- પોલીસે ઈલેક્ટ્રોનિક ઉપકરણો મૂકવા માટે બોક્સ મૂક્યા હતા
- 300થી વધુ પાવર બેન્કનું બોક્સ અદ્રશ્ય થયું
- વધુ ગરમીને કરને કેટલાક પ્રેક્ષકો મેચ અધુરી મૂકીને સ્ટેડીયમની બહાર નિકળ્યા હતા
સ્ટેડીયમના મેઇન ગેટ નંબર 1 અને 2 પર પોલીસે ઈલેક્ટ્રોનિક ઉપકરણો મૂકવા માટે બોક્સ મૂક્યા હતા, જેમાં 300થી વધુ પાવર બેંક સહિતના ઉપકરણો ભેગા થયા હતા. ગરમી વધુ હોવાથી કેટલાક પ્રેક્ષકો મેચ અધુરી મૂકીને સ્ટેડીયમની બહાર નિકળ્યા હતા ત્યારે જે પ્રેક્ષકોએ બોક્સમાં ઇલેક્ટ્રોનિક ઉપકરણો મૂક્યા હતા તે બોક્સ ગાયબ હતું. પોલીસકર્મીને પૂછતા આવા કોઇ બોક્સ અંગે ખબર નથી તેવો ઉડાવ જવાબ આપીને ત્યાંથી રવાના કર્યા હતા.
સ્ટેડિયમ બહારથી 150 લોકોના મોબાઇલ ચોરાયા
સ્ટેડિયમમાં મેચ જોવા આવેલ ક્રિક્રેટ રસિકોના મોબાઇલ તો ચોરાયા જ છે. પરંતુ સ્ટેડિયમની બહાર ઉભેલા લોકોના પણ 150 લોકોના મોબાઇલ ચોરાયા હતા, જેમાં પોલીસ દ્વારા સતત પેટ્રોલીંગ કરીને ખિસ્સા કાતરૂથી સાવધાન રહેવા ક્રિક્રેટરસિકોને અપીલ કરવામાં આવી હતી. તેમ છતા ખિસ્સાકાતરૂઓએ 150 લોકોના મોબાઇલ ચોરી લીધા હતા.
સ્થાનિકોએ લોકોના વાહનો પાર્ક કરાવી લૂંટ ચલાવી
સ્ટેડિયમમાં આવેલ પ્રેક્ષકો માટે પે પાર્કિંગના પ્લોટ ફાળવવામાં આવ્યા હતા. ત્યારે શહેર ટ્રાફ્કિ પોલીસે કહ્યું હતું કે, સ્થાનિકો વાહનો પાર્ક કરાવશે તો ટૉ કરવામાં આવશે. પરંતુ ટ્રાફ્કિ પોલીસની આ વાતનું સુરસુરિયું થઈ ગયું હતું, જેમાં સ્થાનિકો પોતાના ઘર પાસે તેમજ જાહેર રોડ પર વાહનો પાર્ક કરાવીને રૂ. 200થી 500 વસૂલીને લૂંટ ચલાવી હતી.
સ્ટેડિયમની બહાર જાહેર શૌચાલય ન હોવાથી લોકોને હાલાકી પડી
નરેન્દ્ર મોદી સ્ટેડિયમ પ્રેક્ષકોથી ખીચોખીચ ભરેલું જોવા મળ્યું હતું. તેમજ બહાર પણ હજારોની સંખ્યામાં ક્રિકેટરસિકો ઊમટી પડયા હતા. ત્યારે બહાર ઊભેલા ક્રિકેટ રસિકોને શૌચાલય બાબતે ગંભીર સમસ્યા સર્જાઇ હતી. જેમાં સ્ટેડિયમની બહાર 500 મીટર સુધી કોઇ જાહેર શૌચાલય ન હોવાથી લોકોને હાલાકી ભોગવવાનો વારો આવ્યો હતો.
સ્ટેડિયમ બહાર પોલીસની સામે જ ટિકિટનો વેપલો કરતો શખ્સ ઝડપાયો
સ્ટેડિયમની બહાર બ્લેકમાં ટિકિટ વેચતા શખ્સને ક્રાઇમ બ્રાન્ચે ઝડપી પાડયો હતો, જેમાં સ્ટેડિયમની અંદર સ્કેન કરેલી ટિકિટો શખ્સે બહાર આવી વેચવાનો પ્રયાસ કર્યો હતો, જેમાં બુક માય શોના કર્મચારીએ સ્કેન કરેલી ટિકિટ અનઅધિકૃત વ્યક્તિને બહાર આપી હતી. ક્રાઇમ બ્રાન્ચે સોહિલ નામનો શખ્સને ટિકિટ વેચતા ઝડપી લઈ ટિકિટ લેનારની પણ અટકાયત કરી છે.
સુરક્ષાને ધ્યાને રાખીને પોલીસ કંટ્રોલ રૂમ ઊભો કરાયો, 2000થી વધુ સીસીટીવી અને ડ્રોનથી મોનિટરિંગ કરાયું
મેચ દરમિયાન લોખંડી બંદોબસ્ત ગોઠવવામાં આવ્યો હતો. જેમાં સુરક્ષાની ધ્યાને રાખીને પોલીસે કંટ્રોલરૂમ ઊભો કર્યો હતો, જેમાં તમામ ગતિવિધિઓ પર નજર રાખવામાં આવી રહી હતી. ત્યારે બે હજાર કરતાં વધુ સીસીટીવી કેમેરા અને ડ્રોનથી સમગ્ર શહેરમાં મોનિટરિંગ કરવામાં આવ્યું હતું. તેમજ સંવેદનશીલ વિસ્તારમાં આરએએફ્, સીઆરપીએસ સહિતની કંપનીઓએ ફૂટ પેટ્રોલિંગ હાથ ધર્યું હતું.
