦૪૧૬ વાળા રૃ.૬૯૮૦૦ રહ્યા હતા.
